Македонија
Битола во последни подготовки за празничната магија: професионално лизгалиште како главна атракција на зимската приказна 2024

„Празниците живеат во Битола на Зимска приказна“ – фестивалот кој ја претвора Битола во празнична туристичка атракција од 20 декември до 6 јануари, велат од оваа општина.
„Битола оваа зима ќе заблеска во празничен сјај со нова и досега невидена атракција – професионално лизгалиште кое ќе биде поставено на амбиенталниот плоштад Магнолија. Оваа централна атракција ќе го означи и официјалното отворање на годинешната Зимска приказна под слоганот „Празниците живеат во Битола на Зимска приказна“, која ќе трае од 20 декември до 6 јануари“, најавуваат од таму.
Лизгалиштето ќе биде достапно за сите граѓани и посетители на градот во текот на еден цел месец, нудејќи забава и зимска магија за сите генерации. Според најавите од Општина Битола и ЈП „Паркинзи“, подготовките за поставување на оваа празнична инсталација започнуваат овој викенд. Во овој период, граѓаните се замолуваат за трпение и разбирање, бидејќи просторот околу плоштадот ќе биде привремено адаптиран за техничките подготовки и монтажата на лизгалиштето.
„Со гордост најавуваме дека Битола оваа година добива уште подобра празнична магија која ќе го привлече вниманието на граѓаните и туристите. Лизгалиштето ќе биде отворено за сите генерации, носејќи забава и незаборавни празнични моменти. Ова е само дел од искуството што го нуди Зимска приказна – фестивал кој ја надминува локалната димензија и ја промовира Битола како празнична туристичка атракција,“ изјави градоначалникот на општина Битола, Тони Коњановски на заедничката прес конференција со директорот на ЈП „Паркинзи“, Зоран Михајловски.
Покрај лизгалиштето, Зимска приказна ќе понуди богата програма со празнични активности и содржини кои ќе го исполнат духот на празниците. Внимателно осмислените декорации, музиката во живо, креативните работилници и забавните програми за деца и возрасни ќе бидат само дел од магијата која ќе се случува на плоштадот Магнолија.
Посебна благодарност се упатува до битолските компании кои ја поддржаа реализацијата на Зимска приказна 2024. Нивната поддршка е клучна за креирање на овој празничен амбиент кој ги надминува границите на градот, претворајќи ја Битола во вистинска празнична туристичка дестинација, се нагласува во информацијата.
„Ги покануваме сите граѓани и посетители да бидат дел од оваа зимска магија. Од 20 декември, плоштадот Магнолија ќе биде местото каде што радоста и заедништвото ќе го исполнат секој агол. Зимска приказна не е само фестивал – тоа е приказна што ја живееме заедно,“ порачуваат организаторите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.