Македонија
(Видео) Боки 13: Здравјето ми е загрозено, на судењето треба да бидам жив и здрав, а не мртов

„Останувам целосно на искажаното на мојот бранител. Покрај тоа што мојот бранител наведе дека двапати сум неуспешно опериран, би додал дека мојата состојба е животозагрозувачка. Јас повраќам константно во тие услови. Затворскиот лекар има желба да помогне, но не може поради состојбите. Имам органски проблем. Јас сум во добра психичка состојба. Неуспешните операции се поради лекарска грешка. Пресечен ми е нерв од желудникот и затоа повраќам, ова ми го кажа докторот Спировски од Торакална хирургија. Имам проблем со белите дробови и уште четири дијагнози. По многу од укажаните упатства од затворскиот лекар, условите во се наоѓам не го дозволуваат тоа“, изјави Бојан Јовановски познат како Боки 13, кој е осомничен во случајот „Рекет“, на јавната седница во Апелациониот суд по жалбата за притворот.
„Физички изгледам добро, но тоа не ја отсликува мојата здравствена состојба. Во оваа постапка треба да бидам жив и здрав, а не мртов. Во однос на бегството, би сакал да додадам дека мојот лик и дело, семејството, менталниот склоп, не укажуваат на тоа. Кога бев уапсен, не бев даден во бегство, туку имав уплатено седумдневен одмор со пријатели. Јас живеам за докажување на вистината на овој случај, докажување на мојата невиност. Свесно кажувам дека сум тука целосно со сите мои сознанија, факти и докази, да учествувам во фер постапка“, истакна Јовановски.
Боки 13 рече дека секојдневно бара да го носат во болница, но дека тоа го прават кога состојбата драстично ќе му се влоши.
Претходно, и адвокатот на Бојан Јовановски побара укинување на притворот и замена со друга мерка бидејќи неговата здравствена состојба е сериозна влошена и може да има смртна последица. Дуковски до судот достави и медицинска документација, во која доктор Зоран Спировски од Клиниката за торакална хирургија дава мислење дека Јованоски мора итно да биде хоспитализиран.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ го повика Обвинителството да оформи предмет против градоначалникот на Крива Паланка

Владејачката ВМРО-ДПМНЕ го повика Обвинителството да оформи предмет против градоначалникот на Крива Паланка од редовите на СДСМ, Сашко Митовски, за кој велат дека свесно ширел паника за наводно загадената вода во Крива река, по хаваријата во „Тораница“,
„Градоначалникот на Крива Паланка свесно ја лажеше македонската јавност дека во водите на Крива река имало присуство на цијанид за 100 пати над дозволеното. Сашко Митовски не штедеше зборови и секојдневно изминатата недела ширеше паника меѓу жителите, за да дојде до ситни политички поени во пресрет на локалните избори“, велат од ВМРО-ДПМНЕ.
Градоначалникот претходно повикувајќи се на извештаи на акредитирани лаборатории, на прес-конференција, изјави дека е водата во Крива Река, по земените примероци, еден ден по хаваријата во рудникот „Тораница“, е сериозно загадена и претставува опасност за животот и здравјето на луѓето по должината на течението на реката, но и за флората и фауната.
„Извештајот покажува неверојатно зголемени концентрации на штетни материи, а она што најмногу загрижува е десеткратното зголемено присуство и концентрација на тешки метали, поточно количината олово во водата. Дополнително, за неколку стотици пати е зголемена концентрацијата на цијанид, фосфор и азот во Крива Река“, рече градоначалникот.
Одговорноста за токсичната вода во и во Крива Река и во Тораничка, локалната власт ја гледа кај фирмата БУЛМАК 2016 ДООЕЛ, која стопанисува со рудникот Тораница.
Директорката на Државниот инспекторат за животна средина, Ивана Гиновска, ги отфрли тврдењата. Рече дека нема цијанид неколку стотици пати над дозволеното во Крива Река, туку се работи за двапати над дозволеното. Сепак, директорката потврди дека инспекторите дента кога се случила хаваријата не зеле мостри.
„Инспекторите се самостојни во своите одлучувања, самите прават проценка“, рече таа одговарајќи на новинарско прашање. На нејзино барање, потоа биле земени примероци од шест точки, меѓу кои и онаа на која градоначалникот утредента зел мостра. Резултатите, вели, не се такви какви што ги презентирал градоначалникот.
Прашана дали тоа значи дека се спорни резултатите на акредитираните лаборатории, Гиновска рече: „Не тврдам и не навлегувам во тоа дали се спорни, но резултатите кои беа прочитани од страна на градоначалникот не беа веројатно точно прочитани. Тој направи паника и рече дека неколку стотици пати над дозволеното има цијанид“.
Oд СДСМ потоа изјавија Гиновска ги штити загадувачите, наместо граѓаните. Застрашувачка е леснотијата, велат о СДСМ, со која Гиновска признава дека двајцата инспектори кои биле на должност по преливањето на јаловиштето во Тораничка река се во тесни релации со рудникот Булмак, односно едниот инспектор е поранешен вработен во рудникот додека сопругата на другиот работела во споменатата компанија. Дополнително, како што се додава, загрижува и леснотијата со која Гиновска констатира дека инспекторите кои требало да го контролираат рудникот се бивши раководители и вработени во „Булмак 2016”.
Во извештајот на Државниот инспекторат се вели дека инцидентот се случил поради пукање на цевка која доведува технолошка вода.
На компанијата „Булмак“ 2016 изречена и е казна од 180.000-200.000 евра за правниот субјект и 10.000 евра за одговорното лице, која е најголема казна во законот за животна средина. Компанијата потпиша спогодба и предметот е предаден на Комисијата за спогодување, при Министерството за животна средина и просторно планирање.
Македонија
ВМРО-ДПМНЕ: Левица и Апасиев беа против извршители, а од нив купуваат одземен имот за 3 пати пониска цена

Левица и Апасиев кои што декларативно, само за собирање на политички поени, беа против извршителите, сега, на дело, се соработници и од нив купуваат имот одземен од македонски граѓани или фирми, велат од ВМРО-ДПМНЕ преку соопштение.
„Тие се фатени живи во сомнителна зделка на деценијата, во која конфискуван имот од извршител во центарот на Скопје го купиле за три пати пониска цена од пазарната.
Само Димитар Апасиев и Левица можат да купат преку извршител одземен имот од некој граѓанин или фирма кои не можеле да го враќаат кредитот, и тоа по багателна цела.
Освен ова, уште поспорен е и ставот на Левица дека извршителот немал ништо со купопродажните преговорите, туку дека тие се договориле со банката и објектот го земале со хипотекарен кредит.
Оттука, легитимно се покренуваат дилеми и се поставуваат прашањата за евентуални договори под маса на сите засегнати страни, Левица и Апасиев, банката и извршителот. Како на пример, ако договарале со банката, како истите ја постигнале таа цена, кога во овој дел од градот, односно централното градско подрачје, цената за метар квадратен е за три пати повисока? Дали има некој скриен договор или друга услуга која не е заведена во договорот?
Додека Апасиев и Левица купуваат одземен имот за три пати пониска цена од пазарната од извршители, кои конфискуваат имоти од граѓани во финансиски потешкотии, граѓаните ја немаат таа среќа да се договорат со некоја банка ниту за приближно таква ниска цена.
За сето ова јавноста очекува и заслужува одговори, а надлежните органи треба да покренат сеопфатна истрага во која темелно ќе го истражат случајот“, се вели во партиското соопштение.
Македонија
(Видео) Приведен прилепчaнец поради видеото со пукањето од балкон, се трага по уште едно лице

Приведен е 51-годишен прилепчанец од селото Црнилиште Општина Долнени поврзан со видеото со пукањето споделено на „Фејсбук“. МВР трага и по неговиот син.
Од полицијата информираа дека во домот на 51-годишниот Џ.Ќ. во селото Црнилиште, прилепко, најдени се полуавтоматска ловна пушка, репетирачки карабин и полуавтоматски пиштол кои ги поседувал со дозвола, како и 395 куршуми различен калибар, 17 парчиња ловен патрон и еден ресивер поврзан на видеонадзор инсталиран во домот.
„Пронајдените предмети се одземени поради сомнение за предвизвикување општа опасност“, велат од МВР.
Со оглед на тоа што оружјето го поседувал со дозвола, привремено е одземено по што ќе следи постапка за одземање на дозволата.
Тој е приведен, а се преземаат мерки за пронаоѓање на неговиот син.