Македонија
Адвокатот на Камчев: Ова е срамота, ние ќе го штитиме до крај

Тони Менкиновски, адвокат на Јордан Камчев, по завршување на расправата во судот и одредување на 30-дневниот притвор на неговиот клиент, посочи дека нема докази дека тој ќе избегал.
Менкиновски го претстави Камчев како деловен човек кој во време на пандемија се грижи за здравјето на луѓето и инвестира, а државата му одредува притвор. Адвокатот образложи дека обвинителката Лиле Стефанова која побара притвор, не може да биде обвинител бидејќи против нејзе има кривична пријава за злоупотреба на службена положба и овластување поради тоа што, како што кажа, земала поголема плата и според решение е обвинител во Радовиш, без мандат.
„Има информации дека се подготвува за бегство, тоа треба да го докаже Обвинителството. Нема евидентен доказ дека господин Камчев ќе ја напушти Македонија. Напротив инвестира во ова време на пандемија, во отворање на нови одделенија, вработување на нови доктори, има деловни потфати во Македонија за јавно здравје и здравјето на луѓето, а имате одлука на нашиот суд за 30-дневен притвор. Не ни беа презентирани документите од АНБ, судијата не ни го даде решението туку даде записничарката. Најверојатно му беше срам да не погледне во очи. Ние ќе го штитиме до крај господинот Камчев. Самиот судија е контрадикторен во решението, нема да го учам јас на занает. Тој требаше да ги укине другите мерки и да определи притвор, а тој напиша само дека го уважува предлогот. Решението е донесено врз база на ‘ќе’, ‘ќе избега’, а треба да имате докази“, рече адвокатот Тони Менкиновски.
Тој објасни дека на Камчев, лицата кои го приведувале му кажале дека тој е лишен од слобода поради „изборни измами“, а кога стигнале во судот, им кажале сосема друго.
„Ова е садизам. Судските одлуки се почитуваат, но не значи дека не треба да се толкуваат. Јордан Камчев беше утринава лишен од слобода поради кривично дело изборна измама. А сега, сосема поинакво образложение, од страна на ОЈО-ГОК, на обвинител од Радовиш, кој побара Јордан Камчев поради некаква индиција на БНБ, да му се определи мерка притвор. Сите мерки, во овој предмет кој трае надвор од законскиот рок за истрага, повеќе од 30 месеци без обвинение, сите мерки се исполнети. Се работи за права и слободи и нивно флагрантно кршење од страна на политички актери на дневно-политички цели. Ова е срамота, двата пасоша се во овој суд, мерки за обезбедување од страна на капиталот на господинот Камчев, кој вработува 3.000 луѓе се изречени, истрагата не е завршена, тој сеуште е осомничен – а само по некоја дојава тој доби 30-дневен притвор. Многу ми е жал, но јас се надевам дека за многу брзо дека оваа мерка ќе биде санкционирана од страна на Европскиот суд за човекови права. Не се образложува во образложението која е причината, ниту се даваат објаснувања зошто Камчев треба да оди во притвор“, додаде Менкиновски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Феликс бил убиен зошто мавтал со опашката, велат активистите

Убијците на Феликс денес во судница се осмелија да го наречат неговото радосно мавтање со опашката – напад. Снимка на која куче радосно им приоѓа ја користат како алиби за злосторството и доказ дека било агресивно. Крвникот Љубе Крстевски се појавува на само едно од шесте презентирани видеа и Феликс не се ни доближува до него, велат од Граѓанската иницијатива Зелен хуман град.
„Тврдат дека љубопитност и приврзаност се причина за ѕверска ликвидација. Каква болна логика. Ако едно животно секојдневно ти приоѓа со доверба, тоа значи дека заслужува да биде убиено? Толку се бедни, што ова „доказно видео“ не им го доставиле на обвинителството и на адвокатката. Но не зашто е доказ за „агресијата“ на Феликс, напротив, зашто е неосновано и зашто сакаат да го манипулираат процесот зад затворени врати“, велат активистите.
Додаваат дека убивањето на невино животно што им верува на луѓето е злосторство што не може да се сокрие зад евтини извитоперени конструкции.
„Ја повикуваме судијката Лидија Петровска да изрече максимална затворска казна за убиецот Љубе Крстевски и неговиот соучесник Бранко Билбиловски. Тие не само што не се каат, туку тврдат дека Феликс „сам си го барал“ да го убијат“, велат од Зелен хуман град.
Македонија
Поради несовесно работење на судија, осуденик почнал да издржува затворска казна со задоцнување од една година

Основното јавно обвинителство Велес поднесе обвинителен предлог против едно лице за кривично дело – Несовесно работење во службата.
Обвинетиот, во текот на 2024 година, додека извршувал функција судија за извршување санкции во Основниот суд во Кавадарци со умисла несовесно постапувал во предмет за извршување затворска казна за еден осуден.
Затворската казна од 3 години и 8 месеци била изречена со правосилна пресуда на Основниот суд во Гевгелија. Меѓутоа, обвинетиот судија, иако примил известување за пресудата на 05.04.2024 година, првиот пат упатниот акт го изготвил со задоцнување и осудениот го упатил на издржување на затворската казна во КПУ Гевгелија, наместо во КПУ Идризово – Скопје согласно висината на изречената казна.
Потоа, откако гевгелискиот затвор известил дека казната не може да се издржува во таа установа, судијата за секоја одлука што ја носел во предметот ги пробивал законските рокови, се до 04.06.2024 година кога добил известување дека осуденикот не се јавил на издржување на затворската казна во Идризово.
Иако согласно закон бил должен во таква ситуација во рок од 24 часа да издаде наредба до МВР за приведување на осуденото лице, обвинетиот судија тоа го направил дури на 07.06.2024 година.
По распишана централна потетница, осуденото лице било пронајдено и лишено од слобода, и започнало да ја издржува затворската казна речиси една година подоцна, на 11.03.2025 година наместо во април 2024 година.
Македонија
Сиљановска-Давкова: Прашања поврзани со идентитетот или билатералните спорови не треба да ја попречуваат интеграцијата

Претседателката Гордана Сиљановска-Давкова се обрати на работниот ручек со амбасадорите на земјите-членки на Европската Унија во земјава, по повод завршувањето на полското претседавање со Советот на ЕУ.
Сиљановска-Давкова потсети на дведеценискиот македонски интегративен пат од добивањето на кандидатскиот статус, неправедните политички пречки коишто го кочат напредокот и ја поткопуваат јавната доверба во процесот на проширување во ЕУ.
Таа укажа на последните истражувања на јавното мислење во земјава коишто покажуваат зголемена недоверба во политиката на проширување, дури и кај младите луѓе.
Претседателката предупреди на штетноста од билатерализацијата, посочувајќи дека ирационалните прашања поврзани со идентитетот или билатералните спорови не треба да ја попречуваат интеграцијата.
Нагласувајќи дека застојот носи далекусежни ризици и го прави нашиот регион ранлив, таа оцени дека со поткопувањето на стабилноста на Западниот Балкан се загрозува и стабилноста на Европа во целина. Европската интеграција, според претседателката, не е само политичко прашање, туку и геополитички и безбедносен императив.
Сиљановска-Давкова го реафирмираше барањето да се движиме напред врз основа на заслуги, како и секоја друга земја-кандидат.
Охрабрувачки, според неа, е што данското претседателство препознава дека понатамошното проширување на ЕУ е геополитичка неопходност. Таа нагласи дека е добро што Данска планира да го води процесот на проширување преку континуиран политички дијалог и во согласност со Копенхагенските критериуми и пристап базиран на заслуги.