Македонија
Академици ги пцујат и навредуваат вработените што штрајкуваат за поголеми плати во МАНУ, Дејановски најави дека ќе ги објавува со име и презиме

Вкупно 36 вработени во техничката служба во Македонската академија на науките и уметностите (МАНУ) го активираа штрајкот ставен во мирување во март 2023 година кога беше договорено до крајот на годината платите да им бидат покачени. Бидејќи и девет месеци по истекот на рокот платите не им се покачен, вработените ќе штрајкуваат на работните места и нема да извршуваат никакви работни задачи, со исклучок на архивата, која ќе прима пошта, сè до исполнување на единственото барање за покачување на платите. Лабораторијата во МАНУ нема да биде загрозена од штрајкот оти половина од вработените не се челнови на Синдикатот на работниците од управата, правосудните органи и здруженијата на граѓаните (УПОЗ) и не штрајкуваат.
Трпе Дејановски, претседател на Синдикатот на УПОЗ, ги обвини академиците и раководителите во МАНУ за притисок врз вработените да го спречат штрајкот.
„Академиците, наместо да седнат и да преговараат со Синдикатот, тие од периодот кога се активира штрајкот најмија адвокатска канцеларија преку која се одвива комуникацијата со вработените и која има една единствена задача, а тоа е да ги заплаши вработените и да најде начин како да го забрани штрајкот. Исто така, некои од академиците, раководителите на организациските единици при МАНУ, кога беше најавено активирањето на штрајкот, веднаш почнаа со закани кон вработените дека ќе бидат избркани од работа, а одредени раководители со пцости и навреди почнаа да им се обраќаат на вработените, што не им прилега на титулата академик. Да им порачам дека секој што ќе врши притисок и ќе се заканува, ќе биде објавен со име и презиме, без разлика за кого станува збор и каква функција извршува во МАНУ“, рече претседателот на УПОЗ, Дејановски.
Тој јавно го потсети раководството на МАНУ дека со спогодбата, со која во март 2023 година штрајкот беше ставен во мирување, тие презеле обврска до 31 декември 2023 година да ги зголемат платите на вработените. Но, наместо поголеми плати за техничката служба, тие ангажираат адвокатски канцеларии и бараат надворешни ресурси од фирми што ќе ги заменат вработените.
„Се ангажираат адвокатски канцеларии, кои за неполн час давање совети наплаќаат половина од средствата за плата на повеќето од овие вработени. Наместо да настојуваат за добивање средства за достоинствени плати како во другите високообрзовни институции во државата, не се бараат овие средства, а се обезбедуваат пари во потребен износ за други исплати кон други вработени во МАНУ и за академиците. Да биде притисокот уште поголем за секого од нас, веќе се донесени одлуки за ангажирање надворешни ресурси од фирма, која би требало да ги замени вработените, а некои од нив веќе почнаа да извршуваат работни задачи“, рече синдикалецот Дејановски.
Претседателот на Синдикатот на МАНУ, Блажо Вујовиќ, кажа дека најниската плата во МАНУ е 21.700 денари, а другите се 50 отсто помали во споредба со платите во другите научни институции. Токму поради ниските плати, во последните 15 години Вујовиќ вели дека нема пријави на огласите за вработување.
Во решавањето на проблемот со платите, од МАНУ побараа да се вклучи и Собранието како основач на институцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.