Адвокатот Еленко Миланов, бранител на обвинетиот ексминистер за транспорт и врски, Миле Јанакиески, во случајот ТНТ, бара во име на неговиот клиент прислушуваните разговори и транскрипти да не бидат дел од листата на докази. Тој наведе дека бара бомбите да не бидат докази поради тоа што предметот не го застапува обвинител од СЈО, туку од Основното јавно обвинителство.

Миланов е дециден дека ќе се докаже оти Јанакиески како минисер за транспорт и врски немал ингеренции и надлежности за да може да го изврши делото што му се става на товар.

„Ќе ви докажеме и ќе ве увериме преку содржината на доказите дека обвинетиот Миле Јанакиески со функцијата што ја имал како министер немал ингеренции и надлежности во она што овде му се става на товар. Овој суд по воведните говори и актуелната состојба на застапување на ова обвинение од обвинител од ОЈО треба и мора да одлучи во однос на законитоста на доказите од листата на докази на Обвинителството, а тоа се транскрипти и разговори доставени на ЦД, со оглед дека во конкретниот случај не постапува јавен обвинител од СЈО, кој единствено може да ги користи тие докази, без оглед на разликите на кој начин и во каква форма им се даде во тој момент да може да ги користат. Сметам дека сите разговори што ги изведовте во минатата постапка, транскриптите од нелегалното следење на комуникациите, треба и мора во овој момент да ги отстраните од списите на предметот или воопшто почнувањето на воведните говори да ги одложите до моментот кога ќе биде донесен законот за ЈО во нова форма, па евентуално врз основа на решенијата што ќе бидат официјални да може да одлучувате во однос на ваквиот предлог. Ќе докажеме дека единствениот документ, кој во смисла на овој обвинителен акт е потпишан од Миле Јанакиески, е одлука по жалба на оние што се наведуваат како оштетени во оваа постапка“, рече Миланов.

Адвокатот побара да се одложи рочиштето на кое се даваат воведните говори поради одново почнување на постапката сè додека не се донесе законот за ЈО во нова форма.

Димитар Дангов како втор бранител на Јанакиески, како и неговиот колега Миланов, посочи дека треба да се одложи рочиштето за ТНТ сè додека не се постави нов надлежен јавен обвинител.

„Во овој момент не постои овластен јавен обвинител или тужител што може да го застапува обвинението за ТНТ. Со почит кон колегата Бурим Рустеми, тој едноставно не е надлежен да биде присутен овде“, рече Дангов.

Предметот ТНТ се однесува на уривањето на објектот „Космос“ на бизнисменот Фијат Цановски. Освен Јанакиески, обвинети се и ексградоначалникот на Гази Баба, Тони Трајковски, и поранешниот премиер Никола Груевски.