Македонија
Беса: МВР да отвори најмалку 10 пунктови за вадење лични документи во Скопје и да го продолжи рокот за нивно издавање до септември 2014 година

МВР не успеа да организира издавање лични документи, кои граѓаните се обврзани да ги заменат до февруари следната година, велат од Движењето Беса.
Иако во услови на криза, граѓаните се принудени по втор пат да плаќаат за издавање лични документи, дури и по многу повисока цена од досега, во Скопје илјадници граѓани со часови чекаат ред на студ и на дожд.
Оваа фотографија го враќа времето на комунизмот кога државата ги тераше граѓаните да чекаат ред за леб или литар млеко.
Ова докажува дека оваа држава не работи на олеснување на животот на граѓаните, туку на нивна целосна контрола и враќање во диктатура.
Во овој случај двојно повеќе се дискриминирани албанците, кои иако чекаат и до пет часа за да бидат фотографирани, кога ќе стигнат на ред, административците им велат дека во моментот нема пасоши на два јазика. Ако сакаат да извадат пасош на албански јазик, тогаш ќе треба да чекаат повеќе од еден месец!
Ваквата состојба сведочи за дискриминацијата од кој било аспект што се прави и врз албанските граѓани.
Но, ситуацијата уште повеќе ќе се искомплицира со доаѓањето на нашите сограѓани кои живеат надвор и сигурно ќе сакаат да извадат нови лични документи. А пред пунктовите на МВР бројот на граѓаните ќе биде многу поголем.
Затоа, бараме Министерството за внатрешни работи да преземе конкретни чекори:
1. Отворање на најмалку 10 Пунктови за вадење лични документи без рок во Скопје;
2. Продолжување на рокот за издавање лични документи до СЕПТЕМВРИ 2024!
3. НАМАЛУВАЊЕ НА ТРОШОЦИТЕ со поевтини давачки за вадење лични документи, бидејќи повторното вадење на вакви документи е наметнато со договорот со Грција, а не по вина на граѓаните!
Доколку Министерството за внатрешни работи и Владата ги игнорираат овие барања и не превземат мерки за олеснување на постапката и намалување на цените, тогаш се подразбира дека оваа власт работи само за да ги малтретира граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.