Македонија
Арсовска до Ѓорѓиевски: Функционалната неписменост на кадрите на ВМРО-ДПМНЕ предизвикува сериозни проблеми за граѓаните

Навистина е тажно да се читаат „соопштенијата“ на градоначалникот на Кисела Вода Орце Ѓорѓиевски кои изобилуваат со небулози и докази на функционална неписменост, пишува градоначалничката на Град Скопје преку соопштение, како реакција на претходниот повик на Ѓорѓиевски кој порача Арсовска да не се крие и да ги внесе приоритетите на скопските општини во буџетот за 2025 година.
„Имено, Ѓорѓиевски би требало да знае дека предлог-буџетот на град Скопје е доставен до советниците во Советот на град Скопје на разгледување во законски утврдениот рок пред седницата на која треба да се разгледува и усвојува. За жал, функционалната неписменост на кадрите на ВМРО-ДПМНЕ предизвикуваат сериозни проблеми за граѓаните на градот Скопје.
Што се однесува на меѓуопштинските соработки, Ѓорѓиевски по четири години мандат се уште нема научено дека таквата соработка ја одобрува Советот на градот Скопје. Оттука произлегува дека или советниците на ВМРО-ДПМНЕ не знаат да читаат, па по навика гласаат против на седниците на Советот на град Скопје или намерно ги блокираат меѓуопштинските проекти и соработка на градоначалниците од своите партиски редови.
На крајот, бидејќи неговиот шеф Мицкоски одбива телевизиска дебата, му предлагам на Орце Ѓорѓиевски во термин и на место кое нему му одговара да ги соочиме реализираните проекти од неговата програма, каде ќе биде евидентно дека и покрај целосна поддршка која ја има во советот на Кисела Вода сепак нема реализирано што ветил пред граѓаните. Вистината сепак е непријатна за ВМРО-ДПМНЕ“, вели градоначалничката на Град Скопје, во напишаниот допис.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре нестабилно време со врнежи и грмежи

Времето утре ќе биде променливо облачно и нестабилно со повремени локални врнежи од дожд и грмежи. Наместа процесите ќе бидат поинтензивни во форма на невреме со пообилен пороен дожд, грмежи, силен ветер и услови за изолирана појава на град. Минималната температура ќе биде во интервал од 8 до 12, а максималната ќе достигне од 18 до 25 степени.
Во Скопје, променливо облачно со повремен дожд. Попладне ќе биде нестабилно со пороен дожд, грмежи и засилен ветер. Минималната температура ќе се спушти до 10, а максималната ќе достигне до 25 степени, јавува УХМР.
До крајот на оваа седмица ќе се задржи променливо облачно и нестабилно време со повремени врнежи од дожд и појава на грмежи. Локално ќе има поинтензивни процеси во форма на невреме со пообилен пороен дожд, грмежи, силен ветер и изолирана појава на град.
Македонија
Пресудата е политички мотивирана, рече Јакимовски кој е осуден на три и пол години затвор

Градоначалникот на Општина Карпош, Стевчо Јакимовски е изненаден од пресудата со која е осуден на затворска казна од три и пол години.
Обвини дека се работи за политички мотивирана пресуда и најави жалба до Апелацискиот суд.
„Навистина сум изненаден од пресудата. Без никакви докази, на 100 отсто докази на наша страна дека немаме сторено кривично дело, носат пресуда со која ме осудуваат на четири години со единствена казна затвор на три години и шест месеци“, изјави Јакимовски.
Во насока на делото, Јакимовски изјави дека е осуден за легализација на две бараки кои биле монтажно-демонтажни и направени од гипс-картон, во согласност со сите стандарди, додавајќи и дека дека за времени објекти не може да се води кривична постапка.
Рече и дека Обвинителството се послужило со фалсификат кој бил докажан со вештачење, но судот не го зел предвид.
Македонија
Меџити: Владините институции континуирано превземаат мерки против загадувањето на воздухот

Во присуство на министри, заменици министри, ЗЕЛС, градоначалници, директори на управи и претсттавници на институциите, денеска под раководство на првиот вицепремиер и министер за животна средина и просторно планирање Изет Меџити се одржа координативен состанок за напредокот и постигнувањата во делот на спроведувањето на Акцискиот План за подобрување на квалитетот на воздухот и на животната средина.
На состанокот присутните информираа за активностите превземени од страна на институциите кои ги водат во насока на подобруавње на квалитетот на воздухот, при што се нагласи дека загадувањето на воздухот е повеќедецениски проблем не само кај нас, туку и во земјите од нашето опкружување и во светот и дека Владата сериозно пристапи кон преземање на конкретни активности кои се координирани помеѓу институциите на локално и централно ниво.
Заклучок од состанокот беше дека сите субјекти во државата – државните институции, локалната самоуправа, бизнис секторот, граѓанските здруженија и секој поединец има обврски и ингеренции и само со усогласено делување може да се стигне до посакуваните резултати.
Од таа причина Министерството за животна средина формираше работна група која изработи „Акциски план за грејната сезона 2024 -2025“ во кој се проектирани краткорочни интервентни мерки кои се реални, брзо изводливи и применливи акции со назначени одговорни институции за имплементирање и со обврска за известување од спроведените акциии.
Главно преземените активности беа фокусирани на зајакнати контроли на правните субјекти во однос на почитување на условите од А и Б интегрираните дозволи и студиите и елаборатите за оцена на влијание врз животната средина и за оние што не го почитуваа законот беа изречени казни. Посебно внимание институците посветиле на третманот на отпадот како и контролите за палење на оган на отворено. Особено успешни беа контролите на станиците за технички преглед на возила со цел да се утврди дали се спроведува мерење на емисиите на издувни гасови и вонредните контроли на техничка исправност на возилата, особено за оние со дизел горива, и нерегистрирани возила.
Владата ја лансираше и Планската програма за почист воздух 2025 -2030 која се фокусира на долгорочните мерки и решенија, а во неа се опфатени сите важни аспекти за подобрување на квалитетот на амбиентниот воздух и постои системски приод што гарантира резултати на краток, среден и долг рок, велат од ова министерство.