Македонија
Бојмацалиев: Во 2017 – 2024 приведени над 7.000 лица од страна на Секторот за меѓународна полициска соработка

Дополнителниот заменик министер за внатрешни работи Митко Бојмацалиев, заедно со директорот на Бирото за јавна безбедност Сашо Тасевски остварија работна посета на Секторот за меѓународна полициска соработка (СМПС) во кругот на МВР, во рамки на посетите на организициските единици на БЈБ и МВР, со цел увид во досега постигнатото и мапирање на идните активности. Притоа, тие остварија средба со раководството на Секторот за меѓународна полициска соработка, со началниците на Одделението за ЕВРОПОЛ, Одделението за ИНТЕРПОЛ и Одделението за потраги. Улогата на оваа организациска единица е да врши меѓународна координација на органите за спроведување на законот кои се надлежни за откривање и гонење на сторители на кривични дела, а кои се во полето на меѓународната полициска соработка.
Од страна на раководството на СМПС, Бојмацалиев и Тасевски беа брифирани за резултатите од 2017 до 2024 година, односно за приведени над 7.000 лица по централни потерници и расписи.
Во оваа прилика Бојмацалиев ја потенцираше успешната организација на 50. Европска регионална конференција на ИНТЕРПОЛ, на која Република Северна Македонија минатата година беше домаќин во Охрид, што се совпадна со одбележувањето на 30-годишнинатата од нашето членство во најголемата полициска организација во светот и 100 години постоење на ИНТЕРПОЛ. Република Северна Македонија бележи три децении кредибилно партнерство на ИНТЕРПОЛ со учеството во бројни операции на организацијата, како и силна поддршка за развој, поврзување и усогласување на националниот форензички систем со системите на ИНТЕРПОЛ. На средбата Бојмацалиев и Тасевски беа информирани за успешната модернизација на комуникацискиот систем на Националното централно биро на ИНТЕРПОЛ.
Во однос на ЕВРОПОЛ, Европската Агенција за спроведување на законот, бележиме одлична соработка во повеќе области од заеднички интерес, како што се спречувањето на недозволена трговија со дрога, шверц со оружје борбата против илегална миграција, борба против корупција, како и сајбер безбедност како форма на современ безбедносен предизвик. Северна Македонија и Министерството за внатрешни работи се сериозен партнер во борбата против криминалот, а нашата држава е прва земја потписничка на Договорот за оперативна и стратешка соработка со ЕВРОПОЛ. На средбата Бојмацалиев и Тасевски беа информирани за значителното зголемување од 45% на отворени предмети на ова одделение, како и за поврзаноста со SIENNA комуникациската алатка за која нашите вработени се обучени и можат да вршат обуки.
На крајот од средбата Бојмацалиев и Тасевски изразија благодарност до раководството на Секторот за меѓународна полициска соработка при БЈБ, при што посакаа уште многу успеси во полициското работење кое е во нивна надлежност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ реагира: СДС е последната партија што може да зборува за правда и култура

„Кога СДС зборува за правда, тоа звучи исто како крадец да држи предавање за чесност. Кога СДС зборува за култура, тоа звучи како пироман да се фали дека го изгаснал пожарот. СДС, како и секогаш, кога институциите конечно почнуваат да работат професионално, после хаосот што го оставија зад себе, се обидува да шири лажни вести, страв и дезинформации. Тоа не е ништо ново, тоа е нивна стара стратегија – кога немаат аргументи, измислуваат афери“, реагира ВМРО-ДПМНЕ на соопштението на СДСМ.
„Меѓутоа, јавноста добро памети.
Во време на СДС:
– се гасеа истраги и се уценуваа обвинители;
– криминалци од врвот на власта беа заштитени како свети крави;
– граѓаните беа сведоци на политички прогон на неистомисленици;
– Врховниот суд беше партиски штаб, а Советот на јавни обвинители нем набљудувач на криминалот.
Министерството за култура, во нивно време, беше претворено во каса за партиски трансакции и награди за блиски личности. Грантови се делеа без критериуми, по телефон, по пријателски врски и по заслуги кон партијата. Уметниците кои не беа лојални, беа игнорирани или санкционирани. Установите беа блокирани, а културата сведена на приватен бизнис за избрани поединци.
Културните работници, вистинските уметници и институциите денес конечно здивнаа. Заврши времето кога маички XXL и авионски карти за егзотични дестинации се купуваа од државни пари, додека проекти од национална важност беа одбивани.
ВМРО-ДПМНЕ нема да дозволи притисоци врз обвинителството, но ниту ќе дозволи заштита за било којшто се огрешил пред законот – без разлика на партиска, етничка или друга припадност.
Тоа е разликата меѓу нас и нив!
Ние се бориме за држава на еднакви, не на привилегирани!
Тие се борат да се вратат на власт за повторно да ја контролираат правдата и да продолжат со грабежот.
Но времето на криминалците заврши.
Македонија е во рацете на чесните граѓани“, се наведува во соопштението на ВМРО-ДПМНЕ.
Македонија
Струмичко-скопскиот епарх монсињор д-р Киро Стојанов упати писмо по повод упокојувањето на папата

Скопскиот бискуп и Струмичко-скопски епарх монсињор д-р Киро Стојанов, на Светол Понеделник, 21 април 2025 година упати писмо до сите парохии и монашки заедници во Македонија по повод упокојувањето на папата Фрањо.
„Драги браќа свештеници, чесни сестри и верници,
Со голема тага, но и со вера во воскресението и животот вечен, денес во утринските часови на Светол Понеделник, 21 април 2025 година, Господ го повика кај Себе Својот слуга, и наш возљубен пастир, Петровиот наследник, папата Фрањо.
Благодарни сме на Бога за неговиот понтификат, кој на негов својствен начин го покажуваше постојано милосрдното лице на Отецот, а посебно беше глас на сиромашните и маргинализираните. Благодарни сме на неговата Апостолска посета на Македонија во мај 2019 година, која ќе остане во нашите сеќавања и запишана во историјата на Република Македонија. Неговото заземање за мир во светот, за дијалог и братство меѓу народите ќе останат негов завет за идните генерации.
Во овие денови на жалост, како Црква сме повикани на единство и благодарност за дарот што Господ ни го даде преку папата Фрањо. Со вера и надеж да молиме од Воскреснатиот Христос, да ги слушне евангелските зборови: Добар и верен слуго, влези во радоста на својот господар! (сп. Матеј 25,21) и да го прими во Неговото царство.
Ги повикувам сите свештеници и монашки заедници, како и сите верници да се обединат во лична молитва за покојниот папа Фрањо и одредувам денес од сите цркви во 15.00 часот да се огласат камбаните, пропратени со молитви на верниците. Одредувам ден пред неговиот погреб во сите цркви да се служи света Литургија задушница за папата Фрањо“, се наведува во писмото.
Македонија
На „Табановце“ и „Богородица“ за влез во државата се чека околу 20 минути

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е умерен. На граничните премини „Табановце“ и „Богородица“ времето на чекање за влез во државата изнесува околу 20 минути. На останатите гранични премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.