Македонија
Адвокатот на Боки 13 очекува да паднат и оставки: Никој не е толку црн за да го доведете во животозагрозувачка состојба

Адвокатот Владимир Туфегџиќ, бранител на Бојан Јовановски-Боки 13, за „Макфакс“ посочува дека очекува оставка од неколку лица што во изминатиот период одлучувале по однос на барањето за прекин на казната. Туфегџиќ посочува дека токму тие што одлучувале и го оставиле Боки 13 во „Идризово“ со влошено здравје треба да сносат одговорност. Осудениот денеска е хоспитализиран и во болница, каде што треба да му биде извршена операција.
„Реално, лично очекувам морален чин на оставка од неколку лица што постапувале и одлучувале во изминатиот период бидејќи ниту еден осуденик не е до толку црн за со своето постапување дополнително да го казнувате и да го доведете во животозагрозувачка состојба, а сето тоа можело да се одбегне“, вели Туфегџиќ за „Макфакс“.
Тој додава дека докторите и тој како адвокат алармирале дека може да се избегнат овие последици ако Боки 13 бил третиран во согласност со насоките од докторите.
„На овие последици врз животот и здравјето на осуденото лице во изминатите 7 месеци предупредуваа лекарите специјалисти од областа и јас како бранител. Укажуваа како и на кој начин да се одбегнат тешките последици врз животот и здравјето на лицето и сите укажувања се составен дел од списите на предметите водени во Основниот кривичен суд Скопје и Управата за извршување на санкциите.
Во конкретниот случај надлежните органи што постапувале однапред знаеле за здравствената состојба, биле свесни за настапувањето на последиците, кои извесно може да настанат, па оттаму оправдано е барањето за одговорност упатено од семејството“, додава Туфегџиќ.
Утринава, правниот тим на Боки 13 посочи дека тој е хоспитализиран во болница. По правење на проверките, тој ќе биде и опериран, соопштија тие.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од следната недела забрана за камиони над 15 тона на државните патишта за време на викенди и во денови со екстремно високи температури

Од 1 јули до 31 август на државните патишта во Македонија се воведува летен времен режим на сообраќај со кој се забранува движење на тешки товарни возила со вкупна маса над 15 тони, за време на деновите од викендот и за денови при екстремно високи температури,извести Авто-мото сојузот на Македонја (АМСМ).
Збраната ќе важи во термините:
петок од 17:00 – 22:00 часот,
сабота од 09:00 до 18:00 часот и
недела од 09:00 до 22:00 часот.
Во деновите со екстремно високи температури, определени од Министерство зa здравство, забранaта ќе важи и од понеделник до четврток во период од 11:00 до 17:00 часот.
Ограничувањето не се однесува на возила кои превезуваат животни, цвеќе, хуманитарна помош, жито и житни култури и леснорасиплива стока, нафта и нафтени деривати, превоз на опасни материјали и возила кои вршат превоз за компании кои имаат склучено договори за изведување на проекти на државните патишта со Јавното претпријатие за државни патишта.
На магистралниот пат А2 делница: Скопје – Охрид – Скопје (со важност до 01 септември) се забранува движење на тешки товарни возила чија вкупна маса преминува 7,5 тони за време на викендите, во следните интервали:
петок од 15:00 – 22:00 часот,
сабота од 07:00 до 12:00 и од 18:00 до 24:00 часот и
недела од 07:00 до 22:00 часот.
Од АМСМ велат дека овој посебен режим на сообраќај се воведува во текот на летото со цел избегнување на застојот во сообраќајот на патната делница кон најпосетуваното туристичко место во Република Македонија, намалување на застоите на пунктовите за наплата на патна такса и воопшто побрз проток на возилата и непречено движење на туристите.
И ова ограничувањето не се однесува на возила кои превезуваат живи животни, цвеќе, хуманитарна помош, жито и житни култури и леснорасиплива стока.
Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.