Поради обилните врнежи и зголемениот водостој на реките, во Кичево дојде до поплавување на населени места и земјоделски површини, при што беа погодени повеќе домаќинства. Од загрозените подрачја се евакуирани околу 110 лица, кои привремено се сместени во спортската сала во градот, каде што има обезбедено соодветно греење.

Градоначалникот на Кичево, Александар Јовановски, информира дека во соработка со Црвениот крст е обезбеден дел од потребната помош, додека храната за сместените лица се обезбедува преку општинската народна кујна и Црковната кујна, со средства на Општината и поддршка од Црвениот крст.

Во меѓувреме, донесена е одлука за редовна дезинфекција и дезинсекција на просториите со цел да се спречи евентуално ширење на зарази, а ангажирани се и хигиеничарки за одржување на хигиената. На терен активно дејствуваат сите надлежни служби, меѓу кои ТППЕ Кичево, ЈКП „Комуналец“ и други институции.

По барање на Општината, ЈЗУ „Општа болница“ – Кичево ќе обезбедува медицински тимови кои двапати дневно ќе вршат здравствени прегледи на сместените жители. Како што посочува градоначалникот, приоритет во моментов се здравјето, редот и безбедноста на граѓаните.

Од Општината информираат дека станува збор за долгогодишен проблем со излевање на речното корито, кое со години не било соодветно чистено. Штом ќе се создадат услови за безбедна работа, ќе биде ангажирана механизација за чистење на коритото и изработка на насип во регионот кај улицата „Прилепска“, по што ќе се пристапи и кон трајно решавање на проблемот и обезбедување соодветни услови за сместување. Воедно, уште со преземањето на градоначалничката функција започната е изработка на комплетен проект за уредување на речното корито, со цел вакви ситуации да не се повторуваат.

Кризниот штаб ќе формира комисија за проценка на штетите откако ќе се повлече водата и ќе може безбедно да се пристапи на терен.

Црвениот крст на Република Северна Македонија информира дека преку својата општинска организација во Кичево, во соработка со Општина Кичево, во изминатите 24 часа обезбедил итна хуманитарна помош за евакуираното население. На погодените им се доставени душеци, ќебиња, креветнина, облека, храна, вода, хигиенски средства, како и топли оброци, а на терен се ангажирани волонтери кои постојано ја следат состојбата и одговараат на потребите на населението.

Воедно, Црвениот крст упати повик до граѓаните и компаниите кои сакаат да помогнат да донираат парични средства преку Фондот за солидарност. Финансиската помош може да се уплати на сметка 300000001327966, примател Црвен крст на РСМ – Фонд на солидарност, даночен број 4030984271620, преку АД Комерцијална банка, со назнака „Помош за настраданите граѓани од поплавата во Кичево“. Од Црвениот крст посочуваат дека донациите ќе бидат распределени транспарентно и еднакво до сите засегнати.

Дополнително, од Скопје се очекува пристигнување на поголема количина опрема, душеци и кревети, за кои се проценува дека ќе бидат доволни за тековните потреби. Центарот за управување со кризи информира дека во Кичево и околните населби има појава на вода во подрумски простории и на дел од површините, при што ЈКП „Комуналец“ интервенира на локациите со излеана вода.

Надлежните апелираат на смиреност, солидарност и одговорност, нагласувајќи дека здравјето на луѓето е најважно и дека конкретни мерки ќе се преземат веднаш штом ќе се создадат соодветни услови на терен.

Утре без вода ќе останат дел од корисниците во Општина Центар, информира РЦУК – Скопје.

„Од ЈП Водовод и Канализација добивме известување дека на ден 09.01.2026 година ( петок ) поради уличен дефект на ул. Васил Ѓорѓов б.б – пред ОУ Киро Глигоров, во периодот од 09.00 часот па се до отстранување на дефектот без вода ќе останат корисниците од улиците Васил Ѓорѓов, Адам Мицкиевиќ, дел од корисниците од улиците Киро Глигоров и Козара, како и објектот на заводот за физикална медицина и рехабилитација. (општина Центар0“, се наведува во информацијата.

Имаме неодговорна, неконструктивна, незрела и безидејна опозиција која се служи со вакви квалификации како што денеска ги слушнавме од господинот Филипче, вели премиерот Христијан Мицкоски, по прес – конференцијата на лидерот на СДСМ, Венко Филипче, кој кажа дека нема да има лидерска со криминалци. Според Мицкоски, пораките од опозицијата се збунувачки, затоа што прво тие барале лидерска средба, а сега ја одбиваат.

„Мислев дека со овој повик ќе покажеме зрелост и широчина и на тој начин ќе можеме како политички чинители да се обединиме. Тема на лидерската средба не беше само законот за техничката влада. Ако така незрело и неодговорно се однесуваме како опозицијата, тогаш нам лидерската средба не ни е ниту потребна и можеме со 61 глас да го смениме законот за влада и да ја избришеме техничката влада Но, ние сакавме целиот процес да биде инклузивен“, рече Мицкоски во одговор на новинарско прашање.

Тој додаде дека на средбата сакале да се зборува и за реформската агенда, за законите од областа на правосудството, јавното обвинителство и други области преку еден инклузивен процес.

„Но, ете, за жал, имаме неодговорна, неконструктивна, незрела и безидејна опозиција која се служи со вакви квалификации како што денеска ги слушнавме на прес – конференцијата на господинот Филипче. Однесувањето на Филипче, очигледно, на ваков тип обраќање на јавноста е составен дел од неговиот менаџерски договор што го има потпишано со СДСМ, договор да се служи со навреди“, рече Мицкоски.

Премиерот кажа дека, сепак, ќе испратат формални покани за средбата која била планирана за 14 јануари.

„Но, тоа е негов избор. Ние, сепак, формално денес или утре ќе ги испратиме поканите за средба. Планирано беше на 14 јануари во Клубот на пратениците да се одржи таа лидерска средба. Пораките се збунувачки, тие бараа лидерска средба, а сега ја одбиваат. Збунувачки и неодговорно е ваквото однесување на опозицијата“, рече Мицкоски.