Здружението „Зелена лупа“  поднесе иницијатива до Судскиот совет за утврдување одговорност на тројца судии – Гордана Ѓорчева, претседателка на советот на Апелација, Радица Васиљевска и Фатмир Скендер, членови на советот.

„Согласно обработените податоци од страна на експертите ангажирани од ‘Зелена лупа’, станува збор за сторено грубо прекршувања на законот со нестручно и несовесно работење во случај – Срѓан Захариевски против ФК ‘Силекс’. Во овој случај Судечкиот совет при Апелација пресудува спротивно на одредбите на Законот за спорт и Законот за извршување и поништува одлуки на сите претходни судски инстанци кои своите одлуки ги донеле согласно закон. Овие судии со прекршување на законот за спорт донесен 2011 година ја овозможија намерата на тогашната влада за бесплатно преземање и избегнување на плаќање на долговите  обврските кон доверителите согласно законот, во комбинација со новиот закон за ослободување од данок, и бесплатно водење на популарни спортски клубови на до неа блиски бизнисмени“, изјави Васко Тодоровски, извршен директор на Здружението.

Според него, ова оставило многу фудбалери, ракометари, кошаркари и тренери, како и правни лица добавувачи и агенции да не можат да си ги наплатат своите побарувања од клубовите со вкупна вредност од неколку милиони евра.

„Во конкретниот случај, Ѓорчева со нејзиниот совет покрива измама од страна на ФК ‘Силекс’, кој присвоил повеќе од 300.000 евра кои му припаѓаат на фудбалерот Захариевски, што е констатирано од сите претходни судски инстанци во процес кој трае 20 години“, кажа Тодоровски.

Во ек на пандемијата од Ковид-19, изнемоштените и стари лица кои живеат на територија на општина Карпош можат да добијат бесплатна нега и грижа.

Тимот на социјалното претпријатие „Нега плус“ ја овозможува оваа поддршка преку Проектот на УСАИД за граѓанско учество. Граѓаните можат да добијат некоја од следните услуги, пријавувајќи се на телфонскиот број 070 – 299 – 026 – подготовка на храна; пазарење; помош при одржување на основна хигиена во домот; помош при пресоблекување; бањање.

Во текот на изминатите 10 дена поднесени се 1.006 апликации за субвенции за инвертери, а остануваат средства за уште околу 4.000 барања, соопшти Град Скопје.

Досега по општини аплицирале – во Кисела Вода 200 домаќинства, Ѓорче Петров 166, Гази Баба 136, Бутел 118, Карпош 105, Аеродром 98, Чаир 87, Центар 63, Шуто Оризари 23 и Сарај 10 граѓани.

Повикот ги опфаќа граѓаните кои купиле инвертер од 1.1.2020 година, до завршувањето на повикот на 30.11.2020 години или до денот на исцрпување на средствата. На граѓаните ќе им бидат целосно надоместени трошоците за набавка на инвертер-уред, но не поголема од 62.000 денари во нето износ.

Граѓаните може да аплицираат онлајн. Согласно со условите, на овој јавен повик може да аплицираат сите граѓани на територија на Град Скопје кои немаат искористено субвенции за затоплување на своето домаќинство од Градот Скопје и кои немаат приклучок или можност за приклучок на централно греење во објектот каде што ќе биде инсталиран уредот.
Набавениот уред потребно е да биде монтиран во објектот со адреса од личната карта на барателот.

Новитет на овој јавен повик е условот граѓаните доброволно да ја достават (без надоместок) постојната печка на дрва, јаглен, нафта или на мазут на локација која дополнително ќе им биде соопштена.

Доделувањето на субвенции за инвертер клима уреди за затоплување на домаќинствата е дел од мерките предвидени во Планот за подобрување на квалитетот на воздухот и Акциониот план на Стратегијата за климатски промени на Град Скопје.

Сите информации за повикот, како и формуларите за електронското пријавување се објавени на следниов линк https://www.surveymonkey.com/r/gradskopje-inverter2020