Oбвинителството ќе ја обезбеди целата документација за техничките прегледи на автобусите

Државниот јавен обвинител, Љубомир Јовески, заедно со шефицата на Одделот за организиран криминал, Вилма Русковска, е во Бугарија на местото на несреќата, каде што во автобуска несреќа настрадаа 45 луѓе, македонски државјани, а седуммина се повредени. Тие на автопатот „Струма“ се сретнаа со директорот на бугарската Национална истражна служба, Борислав Сарафов.

Русковска изјави дека на самото место е и превозникот на автобусите, претставникот од „Беса транс“, и таа имала кратка средба со него.

„Тука е превозникот, кратко се сретнавме. Ми рече дека 20 години има транспортна фирма, досега немале инцидент, но ние ќе ја обезбедиме целата документација за сите автобуси – кога се регистрирани, кога бил извршен технички преглед и ќе ги испратиме до колегите. Сепак, знаете, тој сега што сака може да каже, но ние обвинителите повеќе веруваме во документи отколку во што и да било друго“, рече Русковска.

Јовески изрази сочувство до семејствата на настраданите и рече дека верува оти бугарските истражни органи професионално ќе ги разјаснат сите околности во овој настан.

„Ние ќе дадеме помош во делот на обезбедување документација, идентификување на настраданите и сѐ она што е потребно во истражувањето“, изјави Јовески.