Општина Македонски Брод има огромен потенцијал за развој, а во тој процес од голема помош е поддршката од Европската Унија. Ова беа само некои од ставовите на граѓаните на Македонски Брод со кои амбасадорот на ЕУ, Дејвид Гир, и полскиот амбасадор, Кшиштоф Гжелчик, вчера имааа отворена средба во Домот на културата. Полска е поврзана со Поречието преку етнологот и научник Јозеф Обребски, кој во минатиот век ги проучувал обичаите на жителите од овој регион, како и преку низа развојни проекти во општината, културна и образовна размена меѓу училиштата и преку неодамнешните економски инвестиции.

Во рамките на своите посети на општините во земјата, освен преку разговори со градоначалниците и советниците, амбасадорот Гир подобро се запознава со животот во локалните заедници токму од размислувањата и од искуствата на граѓаните. Гир и Гжелчик во Македонски Брод ја посетија и пештерата Пешна и имаа можност да ја разгледаат изложбата со фотографии од Обребски.

„Дојдовме во Македонски Брод за да се сретнеме со граѓаните, со Советот на Општината, со градоначалникот и со граѓанските организации и да ги ислушаме. Да разговараме за тоа што за нив е значајно, каков е животот тука и кои се нивните приоритети и предизвици. Дискусиите беа посветени на тоа каков тип инвестиции би можеле да се направат и како би можел регионот да се промовира. Несомнено, врвен приоритет би бил туризмот бидејќи ова е навистина прекрасно место, извонредно за планинарење, искачување и за истражување на пештерите. Преку оваа посета научивме многу и ќе продолжиме да изноаѓаме начини како би можеле да го поддржиме Македонски Брод, но и целата земја“, истакна Гир.

Во текот на посетата на Македонски Брод амбасадорите на ЕУ и на Полска во земјата остварија средба и со градоначалникот Жарко Ристески. Тие исто така се сретнаа и со членовите на Советот на Македонски Брод и со нив разменија мислења за тоа како ЕУ би можела да ѝ помогне на Општината. Значаен дел од посетата беше наменет за разговори со членови и со претставници на граѓанските организации, кои се посветени на активности чија цел е подобрување на животот во општината.

Во текот на отворената средба во Домот на културата граѓаните учествуваа во две активности: „Прашај ги амбасадорите“ и „Сподели ја твојата ЕУ-приказна“. Во рамките на овие дискусии граѓаните отворија низа теми кои се однесуваат на животот во Македонски Брод и како со поддршка од Европската Унија тој би можел да се подобри. Амбасадорот Гжелчик го сподели и полското 20-годишно искуство како земја членка на ЕУ и го дефинира како успешна приказна.

Некои од жителите се интересираа дали и како би можел да се зголеми буџетот за програмата „Еразмус плус“ преку која се поддржуваат проекти од областа на образованието. Тие исто така сакаа да дознаат дали постои можност и на кој начин би биле поддржани активности за руралните жени, односно за унапредување на нивните права и место во општеството. Дополнително, граѓаните искажаа интерес за учество на тренинзи преку кои би стекнале знаења за подготвување проекти финансирани од ЕУ, како и за аплицирање за добивање средства од фондовите на Европската Унија.