Македонија
Битиќи, Шукова и Манолева: Со изградбата на експресниот пат Штип- Кочани се создадоа можности за подобар квалитет на животот на граѓаните од источниот регион
Заменик-претседателот на Владата, задолжен за економски прашања, координација на економските ресори и инвестиции, Фатмир Битиќи, заедно со министерката за животна средина и просторно планирање, Kaja Шукова и заменик-министерката за здравство, Маја Манолева, го посетија Кочани за да разговараат со граѓаните и бизнисмените за придобивките кои ги имаат од изградбата на експресниот пат Штип- Кочани.
Во неговата изјава за медиумите вицепремиерот Битиќи рече дека оваа влада ја има препознаено клучната улога што ја игра инфраструктурата во поттикнувањето на економскиот раст и подобрувањето на севкупниот квалитет на живот на нашите граѓани, и токму затоа гради автопатишта и експресни патишта, како што е примерот со експресниот пат Штип-Кочани во вредност он над 46 милиони евра.
„Овие брзи сообраќајници не само што ги поврзуваат градовите и регионите, туку и носат мноштво придобивки за економскиот напредок и просперитет на државата преку транспорт на луѓе и стоки. Со овој модерен експресен пат создадовме услови и за безбедно патување на луѓето до саканите дестинации. Придобивките од експресниот пат Штип- Кочани најдобро ги чуствуваат компаниите од Источниот плански регион, на кои им овозможивме брз транспорт на нивните стоки, но истовремено финансиски ги поддржуваме преку Законот за финансиска поддршка на инвестиции за нивна поголема конкурентност на странските пазари, со што придонесуваме и за регионален развој“, изјави Битиќи.
Вицепремиерот Битиќи посочи дека од почетокот на законот заклучно со 2022-ра година, само во Источниот регион имаме исплатено 630 милиони денари по ЗФПИ за 3.7 милијарди денари инвестиции на 89 компании, а само во тековната 2023 година, имаме склучени нови 44 договори.
„Со реализацијата на овие нови инвестиции се покажува дека како Влада имаме изградено реален капацитет и услови за поттикнување и реализација на нови инвестиции во делот на реалниот сектор, кои отвораат нови и добро платени работни места за нашите граѓани“, заклучи Битиќи.
Министерката Шукова во својата изјава ја истакна важноста на патна инфраструктура во делот на управувањето со отпадот, бидејќи придонесува за подобра поврзаност на населените места и побрзо и побезбедно движење на возилата.
„Сакам да нагласам и дека во источниот дел од државата, во изминатите неколку години прогласивме две нови заштитени подрачја, а подобрената патна инфраструктура дава можности за развој на еко-туризам во овој дел државата и привлекување на домашни и странски туристи”, додаде Шукова.
Заменик-министерката за здравство, Маја Манолева истакна дека новиот експресен пат што ги поврзува Кочани и Штип, гледано од медицински аспект е значаен напредок во областа на здравствената инфраструктура во нашата земја.
„Ако пред пет години од Кочани до Скопје се патуваше еден час и 40 минути, сега се стигнува за помалку од еден час, а тоа е од големо значење за пациентите кои имаат закажани прегледи во Скопје, како и за итните случаи кои треба брзо и навреме да стигнат во Скопје. Кога станува збор за пациентите, добро знаете дека секоја минута е важна и патиштата што го скратуваат времето на патување имаат голем придонес за спасување на животите во одредени случаи. Освен што оваа инвестиција го намалува времето на патување и растојанието помеѓу Кочани и Штип, таа исто така ги подобрува условите за патување. Со две коловозни ленти и две ленти за застанување, новиот експресен пат овозможува безбедно и брзо движење, што е особено важно за итните случаи и превоз на пациенти“, рече заменик-министерката Манолева, притоа посочувајќи дека не станува збор само за пат, туку и за врска помеѓу здравствени установи, што го олеснува и пристапот на граѓаните до здравствени услуги.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Центар наскоро ќе стане првата општина во земјава со систем за мерење на бучава, рече Герасимовски
Општина Центар наскоро ќе стане првата општина во земјава со систем за мерење на бучава во реално време, најави градоначалникот Горан Герасимовски. Според него, јавната набавка е завршена, а веднаш по изборите ќе бидат поставени 30 мерни единици на различни локации.
„Заврши јавната набавка, чекаме да поминат изборите за да ги поставиме мерните единици – првично 30. Преку мобилна апликација, секој граѓанин ќе може да провери каква е фреквенцијата на бучава на одредена локација“, изјави Герасимовски.
Системот, како што објасни, ќе им овозможи на граѓаните докази при пријавување во Министерството за внатрешни работи или до општинските инспекциски служби. Целта е брза и ефикасна реакција на прекршителите, особено во зони каде што постојат проблеми со прекумерна бучава од угостителски објекти и сообраќај.
Во вториот дел од изјавата, Герасимовски зборуваше за следниот голем проект на општината – постепено затворање на Дебар Маало за моторен сообраќај, со што ќе се намали хаосот со паркирањето и ќе се создаде подобар квалитет на живот за жителите.
„Имаме ревидиран проект за затворање на Дебар Маало. Тој е доставен до Министерството за внатрешни работи и веќе имавме два состанока со МВР за да го подобриме и да добиеме одобрување. Така и беше договорено на последниот состанок“, рече Герасимовски.
Планот е Дебар Маало да се затвора дел по дел, почнувајќи веднаш по завршувањето на изборниот процес, а првата рампа веќе е поставена.
„Веќе поставивме рампа на почетокот на Боемска улица. Разговараме за начинот на кој таа зона ќе функционира, и тоа ќе биде пример за затворање и на други населби каде што сообраќајот и паркирањето се хаотични“, додаде градоначалникот.
Македонија
Николоски го претстави планот за Николиќ во Дојран: Уредена плажа, патека и подобро електроснабдување
Потпретседателот на ВМРО-ДПМНЕ, Александар Николоски, при посетата на дојранското место Николиќ, најави повеќе инфраструктурни и развојни проекти за локалното население и туристите.
Николоски посочи дека приоритет е решавањето на проблемот со снабдувањето со електрична енергија, бидејќи местото брзо се шири со нови куќи и викендици.
Како втор проект го најави уредувањето и осветлувањето на пешачката патека што ќе води од населбата до плажата, која, според него, ќе стане туристичка атракција.
Трет приоритет е уредувањето на плажата Николиќ, која ќе добие концесионер со обврска да ја трансформира во современо туристичко место.
Николоски додаде дека се разговара и за изградба на културен дом и решенија за предучилишно згрижување на децата.
„Убеден сум дека Илија Николиќ ќе биде новиот градоначалник на Дојран и дека заедно ќе ги реализираме овие проекти со поддршка од Владата“, изјави Николоски.
Македонија
Мицкоски од Пробиштип повика на масовна излезност во вториот круг
Во првиот круг коалицијата којашто ја предводи ВМРО-ДПМНЕ освои 33 градоначалници. Двајца во меѓу време, помеѓу првиот и вториот круг, против кандидати на нашите кандидати се откажаа, што значи дека сега веќе се 35 градоначалници и во уште 24 општини сме во вториот круг. Во недела ќе се одлучува кој ќе биде градоначалник во тие 24 општини. Во 6 од тие 26 општини сме второпласирани, со тенденција и со голема шанса, бидејќи разликата е премногу мала, да бидеме првопласирани, рече претседателот на ВМРО-ДПМНЕ, Христијан Мицкоски на вечерашниот мини митинг во Пробиштип во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори во недела на 2 ноември.
Мицкоски изрази убедување дека коалицијата предводена од ВМРО-ДПМНЕ, после овие локални избори ќе има 59 градоначалници.
„Истовремено, дозволете ми да информирам дека во 58 општини советничките листи ан коалицијата предводена од ВМРО-ДПМНЕ победија и имаат убедливо мнозинство во Советот. Кога на сето тоа ќе се додаде и резултатот во Градот Скопје, односно убедливото водство на идниот градоначалник на Градот Скопје, Орце Ѓорѓиевски, 90 илјади наспроти 30 илјади, отприлика нешто повеќе од 3 спрема 1, очекуваме во вториот круг таа бројка да дојде до 120 можеби 125 илјади гласа. И убедливата победа на советничката листа на коалицијата предводена од ВМРО-ДПМНЕ за Град Скопје, доаѓаме до фантастична бројка од 60 општини во кои што се состои и Градот Скопје, нешто што до сега на ниту една политичка коалиција во независна Македонија не и се случило“, истакна Мицкоски.
Втората крупна политичка порака, вели Мицкоски, која сакам денес од Пробиштип да ја испратам, е дека конечно, партијата која повеќе од 20 години беше дел од сите влади во Македонија, Демократската унија за интеграција, на овие локални избори е поразена.
„Ние велевме на парламентарните избори пред година и половина ги развластивме и дека ќе дојде време, кога на локалните избори, тие ќе бидат поразени. И тие практично се поразени на овие локални избори“, рече Мицкоски.
Додаде дека во вториот круг имаме три опции, од кои првата е да се гласа за коалицијата која ја претставува ВМРО-ДПМНЕ, која е победничката коалиција, додека втората опција е поранешната владина коалиција предводена од СДСМ, која е опција која не враќа назад во времето и која ја ограбуваше, понижуваше и распродаваше Македонија.
„И третата опција, по мене, најкатастрофални е да останеме дома и да не излеземе на изборите и да дозволиме некој друг да одлучува во наше име“, дециден беше Мицкоски додавајќи дека со седењето дома никој не се казнува, туку со тоа се казнуваат самите граѓани кои не излегле на гласање.
Затоа, Мицкоски ги повика граѓаните на Пробиштип, но и на цела Македонија во недела на 2 ноември да излезат на гласање што е можно помасовно и да го дадат својот глас онака како што тие мислат дека е најдобро.
„Но, убеден сум дека кога ќе застанете позади параванот, со пенкалото во рака и со гласачкото ливче пред вас, ако го слушате разумот и вашето срце, и длабоко погледате во вашата душа, ќе видите и ќе препознаете дека таму извира бројот 9 и името на Тони Тоневски. И јас сум убеден дека тоа ќе биде вашата опција за следните четири години“, посочи Мицкоски.

