Македонија
Филипче: Службено да се достават сите информации за смртта на мајката и синот од Велес

Сите кои имаат информации кои може да помогнат за расветлување на случајот со смртта на мајката позитивна на Ковид-19 и нејзиниот син од Велес треба по службен пат да ги достават до Институтот за судска медицина, рече министерот за здравство, Венко Филипче. Неговиот повик за соработка доаѓа откако министерот за внатрешни работи, Наќе Чулев, јавно кажа дека МВР има податоци кои говорат дека мајката и синот починале во јануари или на почетокот на февруари, а не во март како што објави министерот, согласно извештајот од Институтот за судска медицина.
„Ја слушнав изјавата. Сите институции што имаат информации за овој случај мислам дека треба да соработуваат меѓу себе. Ако има досега несподелена информација тоа треба да го направат по службен пат, посебно имајќи предвид дека таму Судска медицина имаше и дополнителен увид за да се утврди времето на смртта. Не е завршен извештајот од Судска медицина. Извесно е дека смртта настапила неколку недели пред да бидат пронајдени телата. Информациите на МВР за телефонските разговори се предмет на соработка меѓу институциите во рамките на нивните ангажмани. Судска медицина соработува со МВР и со Обвинителството постојано, а така очекуваме да биде и сега“, рече министерот Филипче и нагласи дека во Институтот за судска медицина работат врвни и докажани експерти.
Епидемиолозите го оценија случајот како контроверзен оти отвори сомнеж за постоење на вирусот и пред да биде регистриран првиот случај, но откако Судска медицина утврди дека смртта настапила три до пет недели од пронаоѓањето на телата министерот Филипче соопшти дека нема да се прават дополнителни анализи за постоењето на вирусот оти смртта настапила во текот на март.
Мајката и синот на шести април беа пронајдени мртви во стан во Велес. Полицијата ги пронајде откако соседите пријавиле дека од станот се шири смрдеа, а посмртно во дишното стебло на мајката беше откриен коронавирус.Соседите се посомневаа дека починале во јануари бидејќи од тогаш не ги забележале мајката и синот.
Вчера, пак, СВР Велес извести дека полицијата добила известување од „Електродистрибуција“ Велес дека броилото покажало дека во станот последен пат е забележана потрошувачка на струја во јануари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Незадоволството од локалната власт во Куманово достигна точка на вриење, ветувам силна и одлучна битка да го вратиме во рацете на кумановци“, најави Костовски

„Огромна чест ми е да бидам кандидат за градоначалник на нашето Куманово од СДСМ и коалицијата на претстојните локални избори. Му благодарам на раководството и на претседателот Венко Филипче за довербата, и на сите оние кои застанаа зад мене. Ме радува што огромен број граѓани ми ја дадоа поддршката овие денови, што е јасен сигнал дека Куманово бара промени“, напиша на социјалните мрежи, кандидатот на СДСМ за градоначалник на Куманово, Мартин Костовски.
„Незадоволството од локалната власт во Куманово достигна точка на вриење. Работите веќе четири години одат во погрешна насока и тоа знам дека сите вие го чувствувате и гледате. Максим Димитриевски не заслужува реизбор – ги изневери сите ветувања дадени пред граѓаните. Куманово се дави во смет и пропадната инфраструктура, се случува урбанистички хаос кој го креира Димитриевски заради сопствените бизнис интереси. Куманово во 2025 сè уште кубури со вода, а паркинг место нема ни за лек.
Димитриевски ги изневери сите кои гласаа за него. Наместо коректор на власта, стана пион на Мицкоски и тројански коњ кој треба да ја дели опозицијата и СДСМ. Човек кој ги погази сите наводни принципи и молчи пред криминалот на неговите коалициски партнери. Човек кој ведне глава пред патронот Мицкоски. Единствено нешто што Максим добро го прави тоа неговиот бизнис со оние за кои до вчера велеше дека се криминалци.
Куманово може подобро! Ветувам силна и одлучна битка да го вратиме Куманово во наши раце, во раце на кумановци. Ветувам дека ќе одам од човек до човек за да ја пренесам мојата идеја за подобра и пофункционална општина која ќе работи во интерес на сите граѓани на Куманово. Ветувам дека СДСМ во Куманово ќе се обедини и дека СДСМ ќе се врати многу силно! Одиме на победа!“, додаде тој.
Македонија
Дел од Шуто Оризари денеска без струја

Од ЕВН – Македонија известуваат дека денеска без електрична енергија ќе останат:
· во периодот од 09.00 до 15.00 часот, дел од корисниците од Шуто Оризари место викано Пирков Рид. (општина Шуто Оризари)
Македонија
Претежно сончево и многу топло

Времето денеска, претежно сончево и многу топло со слаб до умерен ветер од променлив правец. Минималната температура ќе биде во интервал од 11 до 20, а максималната ќе достигне од 32 до 39 степени.
Во Скопје, сончево и многу топло со слаб до умерен јужен ветер. Минималната температура ќе се спушти до 18, а максималната ќе достигне до 39 степени.
Под влијание на топла воздушна маса од југ, до средината на следната седмица времето ќе биде сончево и многу топло со мала до умерена облачност.
Дневната температура насекаде ќе биде над 30°C, а наместа ќе надминува 40°C.
Во недела во попладневните и вечерните часови ќе има услови за локална нестабилна облачност со пороен дожд и грмежи.