Асоцијацијата на архитектите на Македонија бара Град Скопје да распише јавен анонимен архитектонски конкурс за зелената градина на Градскиот трговски центар. Управниот одбор на Асоцијацијата донел едногласна одлука да не интервенираат во веќе подготвениот проект за зелена градина, како што од нив побарал Град Скопје.

„Сметаме дека е крајно неодговорно да се прават интервенции на ГТЦ (а и на кој било друг објект) со дониран проект, кој во голема мера за нас е неразбирлив, и кој не е во никаква релација со постојната обликовна структура на објектот. Како стручна организација во никој случај не можеме да дадеме идеи за негова преправка бидејќи, на крајот на краиштата, проектот има автор. Авторството, меѓу другото, подразбира и голема одговорност. Мешањето во нечие авторство се коси со основните начела на ААМ и Комората на овластените архитекти и инженери на Македонија за третман на архитектите како автори на едно дело“, велат од Асоцијацијата на архитектите.

Архитектите сметаат дека единствен начин за уредување на ГТЦ, кој е симбол на борбата на архитектите против проектот „Скопје 2014“, е преку јавен конкурс.

„Бараме процедури што ќе обезбедат изнаоѓање решенија за проблемите по пат на објавување јавен анонимен архитектонски конкурс, кој е основниот механизам и алатка за транспарентно и креативно дејствување на архитектонската професија и нејзино артикулирање во сферата на градското обликување. Како што години повторуваме, проектот не е само документ за да се добие одобрение за градење, туку тоа е, пред сè, авторско дело што го обликува културното милје на општеството. Наша заложба е не само ГТЦ туку и другите објекти од овој период, кои се од исклучително значење, да добијат статус на заштитени објекти како културно наследство. Овој процес знаеме дека ќе биде долг, но очекуваме дека во меѓувреме третманот и пристапот при вршење на неопходните интервенции ќе биде со огромна етичка и стручна одговорност. Овие објекти не смее да бидат третирани парцијално, туку за нив треба да се изготви целосен проект за реконструкција, која во зависност од средствата ќе може фазно да се реализира“, појаснува Асоцијацијата.

Архитектите се залагаат да се изнајде начин за промена на воспоставената пракса за решавање проблеми кај објектите од времето на модерната, кои се појавуваат од дотраеност, несоодветно одржување и несоодветни и нестручни интервенции во текот на годините.

„Бидејќи сме свесни за проблемот со прокиснувањето на покривот што го има ГТЦ и уште повеќе сме свесни дека планираната интервенција ќе претставува само уште една во низата лоши интервенции направени врз ГТЦ, можеме да одговориме на вашето барање со земање учество во подготовка и организирање конкурс за избор на најдобро решение, кое ќе биде во рамките на буџетот од веќе завршениот тендер, и со почитување на дел од материјалите што се дел од тендерот. Асоцијацијата на архитектите на Македонија стои на располагање да учествува во припремата на проектната програма и организацијата на конкурсот“, велат од Асоцијацијата на архитектите.

Ваквата реакција на архитектите доаѓа кога минатата недела Град Скопје претстави проект за уредување зелена градина на покривот на ГТЦ, без да распише конкурс, поради што проектот беше оценет како наметнат за трговскиот на ист начин како што се наметнуваше барокот. Поради рекациите и на архитектите и на јавноста, градоначалникот на Скопје, Петре Шилегов најави корекции на прокетот во соработка со Асоцијацијата на архитекти од каде , пак, стојат на ствот ГТЦ да се уредува на јавен конкурс.