Македонија
Бојмацалиев: Со пет пловни објекти ја гарантираме безбедноста на границата и на Охридското Езеро
Дополнителниот заменик-министер за внатрешни работи, Митко Бојмацалиев, заедно со директорот на Бирото за јавна безбедност, Сашо Тасевски, и со помошник-директорот на Одделот за гранични работи и миграции, Сашо Смилески, остварија работна посета на Охрид, каде што се сретнаа со раководството на СВР Охрид, а ги посетија и вработените во управните служби на оваа организациска единица.
Воедно, делегацијата заедно со претставници на заинтересираните медиуми ќе ги посетат и Езерската полиција и граничниот премин Св. Наум демонстрирајќи ги на дело капацитетите на Езерска полиција. Посетата е во рамките на серијата посети што ги реализираме во сите сектори во земјавт како би се запознале одблиску со постигнатите резултати и секојдневните работни активности, но и со евентуалните проблеми во рамките на работниот процес.
„Од страна на раководството на СВР Охрид бев брифиран за постигнатите резултати на оваа организациска единица изминативе три месеци од оваа година, a безбедносната состојба ja оценивме поволна на задоволително ниво, со зголемена ефикасност во расветлувачката дејност за 46 %. На подрачјето на Охрид се бележи намалување на вкупно регистрирани кривични дела од 13,5 %. Имаме зголемен број поднесени кривични пријави во делот на економскиот криминалитет за 35 % и во делот на класичниот криминал за 10 %. За одбележување е и намалување на бројот на сообраќајни незгоди на подрачјето на СВР Охрид за 4 % и намалување на сообраќајните незгоди со телесни повреди за 9 %. Воедно, од увидот во работата на управните служби тука во Охрид можам да констатирам дека состојбата е редовна“, рече Бојмацалиев во изјава за медиумите. Притоа тој се осврна на зајакнувањето на капацитетот во делот на гарантирање на безбедноста на границите, особено на Охридското Езеро.
„Во 2020 година беа набавени пет нови пловни објекти со цел зајакнување на капацитетите за заштита на границите, особено на Охридското Езеро. Две пловила во вредност од 8.055.000 илјади денари беа набавени со средства од буџетот на Министерството, а три (два пловни објекта со цврсто корито и еден гумен патролен чамец) се донација од Чешка во вредност од над 8.000.000 денари. Пловните објекти се опремени со професионални уреди за навигација, радар и затворена кабина за екипажот, а патролниот гумен чамец е погоден за брзи интервенции во разни инцидентни ситуации и контроли на водниот сообраќај, особено во летниот период во трите езера. Ваква набавка беше направена првпат по 20 години“, истакна Бојмацалиев со уверување дека колегите од СВР Охрид ќе продолжат со несмален интензитет во полициското работење, а со цел одржување поволна безбедносна состојба и гарантирање фер и демократски изборен процес, што ни претстои наредниов период.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
МНР повика на внимателност од државните функционери: Со Грција развивме политички дијалог на високо ниво
Министерството за надворешни работи објави дека ја потврдува цврстата определба на земјата кон недвојбено почитување на Уставните одредби како и сите меѓународно преземени обврски како што е целосното почитување на Договорот за стратешко партнерство меѓу Северна Македонија и Грција, познат како Договорот од Преспа.
„Изминативе седум години, двете соседни земји развија исклучително високо ниво на политички дијалог, кое резултираше и со неколкукратно зголемување на економската соработка и изградбата на позитивни врски меѓу луѓето. Овие придобивки резултираа со членството на земјата во НАТО, Отворање на преговорите со Европската Унија, како и со надградба на Стратешкото партнерство во Стратешки дијалог со САД“, велат од МНР.
Повикуваат на внимателност од страна на сите политички чинители, особено на избраните државни функционери.
Од тука додаваат дека задржувањето на евроатлантскиот курс на земјава претставува основен стратешки интерес и гарант за долгорочната безбедност и стабилност на земјата.
Новоизбраната претседателка Гордана Силјановска-Давкова, на вчерашната инаугурација во Собранието положи заклетва за претседател во која го употреби името Македонија, што предизвика реакции во Грција, а грчката амбасадорка демонстративно ја напушти пленарната сала во Собранието. Грчкото МНР излезе со остра реакција, коментирајќи дека се прекршува договорот од Преспа. ЕУ повика на почитување на договорите кои, како што велат, се неопходни за продолжување по патот во Европската Унија. Утрово реагираше и грчкиот премиер Киријакос Мицотакис кој рече дека нема да прифатат слични лапсузи.
Македонија
Мицотакис до Силјановска: Категорично наведуваме дека нема да прифатиме слични лапсуси
Грчкиот премиер Кирјакос Мицотакис го изрази грчкото неодобрување на ставот и постапките на македонската претседателка Гордана Сиљановска Давкова, која се заколна во името на „Македонија“, а не на „Република Северна Македонија“ како што е предвидено со Договорот од Преспа, пишуваат утрово грчките медиуми.
„Категорично наведуваме дека нема да прифатиме слични лапсуси. И повторуваме дека секој напредок во билатералните односи, како и секој чекор на Скопје кон Европа, зависи од искреното почитување на договорите. Од правилната употреба на уставното име на соседната држава. И, секако, од избегнување предизвици. Провокативниот избор на новата претседателка на Северна Македонија да го прекрши официјалниот текст на заклетвата и да ја нарече својата земја со друго име е незаконска и недозволива иницијатива. Акт со кој се крши Договорот од Преспа и самиот Устав на нејзината држава. Сепак, поткопувајќи ја нејзината иднина, како што веќе изјавија претседателката на Европската комисија, Урсула фон дер Лајен и претседателот на Европскиот совет, Шарл Мишел, нагласува Мицотакис во својот пост на Фејсбук.
Претседателот на Европскиот совет, Шарл Мишел, во објава на Х, го опиша фактот што новата претседателка на Северна Македонија не го употреби уставното име на земјата за време на церемонија на полагање заклетва како многу разочарувачки.
Congratulations to the new President of North Macedonia, Gordana Siljanovska-Davkova.
I look forward to working with you on advancing 🇲🇰 path towards the EU, through implementation of reforms and commitments.
The future of North Macedonia & the Western Balkans is in 🇪🇺.…
— Charles Michel (@CharlesMichel) May 12, 2024
Скопје
Без струја корисници од село Долно Лисиче
Без струја од 08:30 до 15 часот ќе бидат корисници од село Долно Лисиче (објекти на патот кон Драчево и ул.„10“), најави Регионалниот центар за управување со кризи (РЦУК) Скопје.
Прекинот е поради планирани технички интервенции во електродистрибутивната мрежа.