Македонија
Адвокатот на Анџело Ѓоргиевски: Нема кривично дело убиство, предлагаме ослободителна пресуда

Доказите на Обвинителството се во прилог на одбраната, а произлегува друга фактичка состојба, која не дава можност судот обвинетиот Анџело Ѓоргиевски го осуди за делото убиство кое му се става на товар.
Ова е ставот на адвокатот Иле Танев, кој во завршните зборови побара неговиот клиент, обвинетиот Ѓоргиевски, да биде ослободен од за убиството на Денис Тот.
Според него, начинот на извршување на кривичното дело е најспорниот елемент, па затоа бара ослободување од вина.
„Нема кривично дело убиство бидејќи Анџело Ѓоргиевски не презел дејствија кои би биле во целост исполнети законското битие кое му се става на товар со обвинителниот акт. Наспроти тезите на ЈО дадени во обвинителниот акт и анализата на доказите, како бранител, трудејќи се да го следам хронолошки и аналитички обвинителниот акт, следејќи ги сите дејствија на главата расправа, образложувајќи го предлогот за обвинителна пресуда, ќе настојувам да ве убедам во оправдувањето на предлогот за ослободителна пресуда и недокажаност на обвинителниот акт во поглед на кривичното дело кое му се става на обвинетиот“, кажа адвокатот Танев.
Тој смета дека двата удара на Анџело кон Денис Тот не довеле до негова смрт.
„Од сето ова ни се наметнуваат прашањата дали овие евентуални два удара и падот на оштетениот, сега покојниот Денис Тот, до коишто дошло како резултат на тие удари, довеле до нанесување повреди кои би довеле смрт на оштетениот. Одговорот од доказите е секако – не. Дали во умислата на обвинетиот е содржано делото кое му се става на товар? Одговорот е – не. И трето, дали има соизвршителски дејствија на Анџело Ѓоргиевски со другите обвинети? Одговорот е – не. Дека ваквата теза на обвинителството е во најмала рака тенденциозна, изборот на правната квалификација – несоодветен и истиот сметам дека е даден под притисок на јавноста и тезата на обвинителство е правно неиздржана.
Обвинителството со никаков доказ во прилог на обвинителниот акт не ја докажа причинско-последичната врска со двата удари на обвинетиот со смртниот исход“, додаде Танев.
Адвокатот кој го брани првообвинетиот Анџело Ѓоргиевски посочи: „Ќе го убедам судот дека дејствијата преземени од него не се такви тој да биде огласен за виновен за кривичното дело за кое се товари“.
За Танев, умислата е најнедокажана, а мора да ја има, за да се докаже извршување на кривичното дело убиство.
„Тие се запознале дента во локалот ‘Две капки’. Немал мотив, а уште помалку умисла да го повреди Денис Тот. Според обвинителството, настанала кратка расправија кога оштетениот влегол во возилото. Доколку оштетениот не влегол во такси-возилото, каде не бил ни повикан, ниту требало со него да замине од дискотеката, немало да дојде до настанот. Неспорен е фактот дека оштетениот покажал агресивност и бил во видна алкохолизирана состојба и дека тој факт имал придонес во следат на немилиот настан“, додаде адвокатот на првообвинетиот Анџело Ѓоргиевски.
Тој ги анализираше сите докази во завршниот збор, како и исказите на сведоците.
Според адвокатот, обвинетиот противправно дејствувал само десетина секунди, што според него, е уште еден доказ дека тој немал умисла да го убие Денис Тот.
„Во овој дел на умислата, посебно за Анџело, сите понатамошни постапки и преземени дејствија биле во насока на намалување на штетната последица. Тоа е неспорно и од самите снимки и од исказите на сведоците. Откако паднал оштетениот, Анџело не презема никакво дејствие со удари, туку неговите дејствија се за да му се помогне на оштетениот, а не да се повреди или убие. Тој помагал при реанимација со масажа на срце, што значи презел дејствија на реанимација, а не во насока за довршување на делото кои му се ставаат на товар од Обвинителството“, додаде адвокатот.
Тој посочи дека ударите од Анџело Ѓоргиевски не се причина за смрт на Денис Тот.
„Од ударите и падот на оштетениот и ударот од падот, како и резултатот од повредата – нема ниту една тешка телесна повреда која сама по себе или севкупност ќе доведе до смртна последица“, кажа адвокатот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Елитната полициска единица ЕБР прослави 24 години постоење

Со свечена церемонија вечерва на градскиот плоштад во Кавадарци беше одбележан 23 август – Денот на Единицата за брзо распоредување (ЕБР) и 24 години од формирањето на оваа елитна полициска единица при Министерството за внатрешни работи. Настанот се одржа во присуство на премиерот Христијан Мицкоски, раководството на МВР, министри, пратеници, претставници на институциите и локалната самоуправа, полициските синдикати, како и семејства на загинати и починати припадници на ЕБР.
Граѓаните на Кавадарци имаа можност да се запознаат со опремата на единицата преку концептот „До вас, за вас“ и да се дружат со припадниците на полицијата.
Министерот за внатрешни работи, Панче Тошковски, во своето обраќање истакна дека ЕБР е симбол на сигурност и доверба, формирана врз темелите на професионализам, пожртвуваност и верност кон државата.
„Во изминатите две и пол децении, ЕБР се втемели како симбол на сигурност и брза реакција, вистински штит на државата и граѓаните. Ниту еден припадник не се двоуми да преземе одговорност и да дејствува во најризични ситуации, каде што секунда одлука може да значи спас на човечки животи“, порача министерот Тошковски.
Тој додаде дека токму оваа единица има незаменлива улога во борбата против криминалот и корупцијата.
„Разбиени се опасни криминални групи, расветлени стотици дела, запленета е дрога која ќе завршеше кај младите, спречени се илјадници обиди за нелегален влез во државата. Дојде време да покажеме дека државата е посилна од криминалот и дека институциите ја враќаат довербата кај граѓаните“, истакна Тошковски.
На свеченоста зборуваа и досегашниот командант на ЕБР, Зоран Јанаќијев, кој даде свое видување за иднината на единицата, како и градоначалникот на Кавадарци, Митко Јанчев, кој ја поздрави иницијативата „До вас, за вас“.
Беа доделени плакети на најистакнатите припадници на ЕБР, а претходно во текот на денот беше положено свежо цвеќе пред спомен-обележјето во чест на загинатите херои на единицата.
Македонија
„Корумпираната држава ни ги украде децата“, потресни сцени на маршот во Кочани

Родителите, семејствата и пријателите на младите кои трагично ги загубија животите во пожарот во дискотеката „Пулс“ повторно одржаа марш во Кочани. Повторно се гледаа солзи, тишина и болка, а поворката ја следеа фотографии на загинатите кои нивните родители ги носеа во рацете.
„Корумпираната држава ни ги украде децата. Корупцијата ни го одреди местото каде да ги славиме нивните родендени – на гробиштата. Ни го украдоа сонот, ни ја скратија иднината, а болката ја претворија во наша секојдневна реалност. Бараме правда за нашите деца, бараме крај на корупцијата“, пишуваше на еден од транспарентите.
Слична порака се појави и на друг транспарент: „Моето дете умре, беше убиено од систем кој не штити, туку убива.“
Особено емотивен момент предизвика Мита Тасева, мајката на загинатиот диџеј Стефан Тасевски, чиј роденден се совпадна со маршот.
„Денес небото одекнува од твојата музика, синко наш. Слави го роденденот со ангелите“, порача таа, оставајќи длабока тишина меѓу присутните.
„Ние, родителите, скапо го плативме данокот на корупцијата“, стоеше напишано до фотографиите на младите кои повеќе не се меѓу живите.
Овој марш уште еднаш ја отвори болната тема за безбедноста, одговорноста на институциите и вечната битка на родителите – правдата за своите деца.
Македонија
Сајкоски: Собранието е дом на граѓаните, законот за финансирање донесе нова поддршка

На денешниот Саем-Отчет „4 години работа за тебе“ учествуваше генералниот секретар и пратеник на ВМРО-ДПМНЕ, Ѓорѓија Сајкоски, кој порача дека Собранието останува клучен претставнички дом на граѓаните и преку носење квалитетни закони работи за подобрување на нивниот живот.
„Собранието претставува претставнички дом на граѓаните и со самото тоа се труди најмногу да врати на граѓаните преку носење на квалитетни закони, подобрување на законите и сè она што во делот на локалната самоуправа треба да се направи, за да се подобри таа легислатива“, изјави Сајкоски.
Тој посочи дека изминатата година биле донесени суштински закони кои овозможиле на општините дополнителни средства за реализација на значајни проекти. Како пример го наведе законот за финансирање на локалната самоуправа, преку кој општините добиле повеќе средства за развој.
„Собранието донесе и закон за заем со кој се овозможија средства на секоја општина, што до сега не било. Вкупно 80 општини добија поддршка од Владата за да реализираат проекти. Овие проекти што сега се спроведуваат се суштински и неопходни за граѓаните“, истакна Сајкоски.