Строги и јасни критериуми по кои ќе одлучуваат новооформените комисии на претстојниот конкурс за проекти во културата, нулта толеранција за корупцијата во ресорната дејност, најавува министерот за култура, Асаф Адеми, во интервју за „Макфакс“.

Според него, во минатото бил искреиран длабок јаз меѓу Албанците и Македонците и тоа било диригирано преку ова министерство.

„Со проектот Скопје 2014 само се продлабочи етничкиот јаз. Бев голем противник на овие градби кои немаат никаков интерес за националното добро и не беа во интерес на граѓаните. Сметам дека и вметнатите албански проекти како дел од оваа приказна не беа во ред. Ние треба да го негуваме заедничкото културно наследство, а министерството да дава поддршка на проекти од севкупен интерес на граѓаните“, смета Адеми.

На прашањето за скандалозните криминали и злоупотреби што и натаму се откриваат во културата, Адеми е дециден дека треба да излезат пред лицето на правдата. За него не може да постои никаков имунитет, и ако некои видни личности го прекршиле законот, треба да одговараат.

„Во Македонскиот народен театар се открија злоупотреби и за истите ќе одговараат сторителите. Институциите на системот ќе си ја преземат работата и немам намера да штитам никого, независно дали бил познат уметник или видна личност“, вели Адеми.

Министерството за култура соработува со Обвинителството и специјалното јавно обвинителство и на располагање им е целата документација што им е потребна.

За новиот проект вреден 40 милиони евра што треба да биде изграден во Тетово, а ќе вклучува библиотека, театар и кино-сала, министерот вели дека нема ништо спорно.

„Срамота е град како Тетово да нема објект достен за културни активности. Ќе бидат испочитувани сите правни насоки и се надевам дека резултатот ќе им донесе добро на сите граѓани на Тетово“, вели Адеми.

На новиот конкурс за поддршка на проекти во Министерството за култур, ќе се воведат промени во критериумите и ќе бидат оформени сосема нови комисии што ќе одлучуваат за проектите по дејности.

„Претседателите на комисиите ќе бидат апсолутно одговорни за тоа кои проекти ќе ја добијат поддршката. Направивме измени во критериумите, поточно востановивме појасни и построги“, најавува Адеми.

Во врска со реакцијата на Министерството за култура, која се однесуваше на филмот „Ругање со Христа“ на Јани Бојаџи, Адеми вели дека инспекциите согласно со правната регулатива ќе утврдуваат дали во поддршката на филмот се испочитувани потребните правни нормативи и дали филмот поттикнува говор на омраза.

„Некои добронамерни луѓе ми рекоа дека направивме многу реклама на филмот, а нашата цел беше само да укажеме на штетноста на проекти кои поттикнуваат омраза“, смета тој.

Адеми во креирање на културната политика вели дека ќе го употреби сиот минат труд, што вклучува дипломатско и бизнис-искуство. Тој бил амбасадор во Данска од 2009 до 2013 година, а по вокација е градежен инжинер. Неговото искуство со менаџирење на сопствената компанија, која има 100 вработени, вели дека му помага во менаџирање со Министерството за култура.

Самиот е љубител на филмската уметност, но вели дека ужива во сите уметнички дејности.