ДОМ бара локалниот и државен инспекторат за градежништво и за животна средина, веднаш да излезат на терен во потегот помеѓу Струга и Калишта.

„Надлежните институции се должни да одговорат на бројните реакции од граѓани за поставување бетонски огради, палење трска и друга вегетација и депонирање градежен шут во овој предел“, велат од ДОМ.

Од партијата потсетуваат на потребата од спроведување на заклучоците од Надзорната собраниска расправа за управување со Охридскиот регион, со цел зачувување на природното и културното наследство заштитено од УНЕСКО.

Министерството за здравство и Управата за електронско здравство воведуваат новини во националниот систем Мојтермин, со цел, како што велат од Министерството, подобрување на здравствената евиденција и поедноставување на работата на здравствените работници, но пред се заради оптимизација на процесот на упатување на пациентите и побрзо добивање на услугата која им е потребна на пациентите.

Најзначајната новина која се воведува се два нови упати, од кои првиот тип е „Итен 24“, кој ќе се издава доколку лекарот кој врши преглед утврди дека пациентот заради неговата состојба животозагрозувачка итна состојба, е неопходно да биде прегледан од специјалист, односно супспецијалист или да му биде извршена одредена дијагностичка процедура во рок од 24 часа.

Вториот тип на упат се нарекува „Упат без термин“ и се користи во случај кога пациентот има потреба од преглед, поврзан со остварување одредено право и прегледот треба да се изврши во следните седум дена. Овој тип на упат ќе се користи доколку во установата каде што се упатува пациентот не постои слободен термин во следните седум дена за т.н. регуларен преглед.

Имено, упатот без термин нема да се користи за прв преглед, туку за остварување права и обврски на осигурениците од задолжително здравствено осигурување и тоа за: препорака за боледување, препорака за користење хронична терапија, препорака и издавање ортопедски помагала, остварување право на БПО, остварување други права за кои е потребно мислење од специјалист/супспецијалист/ конзилиум на лекари, преглед/аплицирање терапија, која поради здравствената состојба треба да се изврши во рок од 24/48/72 часа.

Во делот на болничко работење се воведува нова мерка, со која отпусното писмо задолжително ќе се издава на денот на испишување на пациентот од болница, а најдоцна во рок од 24 часа. Доколку за пациентот се чека хистопатолошки наод се издава отпусно писмо со работна дијагноза, а по добивање на резултатите и отпусно писмо со конечна дијагноза.

Исто така, интерклиничкиот упат и интерболничкиот упат се спојуваат во еден тип – Упат за трансфер на хоспитализиран пациент.

Управата за електронско здравство, заедно со ФЗОМ во изминатиов период работеше на подготовка на правната регулатива во овој сегмент, во соработка и консултација со јавните здравствените установи и Лекарската комора на Македонија.

Премиерот Зоран Заев побара оставка од директорот на затворот во Шуто Оризари, Ѓоко Котевски по вчерашните вербални и физички напади на ексминистрите Миле Јанакиески и Спире Ристовски.

„Во затворот секој треба да си ја врши работата и да не дозволува ни намерни ни ненамерни инциденти. Секое лице што доаѓа таму лишено од слобода треба да биде безбедно. Со оглед на тоа што Владата го именува директорот на затворот во Шутка очекувам тој во понеделник до Владата да поднесе оставка“, рече премиерот Заев на денешната конференција за борба против корупција.

Премиерот објасни дека се слушнал со директорот Котевски кој му поднел устен извештај за инцидентите. Според директорот, Ристовски прв вербално нападнал друг притвореник, а за кусо време се случил уште еден инцидент. Премерот тврди дека вакви постапки нема да се толерираат без оглед дали истрагата ќе покаже дека нападнатите го испровоцирале инцидентот или не.

Инцидентот се случи вчера, во затворот „Скопје“ во Шуто Оризари. По вербалните напади, имало и физички напад по кој ексминистрите Јанакиески и Ристовски се јавиле кај затворскиот лекар, а Јанакиески бил префрлен во Градскат аопшта болница „8 Септември“, а откако не била утревредна потреба да биде задржан, го вратиле во истражниот затвор.

Поранешните министри Спиро Ристовски и Миле Јанакиески од завчераноќ се во 30-дневен притвор. Обвинителството за гонење организиран криминал и корупција ги осомничи дека се дел од шестемина што ги организирале насилствата во Собранието на 27 април 2017 година.