Македонија
Вештаците не се појавија на рочиштето за Ласкарци, роднините на починатите се сомневаат во правосудниот систем

По одржани 107 судски рочишта и приближно толку одложени, роднините на загинатите во автобуската несреќа велат: „Судскиот процес оди во насока да се заборави случајот“. Ова по денешното одложено рочиште, на кое не се појавија вештаците што требаше да го презентираат супервештачењето, кое се чекаше цела година, го изјави Синиша Ристески, брат на починатиот Дејан Ристовски. Следното рочиште е закажано за четврток, но роднините се сомневаат дека и тогаш нема да се одржи.
„По четири години од трагедијата кај Ласкарци, со 16 починати, повеќе од 30 наши сограѓани со тешки повреди и трауми до крајот на својот живот, одржани 107 судски рочишта, приближно толку откажани, супервештачење, кое го чекавме повеќе од една година, и кога денеска требаше да се појават вештаците – не дојдоа. Повторно ми создава сомнеж дека овој судски процес оди во насока да се избегнат сеќавањата и да се заборави. И со тоа да не се даде можност вистината и правдата да излезат на виделина“, вели Синиша Ристески.
И натаму сите роднини што чекаат правда за несреќата и виновниците да одговараат – посочуваат дека се сомневаат во правосудниот систем.
„Што се однесува до денешното рочиште, на кое требаше да бидат вештаците и да ги објаснат своите заклучоци, иако уредно беа поканети според судечкиот совет, тие денеска не се појавија, така што, по ова, повторно се остава простор за сомнеж и иако за четврток судот се согласи дека ќе бидат присутни вештаците, во тоа не можеме да бидеме сигурни додека не се одржи“, додава тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.