Главниот приоритет на ВМРО-ДПМНЕ и коалицијата е јавниот интерес, а јавниот интерес подразбира квалитетен, навремен јавен градски превоз. Но, дали ние во моментот имаме таков јавен градски превоз? Одговорот е не, вели советничката во Советот на Град Скопје од ВМРО-ДПМНЕ, Марија Андоновска, на денешната седница.

Андоновска истакна дека скопјани немаат соодветен јавен градски превоз, а останатите што не го користат се соочуваат со сообраќајниот хаос, посочувајќи дека сето ова е поради неспособноста на Арсовска и директорот на ЈСП да го решат проблемот.

Зошто? Затоа што и оние што го користат и оние што не го користат јавниот градски превоз ја гледаат реалната слика во моментот, а тоа е преполни автобуски станици, чекање на автобуси подолго од еден час, а од друга страна, блокиран главен град, приватни превозници што си ги бараат своите права затоа што Градот и ЈСП им должат, и немаат финансиски средства да си ги прехраната своите семејства. Значи, имаме граѓани што немаат јавен градски превоз онаков каков што имале и каков што заслужуваат и превозници што си ги бараат своите права. И повторно ќе повторам, нашиот интерес е овој проблем да се реши и нашето барање е да добиеме релевантни информации врз основа на кои ќе може да се донесе решение и да се деблокира градот. Граѓаните немаат јавен градски превоз бидејќи градот и ЈСП во моментот не се способни да го обезбедат тоа, рече Андоновска.

Андоновска ја отфрли изјавата на секретарот на Град Скопје, Зоран Глигоров, како неважечка и лажна кога рече дека немале време да ги достават информациите до советниците за тоа што точно се случува во ЈСП укажувајќи дека советничката група на ВМРО-ДПМНЕ и коалицијата уште пред два месеца со протестот на вработените во ЈСП барале и од Градот, но и од ЈСП, да се достави информација за тоа што точно се случува во ова јавно сообраќајно претпријатие, но до денеска не добиле никаква повратна информација.

„Приватните превозници побараа средба со сите советнички групи, на кои сите советнички групи се состанаа со приватните превозници и на тој состанок сите советнички групи добија одредена документација од страна на приватните превозници. Е, сега, истото тоа сакавме да го добиеме и од ЈСП за да видиме која е реалноста и да најдеме решение. Но, повторно ќе кажам – информации од ЈСП не добивме“, децидна е таа.

Андоновска уште еднаш упати апел до директорот на ЈСП и до Град Скопје да достават информација за тоа што се случува во ЈСП сѐ со цел да се изнајде соодветно решение во интерес на скопјани.