Кој сè ќе може да побара амнестија од учесниците во настаните на 27 април, најверојатно, ќе биде познато в понеделник, кога во форма на предлог-закон за амнестија документот ќе биде доставен до Собранието. Иако најавите беа дека предлогот денеска ќе се разгледува од Интерпартиското тело за помирување, поради отсуство на поголем број пратеници состанокот ќе се одржи идната недела, а не се отфрла можноста тоа да се случи во понеделник пред почетокот на собраниската седница.

Во оваа насока се и тврдењата на премиерот Заев, кој рече дека Законот за амнестија, што веќе се дебатира, ќе се комплетира до крајот на оваа или почетокот на идната недела и со него јасно ќе се разграничи што значи учество во насилство, кревање рака, организација и осмислување упад во Собранието.

„Членовите во законот што ќе доведуваат до идно казнување нема да бидат тероризам со над 10 години казни, туку ќе бидат помали почетни казни. Но, казни ќе има. Со законот ќе се испрати пораката, казнувањето мора да постои, но и најважната порака е да нема мешање во правосудството“, ијави Заев.

Пратеничката Нола Исмајловска-Старова од независната пратеничка група од ВМРО-ДПМНЕ вели дека нацрт-законот сè уште се разгледува во пратенички групи и дека се прават консултации со правни експерти.

„Идеите што ги имаме веќе подолг период ги разменивме. Навистина е еден инклузивен процес, сега тоа што го правиме е консултација со правни експерти, секоја пратеничка група се консултира и кога ќе се закаже наредната средба на интерпарламентарната група за интеграција, реформи и помирување ќе ги размениме и тие заклучоци за крајното решение да го извлечеме најдоброто од сите дискусии што ги имавме досега“, рече Старова.

Според досегашните најави од работната група што го подготви, законот нема да ги опфати нарачателите, организаторите и насилниците од 27 април. Не беше прецизирано дали ќе се бара од обвинителството да прави преквалификација на делото „тероризам“ , но беше споменат членот од кривичниот законик што се однесува на здружување заради непријателска дејност, со кој се предвидуваат казни затвор од најмалку четири години.

Обвинителката Вилма Русковска вели дека воопшто не размислува за преквалификација на делото и дека не сака да лицитира додека не го види готово новото законско решение.

Според првичните сознанија, законот ќе опфати повеќе од 20 обвинети од 33-јца меѓу кои најверојатно ќе бидат и пратениците обвинети за крвавиот четврток.