Актуелниот градоначалник на Скопје ја продал градската куќа и распишал оглас за купување нова градска куќа, информира на денешната прес-конференција кандидатот за градоначалник на Скопје, Данела Арсовска.

„Дури противзаконски, среде избори, тој објавил оглас за оваа цел и планира да даде 11 милиони евра. Наместо да се потрошат 11-те милиони евра за нови луксузни канцеларии за градоначалникот, тие средства ќе ги вложиме во креирање иднина за младите. Во време кога младите заминуваат од земјава, во време кога многу малку се вложува во нивната иднина, во време кога имаме толку несредени работи во Скопје, на градоначалникот во заминување му е приоритет токму набавката на простор за луксузни канцеларии за него“, информира Арсовска.

Арсовска најави дека како иден градоначалник ќе вложи во креирање подобра иднина за младите. Дел од овие 11 милиони евра ќе биде наменети за реновирање на старата касарна во Аеродром, што во соработка со Општина Аеродром ќе биде пренаменета во центар за софтверски инженеринг и хаб за иновативни ИТ-стартап компании.

„Ќе финансираме реновирање на овој центар, каде што младите ќе имаат можност да ги надградуваат своите вештини и да градат кариера во најбрзорастечкиот сектор во земјата. На овој начин ИТ-стартап компаниите ќе имаат свои канцеларии, а младите нови можности за развој. Лицата што имаат желба да се едуцираат во областа на изработка на софтвер и програмирање во ИКТ-индустријата, како најбрзорастечка и најдобро платена индустрија, ќе имаат силна поддршка од Град Скопје и од мене како негов нов градоначалник“, потенцира Арсовска.

„Овој проект, всушност, ја дава разликата за тоа како функционира еден политичар, а како еден менаџер. Политичарот инвестира во канцеларии и во својата фотелја, а менаџерот во иднината. Време да ставиме крај на политиканството! Време е да ставиме крај на нефункционални решенија! Време е за брзи, квалитетни и сигурни решенија за градот Скопје! Не е време за непотребни трошења кога имаме толку многу проблеми во градот. Време е за вложување и создавање услови за отворање нови работни места. Време е да вложиме во иднината“, истакна Арсовска.