Еврокомесарот за проширување, Оливер Вархељи пред Комисијата за надворешни работи на Европскиот парламент потврди дека извештаите за реформскиот напредок на земјите од Западен Балкан се одлагаат за септември, но не и преговарачките рамки за Северна Македонија и Албанијa.

„Работиме деноноќно и со Ковид-19 и со оглед на тоа дека е тешко да се предвиди каква ќе биде економската состојба, исто е тешко да се види како ќе се испорачаат реформите затоа што, се разбира, Ковид-19 ја кочи работата. Сакаме да излеземе со суштински извештај, добар извештај, кој ќе даде процена за напредокот. Мојот фокус сега е повеќе на преговарачките рамки за двете земји, Северна Македонија и Албанија. И тоа што можам да го кажам е дека овие ќе бидат објавени во јуни. И мислам дека ова е клучен дел за да го задржиме моментот што се создаде“, рече Вархељи пред европратениците.

Во однос на преговарачките рамки, тој рече дека тие ќе бидат придружени од процена за реформскиот напредок.

„Ќе излеземе набргу и се надевам до септември, во зависност од агендата, со вообичаениот пакет, пакетот за проширување. И се надевам исто да излеземе со планот за инвестиции и економски развој за Западен Балкан во септември“, додаде еврокомесарот за проширување.