Македонија
Ако не се гради зградата во Реонски центар, Акционерското друштво ќе има значителна штета

Акционерското друштво за изградба и стопанисување со станбен и деловен простор не отстапува од намерата да ја изгради планираната зграда на последната слободна парцела меѓу веќе изградените згради во Реонски центар Аеродром. Граѓаните бараат државата да се откаже од градба и слободната парцела да биде паркинг, но од акционерското друштво укажуваат дека тоа не им е исплатливо.
„Доколку не се пристапи кон градба на споменатиот станбен објект, согласно утврдените рокови во споменатото одобрение, друштвото ќе се соочи со претрпување на значителна финансиска штета“, изјави за „Макфакс“ Кристијан Трајковски, директор на Акционерското друштво.
Тој нагласува дека изградбата на станбениот објект во Реонски центар Аеродром, Општина Аеродром каде како инвеститор се јавува Акционерското друштво за изградба и стопанисување со станбен и деловен простор од значење на Републиката, е согласно правосилното одобрение за градење Бр.уп.1-18-130 од 09.11.2016 издадено од Општина Аеродром согласно важечките прописи на постоечкиот Детален урбанистички план (донесен јуни 2009 година со тех.бр. 1474/06).
„Акционерското друштво за изградба и стопанисување со станбен и деловен простор од значење на Републиката, почитувајки ги сите важечки законски прописи, отпочна изградба на станбен објект кој е дел од низата на околни објекти кои се претходно изградени од наша страна, а согласно важечкиот Детален урбанистички план и сите законски прописи кои произлегуваат од Законот за градење. “, вели директорот Трајковски.
Акционерското друштво веќе утврдило и цена на квадратен метар за продажба на становите во зградат која допрва треба да се изгради.
„За споменатата локација, заинтересираните граѓани становите можат да ги откупат по цена од 795 евра плус ДДВ за квадратен метар, плус предвидената цена за гаражно место кое е задолжително при откупот на секоја станбена единица“, објаснува директорот Трајковски.
Градилиштето за оваа зграда беше оградено во март година кога жителите од околните објекти уште еднаш ги активираа старите барање – на парцелата да не се гради зграда туку да се изгради паркинг. Се надеваа дека државата како сопственик на акционерското друштво и Општината ќе најдат решение за да се постапи по барањата на граѓаните. Претставници на граѓаните имаа неколку средби со претставници од Општината и од Акционерското друштво, но и покрај тоа вчера, по осум месеци прекин, изградбата на зградата продолжи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Завршен првиот дел од санацијата на хидросистемот Ѓавато, кој повеќе од 4 години беше со пробиени цевки

Заврши првата фаза на санирање на хидросистемот Ѓавато. Бунарскиот дел е комплетно завршен, пуштена е водата и нема никаде протекување, објави премиерот, Христијан Мицкоски.
Тој додаде дека останува уште една интервенција на цевката за испуст и со тоа ќе бидат дуплирани количините вода кои ќе се влеваат во Дојранското езеро.
„Каква беше состојбата пред интервенцијата? Повеќе од четири години пробиени цевки на двата функционални бунари. Потрошени повеќе од половина милион евра за електрична енерија, а ефектот минимален или никаков. Два функционални од десет направени бунари. Негрижа и срам. Во втората фаза ќе обезбедиме најмалку уште две бунарски пумпи за зголемен капацитет и побрзо полнење на Дојранското езеро. Владата во втората фаза ќе го задолжи ФОД при ЕСМ (поранешно ЕЛЕМ) да ги репарира постојните потисни пумпи. Конечно во последната трета фаза ќе инсталираме сончеви панели со батерии за акумулирање на електричната енергија и сопствено производство на електрична енергија. Нема трошење милиони евра од буџетот за електрична енергија“, напиша Мицкоски.
Македонија
СДСМ ги објави имињата на уште 11 кандидати за градоначалници

Попладнево се одржа седница на Извршниот одбор на СДСМ. Членовите донесоа одлука со која е дадена согласност за кандидатури за градоначалници во уште 11 општини низ државата:
1. Бутел – Оливера Ливриниќ
2. Велес – Маја Хеско
3. Гевгелија – Миле Атанасов
4. Делчево – Дејан Глинџарски
5. Демир Капија – Лазар Петров
6. Конче – Благој Илиев
7. Кратово – Влатко Спировски
8. Кривогаштани – Игор Каравиловски
9. Македонски брод – Ивица Стојковски
10. Ранковце – Даниел Крстевски
11. Старо Нагоричане – Далибор Трајковски
„СДСМ јасно ја потврдува својата подготвеност да понуди силни, чесни, квалитетни и докажани кандидати за претстојните локални избори кои ќе работат во интерес на граѓаните и напредок на општините’“, соопштија од партијата.
Македонија
Гужва на границите: на Богородица и Табановце се чека по 40 минути

Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, информира АМСМ.
На ГП Богородица времето на чекање за влез е околу 40 минути, на ГП Дојран времето на чекање за влез е околу 20 минути, на ГП Табановце времето на чекање за излез е околу 30 минути, додека пак на останатите граничните премини од македонска страна нема подолги задржувања за влез и излез од државата.
Од денеска од 05:00 часот регионалниот пат Р-1106 Нова Брезница – Македонски Брод преку националниот парк Јасен ќе биде пуштен за сообраќај во термините од министерство за внатрешни работи. Се препорачува внимателно возење, почитување на сигнализацијата и прилагодување на брзината поради можни одрони на патот.