Македонија
Битиќи за зголемените цени: Пазарниот инспекторат е секојдневно на терен, се очекува извештајот и соодветно ќе се реагира

Вицепремиерот за економски прашања, Фатмир Битиќи, одговарајќи на новинарско прашање за тоа како ќе се реагира на несоодветното покачување на цените на прехранбените производи, појасни дека Државниот пазарен инспекторат секојдневно е на терен и во првиот момент кога ќе стаса извештајот дали и кои производи имаат зголемени цени, соодветно ќе биде реагирано во јавноста, особено, како што рече, доколку тоа се прави на организиран начин.
Прашан дали може да поднесе претставка, Битиќи рече дека, освен што извршува јавна функција, како и сите други граѓани во државата има право да поднесе претставка.
„Еднаш го имам направено, не го правам тоа за да покажеме што и како, туку да го решиме проблемот. Во овој момент ќе повикам на две структури. На пратениците во Собранието да го изгласаат законот за нефер трговски практики затоа што сметам дека на тој начин институционално ќе го решиме проблемот со евентуално зголемување на цените што не се пазарни.
Битиќи очекува пратениците во Собранието што побргу да го изгласаат законот за нефер трговски практики затоа што смета дека само на тој начин може да се реши проблемот со евентуално зголемување на цените на производите кои не се пазарни.
Оценува дека искуствата во другите земји укажуваат дека Комисијата за заштита од конкуренција е поагилна и не остава простор да се зголемуваат цените на организиран начин, надвор од тоа што е логично поскапување.
„Во нашето општество не можеме да најдеме консензус што е исправно – кога ја носевме мерката за гарантирана цена бевме критикувани затоа што била спротивна на пазарната економија, сега сме критикувани од истите тие дека требало да се задржи. Законот за нефер трговски практики е одличен закон, усогласен со ЕУ-директивите, тоа е решението“, рече Битиќи.
Според него, сите берзи се намалени и реално нема потреба од зголемување на цените на производите. Побара поголем општествен консензус затоа што, како што рече, тој е онаму каде што лежи законот, а тоа е во Собранието.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Спасовски: Градоначалникот на Крива Паланка лажеше дека има цијанид 100-тици пати над дозволеното

Градоначалникот на Крива Паланка лажеше дека во водата во Крива Паланка има цијанид 100-тици пати над дозволеното, за да шири паника и манипулира пред избори, кажа денеска на прес-конференција Емил Спасовски, пратеник на ВМРО-ДПМНЕ.
„Сашко Митовски свесно ги лажеше граѓаните и на Крива Паланка и на целата држава дека загадувањето на водата во Крива Паланка со цијанид е 100-тици пати над дозволеното. Анализите кои ги објави Државниот инспекторат за животна средина го покажуваат спротивното и го демаскираат трулиот обид на Митовски да манипулира. Мизерно е како Митовски не се колебаше да манипулира со најчувстителната тема за граѓаните – безбедноста на водите и почвата, само за да шири паника и ќари некој ситен политички поен пред избори“, рече Спасовски.
Пратеникот го повика Јавното обвинителство да поднесе кривична пријава против Митовски, за ширење паника.
„Дејствијата на Митовски се дотолку поголеми што тој е носител на јавна функција, која во дел од јавноста може да создаде краткотраен привид дека тој ја говори вистината, и со тоа да предизвика огромен страв. ЈО треба да ги земе во предвид овие околности, но и стварниот ефект предизвикан од паниката која ја рашири Сашко Митовски и да поднесе кривична пријава против него“, истакна Спасовски.
Македонија
(Видео) Кузеска: Со Тошковски на чело, МВР е во хаос – бодигарди аздисуваат на улиците како на див запад

Со Панче Тошковски на чело на МВР хаос се случува по македонските улици, безбедноста е загрозена, нема никаков ред и поредок, кажа денеска на прес-конференција Богданка Кузеска, портпаролка на СДСМ.
„МВР се сведе на тоа да не може ниту еден џип неправилно паркиран да санкционира. Скандалот во Дебар Маало по којзнае кој пат го потврди нефункционирањето на МВР ама го покажа и каубојското аздисување на бодигардите на функционерите на власт. Двајца полициски службеници, обезбедувачи на претседателката на државата лажно тврделе дека погрешни паркираното „порше“ на Срѓан Керим е службено. Тие барале „поршето“ на Керим да не биде кренато од пајакот, тие поттикнале неказнивост. Да не беше реакцијата на младите и овој случај ќе беше заташкан. Но по бурните реакции МВР беше принудена да поведе дисциплински постапки“, рече Кузеска.
Таа потенцираше дека во последниве 9 месеци, како на лента се редат скандал по скандал со телохранители на највисоките државни функционери.
„Од обезбедувањето на премиерот Мицкоски, едниот оддавал државни тајни другиот нападна полицаец попречувајќи акција против дрога. Обезбедувањето на Гаши направи инцидент на скопскиот аеродром, извади пиштол, турна и нападна полицаец. Сега обезбедувањето на претседателката вмешана во скандалот во Дебар Маало. Ова не се изолирани инциденти – ова е системски распад на безбедносниот апарат! Полицајци кои треба да не чуваат – работат за интересите на криминалци, моќници и тајкуни. На чело на сите нив е Панче Тошковски – како министер кој го дозволи овој распад во МВР. Сите овие инциденти отвораат сериозни прашања за целосна нефункционалност за безбедносниот апарат, за можната поврзаност на луѓе од власта со криминални структури. Нема ред и поредок, нема одговорност. Вака не може! Одговорност мора да има и таа мора да започне со најодговорниот а тоа е министерот Панче Тошковски“, истакна Кузеска.
Македонија
(Видео) Манасиевски: Левица и Апасиев во директен договор со Извршител и банка купиле конфискуван имот за 3 пати пониска цена

Левица и Апасиев во директен договор со Извршител и банка купиле конфискуван имот за 3 пати пониска цена, кажа денеска на прес-конференција Валентин Манасиевски, член на ЦК на ВМРО-ДПМНЕ.
„Левица и Апасиев се фатени ин флагранти во зделката на деценијата, за која многу светски инвеститори можат да им позавидат. Само Левица и Апасиев можат да купат деловен објект одземен преку извршител од некој граѓанин или фирма кои не можеле да го враќаат кредитот, за 3 пати пониска цена од пазарната. Левица и Апасиев кои декларативно беа против Извршителите, не се колебаат да купат одземен имот, од истите тие Извршители“, рече Манасиевски.
Според него, уште поголем проблем е ставот на Левица дека Извршителот немал ништо со преговорите, туку дека тие се договориле со банката и објектот го земале со хипотекарен кредит.
„Ако договарале со банката, како истите ја постигнале таа цена, кога во околината се продава имот за 3 пати повисока цена? Дали има некој скриен договор или друга услуга која не е заведена договорно? Граѓаните ја немаат таа среќа да купуваат одземен имот од Извршители кои извршуваат граѓани во финансиски потешкотии, како Левица, ниту да се договорат со некоја банка за толку ниски цени. Левица и Апасиев се демаскирани, аскетизмот одамна го замениле со хедонизам, ако воопшто и некогаш биле аскети“, истакна Манасиевски.