Македонија
Традицијата да се одлагаат рочиштата за Канческа-Милеска продолжи, сега вештак не можел да дојде на судење

Судењето за „Тендери“ каде обвинета е Елизабета Канческа-Милевска одново се одложи. Откако стигна супервештачењето од Бирото за судски вештачења, сега на рочиште не се појави вештак кој требал да сведочи. Судијата Осман Шабани кој пет години суди но никако да го доведе судскиот процес до крај, ново рочиште го закажа за 23 дена.
„Расправата е одложена за 31.03.2023 година со оглед да едниот од трите вешти лица бил спречен да дојде на денешната расправа“, велат од Кривичен суд за „Макфакс“.
Бирото за судски вештачења го држеше предметот „Тендери“ повеќе од пет месеци. Ова доведе и до низа одложени рочишта. Тие направија супервештачење поради две спротивставени вештачења. Предметот се суди половина деценија.
Ако се види хронологијата на рочишта, досега, предметот пет пати се судел одново поради протек на 90 дена од последно одржано рочиште. За предметот, од „Коалиција за правично судење“ во анализа забележува дека честото започнување на главната расправа одново за овој предмет е откако беше завршен процесот на промена на Уставот во Собранието, а тогашната пратеничка Канческа-Милевска гласаше „за“.
„По уставните измени во јануари 2019 година, а согласно податоците од спроведениот судски мониторинг од страна на Коалицијата, се констатира дека главната расправа има започнато дури 4 пати одново – два пати поради промена на член на судечкиот совет и два пати поради проток од 90 дена. Тука вреди да се напомене дека од октомври 2021 година судењето имаше континуитет во изведување на доказите се додека во април 2022 година судот не издаде наредба да се изготви супервештачење бидејќи вештачењата на странките се контрадиктори и имаат недоречености“, се вели во анализата.
Според обвинението, пред да се објави оглас за доделување договор за јавна набавка и пред да се спроведе постапката, спротивно на Законот за јавните набавки пред да се донесе одлуката за потребата од јавна набавка, Канческа-Милевска преку разговори со генералниот директор на градежното претпријатие „Бетон“ од Штип наложила да се продолжи со работа на Музејот, каде што се изведувале градежни работи по претходно склучен договор за јавна набавка.
Се тврди дека ексминистерката наложила да ги изведат и сите работи што произлегувале дополнително и кои не биле опфатени во договорот за јавна набавка и во анексите, со што немало да се чекаат дваесетина дена за спроведување на новата јавна набавка. Канческа претходно договорила преку второобвинетата во Комисијата за јавни набавки, кога ќе се објави огласот, договорот да го добие „Бетон“ од Штип.
СЈО го поведе случајот, а сега Обвинителството за гонење организиран криминал тврди дека тројцата обвинети (ексминистерката и двајца членови на комисијата за јавни набавки) ја злоупотребиле службената положба и овластувањето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Силно одбранбено партнерство и целосна усогласеност со заедничката надворешна и безбедносна политика, Мисајловски и Калас ги посетија Балканските медицински наменски сили

Министерот Владо Мисајловски и високата претставничка на Европската Унија за надворешни работи и безбедносна политика, Каја Калас денеска (23 мај) ги посетија Балканските медицински наменски сили (Balkan Medical Task Force) каде извршија увид во опремата со која Европската Унија го поддржа развојот на оваа регионална организација.
Министерот Мисајловски истакна дека поддршка од Европската Унија, но и од сојузниците во градење на македонските одбранбени капацитети се должи на искрената посветеност, подготвеност и професионалност во зачувувањето на мирот, стабилноста и безбедноста на регионот и пошироко.
„Европската Унија ја препозна нашата искрена заложба за зајакнување на безбедноста вклучувајќи го и придонесот во мировните мисии и операции и одговори позитивно на барањата за зајакнување на македонската Армија со помош во опрема во висина од 40 милиони евра“, рече министерот.
Тој додаде дека европската помош се однесува на „ опрема за потребите на инженерија, за воено медицинскиот центар, за Лесната пешадиска баталјонска група, за логистиката, технологии поврзани со разузнавање, набљудување и извидување, електронско војување, комуникациско – информациски системи, системи за команда и контрола, заштитна опрема“ и посочи дека со оваа помош е опфатена и обука на персонал.
Високата претставничка на ЕУ за надворешни работи и безбедносна политика, Калас за Балканските медицински наменски сили рече дека се силен пример за регионална соработка што дава резултати.
„Европската Унија ја поддржува оваа иницијатива и политички и финансиски, бидејќи таа точно го одразува она за што се залагаме во Западен Балкан: доверба, партнерство и постигнување видливи резултати за луѓето. Оваа иницијатива е уште поважна бидејќи се однесува на спасување животи“, рече Калас.
Калас посочи дека Северна Македонија е доверлив партнер, целосно усогласен со Заедничката надворешна и безбедносна политика на ЕУ, придонесувајќи во операциите на ЕУ, особено во ЕУФОР АЛТЕА во Босна и Херцеговина и истакна дека јасноста и конзистентноста во геостратешката ориентација на нашата држава „се клуч што би можел да отклучи подлабока одбранбена соработка со ЕУ“.
Балканските медицински наменски сили се меѓународна организација со седиште во Скопје, формирана со цел да обезбеди брз и координиран одговор при катастрофи предизвикани од природни непогоди или човечки фактори. Земји членки на БМНС се Северна Македонија, Албанија, Босна и Херцеговина, Србија, Словенија и Црна Гора.
Македонија
Прв Дијалог за безбедност и одбрана меѓу Европската Унија и Северна Македонија

Денеска, во рамки на официјалната посета на високата претставничка на ЕУ за надворешни работи и безбедносна политика, Каја Калас, во Министерството за надворешни работи и надворешна трговија се одржа Првиот дијалог за безбедност и одбрана меѓу Европската Унија и Република Северна Македонија, во рамките на Партнерството за безбедност и одбрана потпишано во ноември 2024 година.
Состанокот официјално го отворија министерот за надворешни работи и надворешна трговија, Тимчо Муцунски, високата претставничка на ЕУ, Каја Калас, а обраќање имаше и министерот за одбрана, Владо Мисајловски.
Во своето обраќање, министерот Муцунски ја истакна силната одлучност и посветеност на државата да биде доверлив партнер на ЕУ и НАТО во справувањето со безбедносните предизвици во сложеното геополитичко опкружување.
„Како држава, остануваме целосно усогласени со Заедничката надворешна и безбедносна политика на Европската Унија. Нашата 100-процентна усогласеност не е само техничка обврска, туку и јасен одраз на нашата стратешка ориентација и споделени вредности. Ги поддржуваме сите постојни напори за постигнување праведен и траен мир во Европа, останувајќи доследни во споделувањето на заедничкиот товар преку продолжување на севкупната поддршка за Украина, вклучително и во воениот и одбранбениот аспект“, истакна министерот Муцунски.
Преку отворен и конструктивен дијалог, двете страни разменија мислења за регионалните безбедносни прашања и војната во Украина. Беше нагласена важноста на регионалната стабилност и улогата на Северна Македонија, како НАТО членка и ЕУ-кандидат, во јакнењето на европската безбедносна архитектура.
На средбата беше направен пресек на активностите поврзани со учеството на државата во мисиите и операциите во рамки на Заедничката безбедносна и одбранбена политика, како и на тековните активности за справување со сајбер и хибридни закани, стратешка комуникација, борба против дезинформации и странски влијанија, како и учеството на жените во овие процеси.
Дополнително, македонската страна изрази силен интерес за продлабочување на соработката со ЕУ во одбранбените иницијативи, вклучително и преку Европската агенција за одбрана (EDA), Постојаната структурална соработка (PESCO), воената мобилност и претстојната Бела книга за европска одбрана. Како земја членка на НАТО, државата е јасно позиционирана за зајакнување на соработката меѓу ЕУ и НАТО во актуелното безбедносно опкружување.
На отворањето на првиот дијалог во рамки на Партнерството за безбедност и одбрана МК – ЕУ, министерот за одбрана Владо Мисајловски ја истакна посветеноста на Европската Унија која ја препозна нашата искрена заложба и посветеност во однос на зачувување на стабилноста, мирот и безбедноста на регионот и пошироко. Тој упати благодарност за поддршката од страна на Унијата наменета за македонската Армија, извести Министерството за надворешни работи и надворешна трговија.
„Во моментов имаме најголем буџет за одбрана, над 30 проценти се наменети за модернизација на Армијата, и оваа опрема дополнително ќе влијае на развојот на способностите и капацитетите на одбранбените капацитети“, рече Мисајловски.
Овој прв Дијалог за безбедност и одбрана меѓу Република Северна Македонија и Европската Унија означи почеток на редовни политички и експертски консултации, со што ќе се овозможи следење на спроведувањето на Партнерството и отворање нови можности за соработка во интерес на мирот, стабилноста и безбедноста на граѓаните, се наведува во соопштението на Министерство.
Македонија
Собрани околу 2,5 милиони евра за настраданите во Кочани, од Црвениот крст велат во неколку наврати вршеле исплата

Во рамките на апелот на Црвениот крст за поддршка на настраданите од катастрофалниот пожар во Кочани од 16 март, досега се собрани 156.542.967 денари или околу 2,5 милиони евра.
Од Црвениот крст велат дека заклучно со денес, во неколку наврати извршиле исплата на погодените семејства од пожарот во Кочани.
„Со овие средства досега е обезбедена финансиска поддршка на семејствата на починатите лица во вкупен износ од 52.038.593 денари. За настраданите лица од пожарот кои се лекуваа во странство вкупно се исплатени 44.163.258 денари, а за настраданите кои се лекуваа во земјата вкупно се исплатени 11.247.250 денари“, велат од Црвениот крст, сумирајќи дека вкупниот досегашен трансфер на средства изнесува 107.449.101 денари.
Се додава дека преостанатите средства во износ од 46.593.866,00 денари на сметката на Црвениот крст, по направените проценки кои се во тек, за тежината на повредите и прогнозите за времетрање на лекувањето и потребите на повредените, направени од стручни и компетентни институции во државата, а со цел објективизација и постигнување на целите и задоволување на реалните потреби на настраданите лица, Црвениот крст навремено ќе пристапи кон распредлба на средствата.
Црвениот крст уште еднаш се заблагодарува на сите досегашни донатори што придонесоа и се уште придонесуваат за мобилизирање на хуманитарна поддршка за настраданите и нивните семејства.