Македонија
(Видео) Амди Бајрам за ВМРО-ДПМНЕ: Магарето застанало на улица, па мораш малку да го боцкаш за да шета

Претседателот на Сојузот на Ромите, Амди Бајрам, ги повика ромските гласачи да излезат и да гласаат „за“ референдумот. „Да излеземе на тој ден што порано и што помасовно за референдумот да биде успешен“, порача Бајрам.
Според него, иако има партии што нема да го поддржат референдумот, народот и членовите на тие партии скришум ќе гласаат. Референдумот треба да успее, треба да се гласа, порача тој.
„Ромите во Македонија и за време на првиот референдум за самостојност на државата гласаа во најголем дел. Ромите во Македонија ги имаат сите права, тие се во преамбулата и во Уставот и ѝ се лојални на државата. Кога треба да се донесе некој закон, ние сме тука. Лојални политичари сме, секогаш застануваме на страната на државата. Секогаш даваме сè што можеме“, рече Бајрам.
Тој информира дека претседателството на Сојузот на Ромите заседавало и одлучило да го поддржи референдумот. „Ќе гласаме ‘за’. Тоа ‘за’ е за граѓаните, за македонските граѓани. Во тоа гледам ангажираност, едногласна одлука за работа. Сите Роми работиме заедно бидејќи се работи за сите нас, за НАТО и за стабилна држава, за да влеземе во ЕУ. Да излеземе што порано и помасовно тој ден за референдумот да биде успешен“, рече Амди Бајрам.
Запрашан за ставовите на опозицијата за претстојниот референдум за името, кој треба да се одржи на 30 септември, Амди Бајрам вели: „Јас не би ја коментирал ВМРО-ДПМНЕ, ама мислам дека при крајот ќе надвладее разумот кај челниците на оваа партија. Се работи за Република Македонија. Ние немаме друга држава. Цело време се работи на интеграцијата во НАТО и ЕУ. Знаете, магарето застанало на улица и не сака да шета, па мора малку да го боцкаш. Не е во ред да го бојкотираат референдумот, нека дадат повик да се гласа ‘за’ или ‘против’“, истакна тој.
Бајрам рече дека Сојузот на Ромите е веќе на терен. Тој очекува 47 илјади гласа „за“. Амди Бајрам апелира до политичите партии, невладините организации, сите да размислат за внуците и поколенијата, и да гласаат „за“ за Република Македонија да влезе во ЕУ и НАТО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.