„Објавуваме уште еден скандал на министерот за земјоделство Љупчо Николовски, овој пат поврзан со закуп на земјоделското земјиште во државна сопственост. Имено, со потпис на Љупчо Николовски како министер за земјоделство се доделува градежно земјиште во градежен реон на град Скопје како земјоделско земјиште. Дојдовме до информации и документи што индицираат на директна вмешаност на Николовски во огромна измама“, рече на денешната прес-конференција Цветан Трипуновски, претседател на Комисија за земјоделство, шумарство и водостопанство на ВМРО-ДПМНЕ.

Трипуновски презентира „договор за закуп на земјоделско земјиште склучен помеѓу МЗШВ потпишан од Николовски, од една страна, и извесен Имер Нухи, од друга. Со овој договор Имер Нухи добива 1.564 квадратни метри градежно земјиште на територијата на општина Бутел под образложение дека закупил земјоделско земјиште во државна сопственост во време траење од 70 години за садење лешников насад“.

„Со овој договор закупецот добива право на градежно земјиште во урбана зона за надомест од 5.745 денари годишно. За јавноста да има точна претстава за што точно станува збор и за тоа дека има сериозни индиции за криминал укажува и самиот факт што квадратен метар градежно земјиште, во овој реон чини од 150 евра па нагоре, односно за целата парцела над 250.000 евра. Но, небулозите не застануваат тука. Огласот на кој се повикува повикот за закуп на Нухи е поништен, односно не дошло до легален избор за закуп, но сепак договорот е склучен и потпишан од министерот Николовски. Јавниот повик 01/21 врз основа на кој е дадено ова градежно земјиште под закуп е поништен на 12 јануари 2022 година со решение број 41-216/6 и тоа е објавено во ‘Службен весник’ број 9 истата година“, вели Трипуновски.

Тој вели дека „овој договор е нелегален и не можел воопшто да биде склучен. Но, симптоматично е тоа што и покрај тоа што е нелегален и не можел да биде склучен, сепак на овој договор стои штембил на МЗШВ дека е издаден од нивната архива, а на задната страна стои печатот на Министерството и потпис на министерот Николовски“.

„Го повикувам Љупчо Николовски веднаш да си поднесе оставка од позицијата, а ЈО да постапи по случајот и да поведе истрага по допрен глас“, рече Трипуновски.