Македонија
Баравме лекари за да се стави вода во апаратот за кислород, сведочи семејството на 22-годишникот што почина од корона

Семејството на 22-годишното момче од Битола, кое почина како последица на коронавирусот, преку писмо се обрати од министерот за здравство, Венко Филипче, и до медиумите. Во него наведува дека уште додека момчето било таму се жалело од односот на персоналот што го третирало во Општата болница – Битола и го опишал како нехуман. Семејството тврди дека секојдневно, по позитивниот тест на коронавирус, го носеле на прегледи, каде што му била препишувана терапија од докторите. Истото тоа пред десетина дена го потврди и Министерството за здравство. Но, дури третиот ден од прегледите, кога состојбата му била значително влошена, бил хоспитализиран.
„Мојот брат на 9.10.2021 е константирано дека боледува од Ковид-19. Резултатот е добиен во 19 часот. Веднаш е почнато лекување со антибиотик ‘панцеф’ и витамински таблети по препорака на матичниот лекар. Телесната температура му беше 39,2°C. Брат ми не беше вакциниран против Ковид-19. Со години не се обратил на лекар за никакви здравствени проблеми од никаква природа. Наредниот ден, 10.10.2021, е однесен на инфективната клиника во Битола со температура од 39°C, пулс 140, крвен притисок 120/80, сатурација 95. Направен е РТГ. Константирано е нагласен бронховаскуларен цртеж, без знаци на свежа консолидација, со лесно нагласени хилуси, слободни фк-синуси, срце, РТГ на широка основа, графија во еспириум. Направена е лабараториска анализа со D dimeri – 438, CRP – 85,5, Fe – 2,7. Даден совет за таблети ‘кардиопирин’ од 100 мг, ‘панцеф’ 400 мг едно дневно, ‘фамосан’ 40 мг, цинк, Ц-витамин и Д-витамин. На 11.10.2021 повторно е однесен во Клиничката болница – Битола. Извршен е преглед и константирана е температура од 39,3°C, сатурација 97, тахикардија 139 и крвен притисок 120/70. Константирано е васкуларно дишење. Cor-bo. Дадено Sol NaCl 0,9 % 250 мл + ампула ‘аналгин’/ив. Вратен е дома со темпетура од 38°C, отежнато дишење и кашлица“, опишува Дејан Мицкоски, брат на починатиот.
Веќе третиот ден од домашното лекување, со висока температура и кашлица, 22-годишниот битолчанец е повторно однесен во битолската болница. Тогаш е ставен на кислородна поддршка и дадени му се инфузии со додатоци, за кои семејството вели дека не знаат што се третирало со нив. Кога го хоспитализирале, тие барале машината за кислород да биде надополнета со вода бидејќи, како што тврдат, во неа немало. Барале информации за неговата состојба од персоналот, но не добивале.
„Во наредните 24 часа е со постојана температура од над 39°C. Дури наредниот ден вечерта температурата му е стабилизирана и е третиран со крвна плаза од донор со прележан Ковид-19. Третиот ден е третиран со антибиотик за нас до сега непознат и кортикостероиди. Од преголемата нега за пациентите во болницата во ноќните часови бараме лекари за да се стави вода во апаратот за кислород за да може да ја поминe ноќта. Во собите на пациентите оставени се овие броеви за помош од медицинските сестри 047/243-350, 047/243-445, кои трите вечери не функционираа додека мојот брат беше таму. А дадениот број од дежурниот лекар 071-213-415 е луда среќа ако некој те удостои да се јави и да ти даде информација за пациентот. Истата вечер ситуацијата нагло му се влошува и сатурацијата до изутрината стигнува до 55. За само два часа изутрината, мојот брат станува неконтактибилен и до него наводно седи медицинска сестра. Речено ни е дека во таква состојба не е можен транспорт за Скопје, што сметаме дека требаше да се изврши во претходните денови. Мојот брат почина за неполни 2 часа“, додава братот на почиантиот.
Министерството за здравство веќе изјави дека починатиот имал коморбидитет, потенцирајќи дека тоа е обезноста, односно дебелината. Од семејството велат дека тој се занимавал со бодибилдинг. Ним не им е јасно ниту кои доктори го прегледувале првите денови по добивањето позитивен наод на коронавирусот, а не го хоспитализирале веднаш за да добие болнички третман.
„Мојот брат навистина имаше 125 кг, 180 см висина и неколку години се занимаваше со бодибилдинг. За гореизвршените прегледи поседувам документи. Не ми е јасно од кои доктори е прегледуван првите три дена кога го носевме секојдневно во битолската болница бидејќи нѐ примаа доктори, а имаме извештаи со имиња на докторки специјалисти по инфективни болести, кои никаде и никогаш не ги видовме. Господине министер Венко Филипче, ги ценам вашата стручност и знаењето, ама со вакво здравство ќе ни требаат уште стотина години за да го достигнеме минимумот на европското ниво. За горенапишаното располагаме со документација, која можеме да ја дадеме на увид за тој што ќе покаже интерес за случајот. Напоменувам дека за време на хоспитализацијата мојот брат три дена нонстоп беше под маска и контактиравме со пораки, во кои ни се жалеше за нехуманиот однос на персоналот. Со почит од вечно ужаленото семејство на 22-годишното братче, кое ќе живее во нашите срца додека ние постоиме“, пишува Дејан Мицкоски, брат на починатиот.
Младиот пациент почина пред 10 дена. Во првите денови докторите му посочиле дека нема знаци на пневмонија, велеше Министерството за здравство, поради што бил испратен на домашно лекување. Веќе наредниот ден бил со драстично влошена состојба по што бил хоспитализиран. И покрај терапијата, медицинарите не успеаја да го спасат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На секои два до три часа возење неопходно е правење куса пауза, Тошковски вели дека заморот е причина за голем број несреќи

Министерот за внатрешни работи Панче Тошковски со дел од раководството на МВР го посети граничниот премин Табановце каде заедно со претседателот на Републичкиот Совет за безбедност на сообраќајот на патиштата ја продолжија кампањата „Безбедно во лето – Вози одморен“ чија промоција беше минатиот месец на граничниот премин Богородица.
Министерот Тошковски посочи дека преку оваа кампања ги потсетуваме возачите на потенцијалните опасности од заморот, но и на ризиците од пребрзото возење, управувањето на возило под дејство на алкохол и на други сообраќајни прекршоци кои се причини за тешки сообраќајни незгоди., како и дека овие превентивни активности се насочени особено на делницата од граничниот премин Табановце до граничниот премин Богородица, каде во летниот период енормно се зголемува бројот на возила кои минуваат преку овој коридор.
„Целта е да испратиме порака дека е исклучително значајно да се фокусираме сите во превенција на несакани настани кои најчесто се случуваат од премореност на возачите. Праксата покажува дека заморот е една од главните причини за предизвикување на сообраќајни несреќи посебно во летниот период од годината при патување на годишен одмор. На долгите патувања како што е годишниот одмор клучни се паузите за одмор, на секои два до три часа неопходно е правење пауза од барем 15-тина минути. Упатуваме апел до возачите да тргнат на пат одморени бидејќи заморот е голем непријател на безбедното возење. Статистиките покажуваат дека сообраќајните незгоди предизвикани од замор за жал најчесто завршуваат фатално“, истакна министерот за внатрешни работи Панче Тошковски, додавајќи дека зголемувањето на безбедноста во сообраќајот е императив за МВР и дека и во наредниот период продолжуват активностите со цел да се намали бројот на жртви на патиштата.
Македонија
Мицкоски: Имаме 828 потпишани проекти, без разлика градоначалникот од која партија доаѓа

На денешната седница за пратенички прашања во Собранието, пратеничката Драгана Бојковска му постави прашање на претседателот на Владата, Христијан Мицкоски за капиталните инвестиции кои се однесуваат на општините од вториот повик од унгарскиот кредит, кои се проектите, какви се проектите и каков бенефит за граѓаните тие ќе носат.
„Ова за прв пат се случува во Македонија, ваков тип на инвестиција која што од Владата директно ќе биде наменета за општините. Во минатото сме сведоци на многу проекти од Владата кои што биле со одреден фокус и имале поинаква оптика и ова е сосема различен пристап. Јас сум многу задоволен бидејќи нема поубаво чувство кога ќе се организира настан и ќе се соберат градоначалниците од сите општини, од сите политички партии кои што имаат свои градоначалник, но и независни и кои што во мое присуство ќе потпишат договори за реализација на ваков тип на проекти. Овој проект преставува модел како треба државата да функционира, кога имаме заеднички интерес. Во случајот тој заеднички интерес се проектите во општините. И сите тие без да постои било каква замерка, дојдоа и потпишаа договори во една апсолутна хармонија, и тоа е примерот како треба да функционира. Од една страна е добро за граѓаните, кои не се тие кои треба да ја платат сметката поради политичките разлики кои ги имаат политичарите“, истакна премиерот Мицкоски.
Премиерот потенцираше дека имаме 1.200 градилишта, активни и идни, во државата и дека истото е добро за бизнисот, градежни компании градат булевари, спортски сали, паркови, училишта, градинки и други капитални инвестиции. Тој додаде дека до сега над 20 милијарди денари е вкупниот обем на инвестициите и процесот е целосно транспарентен.
„И самото тоа што никој не негира и негодува, туку напротив се заблагодаруваат и опозицијата и тоа е добро. Еве да речеме градоначалникот на една општина во југоисточна Македонија, излезе и јавно се заблагодари исто така и други градоначалници кои што се од опозицијата излегоа и се заблагодарија и овој пример треба да се следи. Тоа е добро затоа што од истата таа опозиција слушавме дека станувало збор за апсолутистичка власт, јас сум бил деспот, сум имал елементи на деспотско однесување, а од друга страна се заблагодаруваат на Владата што финансира и поддржува општини кои што не се само дел од власта, туку и од опозицијата“, објасни Мицкоски.
Македонија
Сиљановска-Давкова свика втора седница на Советот за безбедност

Претседателката Гордана Сиљановска-Давкова ја свика втората седница на Советот за безбедност што ќе се одржи утре, 1 август 2025 година, петок, со почеток во 12 часот.
Членови на Советот за безбедност по функција се: Африм Гаши, претседател на Собранието; Христијан Мицкоски, претседател на Владата; Панче Тошковски, министер за внатрешни работи; Владо Мисајловски, министер за одбрана; Тимчо Муцунски, министер за надворешни работи и надворешна трговија и тројцата членови, именувани од претседателката: Џевдет Хајредини, Малинка Ристевска-Јорданова и Владо Спиридонов.
На втората седница на Советот за безбедност, на покана на претседателката Сиљановска-Давкова ќе присуствуваат и директорот на Агенцијата за национална безбедност, Бојан Христовски; директорката на Агенцијата за разузнавање, Габриела Јаковлева и директорот на Дирекцијата за заштита и спасување, Стојанче Ангелов.