Македонија
Безбедносните служби одлучуваат дали Џамбаски ќе може да влезе во Македонија
Безбедносните служби ги прават извештаите и анализите, согласно кои ќе се одлучи дали европратеникот, Ангел Џамбаски, ќе може да влезе во Македонија или ќе биде персона нон-грата и ќе остане на граница. Ова е заклучокот од одговорот на премиерот, Димитар Ковачевски за пратениците, кои прашаа дали ќе се прифати предлогот на Советот на безбедност. Освен Џамбаски, предлогот е на списокот да се најдат и други лица од Бугарија.
„Странец кој има намера да присуствува до 90 дена во државата или во било кој период до 180 дена, може да му се забрани престој односно влез во С. Македонија доколку е лице кое во системот за контрола има забрана за влез, доколку претставува закана за јавниот поредок, националната безбедност, меѓународните односи. Согласно со извештаите, анализите на безбедносните служби на државата и кои што ги има МВР, на денот на одбележувањето, како и во деновите претходно, МВР ќе постапи согласно податоците кои ги има од свои извори и од службите, согласно со заклучокот на Владата, МВР да обезбеди мирно чествување на 4-ти февруари, роденден на Гоце Делчев“, кажа Ковачевски.
Ковачевски пред пратениците кажа дека МВР работи на тоа прославата на 4 февруари да помине во мирна атмосфера и без инциденти.
„Настанот е карактеризиран како настан со висок ризик во однос на изјавите кои доаѓаат како од внатре така и од надвор. Согласно со тоа МВР е задолжено да организира мирно чествување на овој настан. За таа цел, МВР ги презема потребните активности“, кажа Ковачевски.
Премиерот е дециден дека нема антибугарска хистерија.
„Во Северна Македонија не постои антибугарска хистерија. За инцидентите има одговорни лица со имиња и презимиња. Не може цела нација да се обвини за постапки на неколкумина поединци. Македонија презема се согласно процедурите и продолжува да биде конструктивен партнер и во регионот и во ЕУ“, додава Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Град Скопје: Неплатените даночни обврски надминуваат 36 милиони евра, граѓаните повикани да ги подмират долговите
Град Скопје соопшти дека неплатените обврски по основ на данок на имот, данок на промет, данок на наследство и подарок и комунална такса-фирмарина за периодот од 2020 до 2025 година надминуваат 36 милиони евра, според евиденцијата на Секторот за даноци на имот и комунални такси.
Даноците на имот и комуналните такси се значајни приходи за функционирањето на Градот, со кои се финансираат основни градски услуги, инфраструктурни проекти, трошоци на јавните претпријатија и јавните установи, како и работата на средните училишта.
Од Град Скопје ги повикуваат сите даночни и таксени обврзници – правни и физички лица – што немаат платено данок на имот, промет, наследство и подарок, како и комунална такса-фирмарина, своите обврски да ги подмират во најкраток можен рок.
Граѓаните и компаниите можат да извршат увид во своите долгови, да ги преземат решенијата и електронски да ги платат обврските преку платформата: https://danoci.skopje.gov.mk/gskopje/root/public/login.xhtml
Градот објави и контакт информации за повеќе категории даноци:
Данок на имот: 072/204-434, 02/3207-546, e-mail: [email protected]
; [email protected]
Данок на промет, наследство и подарок: 02/3297-298, 02/3297-296, e-mail: [email protected]
Комунална такса-фирмарина: 02/3297-314, e-mail: [email protected]
Даночно сметководство: 02/3297-298, 02/3297-296, e-mail: [email protected]
Даночниот долг може да го платите и преку Даночните шалтери на Град Скопје, секој работен ден од 8 до 19 часот, како и во сабота на 13 декември.
Македонија
Сиљановска-Давкова ќе го одликува американскиот генерал-мајор Грегори Најт со Орден за воени заслуги
Претседателката Гордана Сиљановска – Давкова, денеска – 9 декември 2025 година, вторник, ќе го прими американскиот командант на Националната гарда на Вермонт, генерал-мајор Грегори Најт и на свечена церемонија ќе го одликува со Орден за воени заслуги.
Генерал-мајор Најт се одликува со Орден за воени заслуги за неговиот особен придонес во продлабочувањето на македонско-американското пријателство и воената соработка што резултираше со бројни активности за зајакнување на капацитетите и за зголемување на борбената готовност на македонската армија.
Македонија
Земјотрес почувствуван во регионот на Кичево
Земјотрес со магнитуда од два степени според Рихтеровата скала бил регистриран ноќта во 01:23 часот во Македонија, соопшти Европско-медитеранскиот сеизмолошки центар (ЕМСЦ).
Според податоците,земјотресот бил регистриран на 15 километри југoјугозападно од Кичево, 73 километри североисточно од Елбасан, Албанија.
Епицентарот се наоѓал на длабочина од 15 километри.

