Македонија
Активисти: СЈО да ги истражи подземната сообраќајница и комплексот на „Лимак“

Активистите од „Во одбрана на Дебар Маало“ ги повикуваат истражните органи, вклучително и специјалното јавно обвинителство, да поведат истрага за изградбата на подземната улица и комплексот кај Старата железничка станица, каде што инвеститор е турската компанијана „Лимак холдинг“. Од иницијативата велат дека со двата проекта компанијата го оддалечува Скопје од исполнување на европските стандари за урбано живеење.
„Компанијата ‘Лимак’ не само што со овој проект ќе го претвори центарот на градот во неподносливо место за живеење туку воспоставува пракси на водење бизниси, кои се веќе видени во Турција. Имено, последниве 15 години ‘Лимак’ профитира од сомнителни зделки со владејачката партија во Турција и нејзиниот лидер Реџеп Таип Ердоган. Значи, ‘не’ за ердоганизација на градот, а „за“ за европско Скопје“, велат од иницијативата „Во одбрана на Дебар Маало“, кои потсетуваат дека проектот ќе вклучува речиси 1.000 стана во 20-катници, со канцеларии, трговски центар, хотел, простор за слободни културни активности, каде што ќе биде сместен Музејот, ќе има места за јадење и пиење, фитнес-центар, казино и паркинг со капацитет за 2.000 автомобили“.
Официјалниот почеток на градење го поздравија премиерот Зоран Заев, вицепремиерот Кочо Анѓушев и градоначалникот Петре Шилегов. „Лимак“ уште еднаш пред нив го претстави целиот проект, кој предвидува целосно урбанизирање на просторот околу Јужен булевар.
Комплексот ќе вклучува 772 стана во 20-катни згради, трговски центар, хотел, ресторани, кафулиња, фитнес-центар, казино и паркинг со капацитет за 2.800 автомобили.
Изградба на подземната сообраќајница ја најави и ексградоначалникот на Скопје, Коце Трајановски, во 2012 година. Тој го обврза инвеститорот првин да ја изгради подземната сообраќајница, а потоа да го гради комлексот. Но, Турците вчера се пофалија дека во напредна фаза е изградбата на комплексот над земјата, а подземната сообраќајница допрва ќе се гради.
„Лимак“ го купи земјиштето во 2012 година. За плацот кај Старата железничка станица, со површина од 10.000 квадрати, Турците платија приближно половина милион евра, а за парцелата од 30.000 квадратни метри над планираната подземна улица платија речиси 3,2 милиони евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
(Видео) Храбри полицајци гаснеа пожар во Бутел и завршија во болница, Костовски најави награда

Двајца полицајци од полициската станица Бутел денеска покажаа вистински херојство откако ги ризикуваа свои животи за да помогнат во гасењето на пожар кој се закануваше на детска градинка и училиште во општината. Дарко Стајковски и приправникот Филип Стојчевски, при интервенцијата вдишале јаглерод моноксид, поради што се пренесени на Клиниката за токсикологија во Скопје.
За среќа, лекарите потврдуваат дека нивната здравствена состојба е стабилна и дека се под постојан медицински надзор.
Градоначалникот на Бутел, Дарко Костовски, ја поздрави нивната храброст и најави дека општината ќе ги награди.
„Секоја чест за Дарко и Филип! Ова е вистински пример за пожртвуваност и љубов кон заедницата. Благодарение на нивната брза реакција спречена е голема трагедија и спасени се животи. Општината Бутел ќе се погрижи нивниот чин да не остане незабележан“, изјави Костовски.
Во гаснењето на пожарот учествуваа и други екипи, за кои градоначалникот додаде дека исто така ќе бидат соодветно наградени.
Скопје
(Видео) Вистинска драма кај „Борис Трајковски“, евакуација на публика, 9 полицајци завршија во болница

Попладнево околу 16 часот во близина на Спортскиот центар „Борис Трајковски“ во Скопје изби пожар кој предизвика паника кај учесниците и посетителите на меѓународниот ракометен турнир. Благодарение на брзата реакција на полициските службеници и противпожарните екипи, спречено е ширење на огнените јазици кон паркираните возила, околните објекти и лизгалиштето кое е во рамки на спортскиот комплекс.
Според информациите, полицијата извршила навремена евакуација на сите спортисти, спортски работници и публика, со што е избегната поголема несреќа.
Како последица на вдишаниот чад, девет полициски службеници завршија на Одделот за токсикологија каде им е укажана лекарска помош и се на кислородна поддршка. Од болницата информираат дека сите се во стабилна состојба.
Надлежните служби остануваат на терен за да ги утврдат причините за пожарот.
Македонија
„Марш на ангелите“: Кој ги штити виновниците, прашаа родителите во Кочани

Во Кочани денеска се одржа 20-тиот „Марш на ангелите“, тивок протест во спомен на жртвите од трагедијата во дискотеката „Пулс“. Родителите и семејствата на загинатите уште еднаш упатија силни пораки за правда, обвинувајќи дека институциите го штитат криминалот наместо младите животи.
Пред Полициската станица во Кочани тие порачаа дека системот потфрлил затоа што, како што рекоа, имало „заштитници и соучесници во униформа“. Тие побараа неселективна и транспарентна истрага, како и одговор од ОЈО ГОКК за тоа до каде е постапката против вработените во МВР.
„Зошто тие сè уште се на слобода?“ – прашаа родителите.
Маршот започна во 17:05 од „Паркот на револуцијата“, минувајќи низ центарот на градот и завршувајќи пред Основниот суд и Основното јавно обвинителство во Кочани. Таму семејствата порачаа дека нивната борба не е само за сопствените загубени деца, туку за секое дете во државата.
„Без независен и некорумпиран судски систем, вакви трагедии ќе се повторуваат. Нашите деца ги нема, но вие имате обврска да ја истерате правдата“, изјавија родителите.
Маршот, проследен со силен ветер, заврши со апел до институциите конечно да ја преземат одговорноста и да ја докажат вистинската правда.