Македонија
(Видео) Андов: Тешко изградивме единство за европска Македонија

Првиот претседател на Собранието на Република Македонија Стојан Андов, заедно со триесетина други пратеници од првиот парламентарен состав, повика граѓаните да излезат да гласаат на референдумот. Тој, како што рече, сега постои единство за идејата за европска Македонија за разлика од 1991 година кога единството многу тешко се градело.
– Тешко можеа Македонците меѓу себе да се усогласат, а уште потешко е што ние не можевме да го најдеме местото на сојузништво и со Албанците, па и со другите претставници на помалите етнички заедници кај нас, и тоа многу нè чинеше, за некои работи дури и луѓе изгинаа. Денес постои формално единство, единство на Македонците, на Албанците, на припадниците на другите помали етнички заедници, единство за европската идеја, Македонија да стане член на НАТО и ЕУ – рече Андов. Сите други работи, филозофии, не сфатиле оти единството ни е единствен излез, истакна Андов.
Пратениците порачаа дека ја искористиле историската шанса да ги удрат темелите на независна и суверена Македонија. Потсетија дека ја донеле декларацијата за независност, декларацијата за членство во ЕУ и НАТО, Уставот, како и одлуката за референдумот.
– Приемот во ОН беше условен со прифаќање на спогодбата со Грција и можевме да кажеме дека сакаме во ОН, но не со референцата ФИРОМ, меѓутоа каде ќе бевме сега? Не згрешивме, ги направивме вистинските чекори во вистинското време. Можете да ги почитувате или не СДСМ и Заев, ВМРО-ДПМНЕ и Мицкоски или ДУИ и Ахмети и сите други партии, но Македонија мора да ја сакаме. Вашите ставови за партиите искажете ги на избори, но ова е референдум – рече поранешниот пратеник Алил Џафероски.
Меѓу пратениците беа првиот претседател на Собранието, Стојан Андов, Петар Гошев, Тито Петковски, Васил Зимбаков, Мухамед Халили, Ѓулустана Марковска, Михаил Пановски, Исмет Рамадани и други.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода дел од скопски Карпош

ЈП Водовод и Канализација известуваат дека денеска ( четврток) поради изведување на водоводен приклучок од ф – 100 мм на ул. Осло бр. 15б, во периодот од 09.00 часот па се до завршување на работата, без вода ќе останат корисниците од ул. Осло. ( општина Карпош )
Македонија
Катерина Мирчовска именувана за нова директорка на болницата во Кочани

Катерина Мирчовска е именувана за нова директорка на болницата во Кочани, објави директорот на ФЗОМ, Сашо Клековски.
„Силно лидерство за болницата во Кочани!
Вчера за директорка на Општата болница Кочани е именувана Катерина Мирчовска, хирург. Веста помина штуро, со појаснување дека тоа е на барање на повредените од трагедијата за Кочани.
Катерина ја запознав низ работата за повредените од трагедијата во Кочани. Импресионира на прв впечаток. Полна со енергија, посветена, професионална, со големо срце, ги знае во детали сите најразлични потреби на повредените. Катерина се откажа од својот трансфер во ГОБ 8 септември Скопје за да се посвети на повредените“, објави Клековски на „Фејсбук“.
Тој додава дека Катерина е најдобар можен избор за водење на болницата во периодот на опоравување на повредените и ветува силно лидерство за болницата во овој критичен период.
Македонија
Меџити во Украина: Силно ја осудуваме руската агресија и бараме итно запирање на војната

Првиот вицепремиер и министер за животна средина и просторно планирање на Република Северна Македонија, Изет Меџити, денес учествуваше на Самитот „Украина – Југоисточна Европа“ што се одржа во Одеса, Украина.
Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.
Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.
„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, – истакна тој.
Вицепремиерот Меџити ја нагласи и посветеноста на земјата за продлабочена регионална соработка и изградба на безбедна, мирољубива и демократска Европа.