Македонија
Бојмацалиев: Поднесени 200 кривични пријави против 865 сторители во периодот 2017-2023 од Одделот за сузбивање организиран и сериозен криминал
Дополнителниот заменик-министер за внатрешни работи, Митко Бојмацалиев, заедно со директорот на Бирото за јавна безбедност, Сашо Тасевски, оствари работна средба со раководството на Одделот за сузбивање организиран и сериозен криминал при МВР со цел увид во постигнатите резултати и планирање на идните активности.
Притоа Бојмацалиев од страна на раководството на ОСОСК беше брифиран за работата на оваа организациска единица, од каде што, меѓу другото, истакнаа: „Неоспорни се резултатите на МВР во борбата против организираниот криминал и корупцијата. На тоа укажуваат и бројките од 2019 година наваму. Откривачката функција на полицијата во 2021 година беше зголемена дури 50 % и од година на година се зголемува. Од страна на организациските единици во Одделот за сузбивање организиран и сериозен криминал, само во текот на 2023 година беа поднесени 36 кривични пријави против 175 физички лица, а кривично беа пријавени девет организирани криминални групи. За првите два месеца од 2024 година поднесени се вкупно шест кривични пријави за 10 кривични дела, а кривично се пријавени 17 сторители, односно 13 физички лица“, брифираа од ОСОСК.
Имено, во периодот 2019 година до крајот на 2023 во однос на резултатите на Одделот за сузбивање организиран и сериозен криминал поднесени се 200 кривични пријави против 865 сторители по разни основи. Сузбиени се повеќечлени организирани криминални групи, кои дејствувале во повеќе области – злоупотреба на службената положба и овластувањето, шверцување мигранти, тероризам, даночна измама, недозволена трговија со дрога и оружје, кривични дела против културното наследство и финансиски криминал, беше истакнато на состанокот и констатирано дека успехот е евидентен како во оперативните активности така и во криминалистичките истражувања.
Сериозен успех Одделот бележи и во делот на криминалистички истражувања. Така, во текот на 2023 година активни биле 50 криминалистички истражувања, во кои биле опфатени 458 лица, од кои во тековната година 13 криминалистички истражувања биле затворени со вкупно 94 лица.
Најголем број од криминалистичките истражувања и оперативни активности биле од областа на недозволената трговија со дрога, а како карактеристични случаи во тој дел се една оперативна активност и криминалистичко истражување. Оперативната активност во однос на сузбивање на меѓународна организирана криминална група во делот на недозволена трговија и транспорт на големи количини наркотична дрога кокаин во Република Албанија, организирана од криминална група составена од македонски државјани, при што запленети се 324.4 килограми.
Криминалистичкото истражување за недозволена трговија со дрога BMK, во соработка и координација со Јавно обвинителство за гонење организиран криминал, Јавно обвинителство на Турција, царинските служби на Турција и Северна Македонија, како и СЕЛЕК (Центарот за спроведување на законите во Југоисточна Европа), при што поднесени се две кривични пријави против четири лица и запленети се 1002,52 кг фенилацетон или бензил метил кетон (BMK), главен прекурсор за добивање амфетамински тип стимуланси, класифициран во прва категорија на националната листа на прекурсори.
Бојмацалиев на крајот од состанокот со раководството на ОСОСК истакна:
„Со големо задоволство можам да кажам дека за оперативните активности и криминалистички истражувања колегите од Одделот за сузбивање организиран и сериозен криминал се наградени од страна на СЕЛЕК со две награди во 2021 и во 2022 година, со прво место во Југоисточна Европа“, со уверување дека раководството и вработените во оваа организациска единица ќе продолжат со засилена динамика да ги спроведуваат сите оперативни активности, кои значат намалување на севкупниот криминал на државата и гарантирање на безбедноста на граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Измамена 76-годишна битолчанка: се претставил како лекар и ѝ зел 7.000 евра за да ја спаси внуката повредена во сообраќајка
Во полицијата во Битола, 76-годишна жена вчера пријавила дека била измамена за 7.000 евра.
„76-годишна жена од Битола пријави дека била измамена од страна на непознато машко лице, кое и се јавило на телефон и ѝ се претставило како лекар, по што и кажало дека нејзината внука е тешко повредена во сообраќајна несреќа и треба да даде пари за да ѝ го спаси животот. Пријавителката заедно со сопругот однеле 7000 евра и ги дале на едно лице кое, според договорот, ги чекало кај саатот во Битола. Подоцна, пријавителката сфатила дека била измамена односно дека нејзината внука не учествувала во сообраќајна несреќа“, соопшти МВР.
Полицијата презема мерки за расчистување на случајот.
Македонија
Панична пропаганда се за Петрушевски обвинувањата од СДСМ за реформите во ВМРО-ДПМНЕ
„Обвинувањата на СДС се класичен пример на панична пропаганда без факти и без аргументи“, рече денес пратеникот од ВМРО-ДПМНЕ, Бране Петрушевски, одговарајќи на обвинувањата од СДСМ дека место нови лица старата банда е реформата во ВМРО-ДПМНЕ.
„Факт е дека Драган Ковачки поседува валиден НАТО сертификат, што целосно ги демантира лагите дека бил ’одбиен од НАТО’ или дека не исполнувал безбедносни услови. Сѐ друго е злонамерна конструкција за дневнополитички потреби. ВМРО-ДПМНЕ спроведува внатрепартиски реформи согласно Статутот и со јасна цел, ефикасна, одговорна и европски ориентирана партија. Обвинувањата за наводна контрола врз институции и медиуми се неосновани и доаѓаат од структури кои со години ја злоупотребуваа државата и сега се плашат од одговорност“, рече Петрушевски.
ВМРО-ДПМНЕ, како што нагласи Петрушевски, останува цврсто посветена на политиките што значат Македонија интегрирана во ЕУ, стабилен НАТО партнер и заштита на државните и националните интереси.
Македонија
Во 15 контејнери собран над еден тон текстилен отпад во Кисела Вода: жителите на Расадник со најголем интерес
Еден тон текстилен отпад е собран за само еден месец од поставувањето на првите контејнери за текстилен отпад на територијата на општина Кисела Вода, соопштија денес општинските власти.
Според податоците добиени од лиценцираната компанија ЕКО-ТЕКС ГРУП ДОО Скопје, најголема количина е собрана од контејнерот поставен во населбата Расадник, што општинарите велат дека укажува на висок интерес и активна вклученост на граѓаните во процесот на селектирање и правилно одлагање на текстилниот отпад.
„Во моментов се поставени 15 контејнери на различни локации пред месните заедници, а паралелно се изработуваат уште 15 нови, кои во следната фаза ќе бидат поставени пред основните училишта и детските градинки. Со тоа, вкупниот број ќе достигне 30 контејнери, а иницијативата ќе добие и силна едукативна компонента, насочена кон најмладите“, велат од Општината.
Ова е првпат во општина Кисела Вода да се воспоставува ваков систем за собирање текстилен отпад, преку договорот што беше потпишан меѓу градоначалничката Бети Стаменкоска Трајкоска и Фаик Мифтари, управител на ЕКО-ТЕКС ГРУП ДОО Скопје.
„Со поставувањето на контејнерите за текстилен отпад правиме уште еден суштински исчекор кон современо, одговорно и одржливо управување со отпадот. Фактот што за само еден месец е собран еден тон текстилен отпад покажува дека граѓаните ја препознаваат важноста на оваа иницијатива. Ова партнерство не претставува само техничко решение, туку вложување во едукацијата, свеста и иднината на нашата заедница. Преку ваквите проекти испраќаме јасна порака дека заштитата на животната средина е заедничка обврска и трајна вредност. Искрена благодарност до ЕКО-ТЕКС ГРУП за нивната општествена одговорност и придонесот кон почиста и поздрава околина“, рече градоначалничката Бети Стаменкоска Трајкоска.

