Македонија
(Видео) Арсовски: Димова доделила речиси 55.000 евра на училиште во кое работат роднини на Маричиќ и неговата сопруга
 
																								
												
												
											Лидија Димова мора веднаш да си даде оставка од позицијата директор на Националната агенција, бидејќи е заглавена во сомнеж за криминал до гуша, обвини портпаролот на ВМРО-ДПМНЕ, Димче Арсовски.
„Денеска сакаме да поставиме неколку прашања во врска со проект кој е доделен на средното општинско училиште ‘Коле Нехтенин’ од Штип, проект во вредност од над 54.000 евра, за едукација за туризам на Кипар. Прашањата коишто сакаме да бидат одговорени, коишто јавноста бара да бидат одговорени се следни:
Дали за овој проект што го споменав претходно, во вредност од 54.000 евра, за ова училиште да го добие главен протеже во Националната агенција била претседателката на Управниот одбор во истата агенција, Маринела Тушева, инаку сопруга на министерот за правда Бојан Маричиќ?
Бидејќи, прва братучедка на Маринела Тушева е Јулијана Саздова, наставник вработен во средното општинско училиште „Коле Нехтенин“, кое го добило проектот, додека, пак, нејзиниот татко, а вујко на Маринела Тушева е Нако Ташков, инаку член на училишниот одбор во училиштето.
Дали Маринела Тушева помогнала проектот да го добие училиштето во кое работи нејзината прва братучетка, а нејзиниот вујко е член на училишниот одбор?
Дали има одлуки на наставнички совет, училиштен одбор и Управен одбор за подготовка на апликацијата и реализација на истиот проект за кој се побарувани парите? Дали поминала одлуката на гласање на некое од овие тела коишто ги споменав?
Потребно е да се направи план за посебна проектна сметка во буџетот на училиштето, преку која ќе се реализира овој проект. Дали има таква сметка во училиштето?
Дали воопшто некој знае дека овие средства влегле во училиштето?
И за крај, каде и на чии сметки завршиле овие пари, односно кој е финалниот извештај, и дали ќе може да биде објавен од страна на Националната агенција и училиштето за да се отстранат сите сомнежи?
Па така, ако сè уште не ви е јасно од каде ѝ е силата на Лидија Димова и зошто сè уште не е сменета и разрешена од директор на институцијата, од страна на Управниот одбор на Агенцијата кој го води Маринела Тушева, одговорот може да го добиете во оваа прес-конференција“, порача Арсовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
 
																	
																															Македонија
Сиљановска-Давкова: Во мировните преговори со само 7% учество во минатата година жените имаат симболична улога
 
														Претседателката Гордана Сиљановска-Давкова денеска се обрати на конференцијата по повод 25-годишнината од донесувањето на Резолуцијата 1325 на Советот за безбедност на ООН ,,Жени, мир и безбедност”.
Воден од разумот и дијалогот, наспроти силата и војната, според Сиљановска – Давкова, Советот за безбедност со Резолуцијата втемели нова перцепција за жените: од неми сведоци и жртви на насилството, тие станаа активни миротворки
Според претседателката, проблемот не се реши ниту до оваа, ниту со десетината други резолуции зашто жените и девојчињата сè уште се најчестите и најголемите жртви на војните.
,,Војната ги лишува женските суштества од човечкиот субјективитет, ги дехуманизира и инструментализира за воени цели”, истакна таа.
Во мировните преговори со само 7% учество во минатата година жените имаат симболична улога.
Таа предупреди на неодржливоста на реалноста во којашто машката половина од човештвото поседува апсолутна моќ на одлучување за мирот и војната, а женската – никаква.
Сиљановска-Давкова смета дека е крајно време да сфатиме дека родовата еднаквост не е феминистичка привилегија и женски егоцентризам, туку хуманистички императив, бидејќи насилството и безбедноста не се женски, туку клучни општествени прашања.
Покрај претседателката, на настанот се обратија: Владо Мисајловски, министер за одбрана; Михалис Рокас, амбасадор на Европската Унија и Весна Ивановиќ-Кастаред, раководителка на канцеларијата на UN Women.
Издавањето поштенска марка во чест на 25-годишнината од Резолуцијата 1325 на ООН ,,Жени, мир и безбедност” манифестира висока демократска свест за важноста на активната улога на жените во мирот и безбедноста.
Македонија
Мециновиќ: Страшна злоупотреба и кривично дело е обелоденувањето на мојот матичен број
 
														Во овие избори се случи, мислам дека, преседан кој никогаш не се случил досега. Во моментот кога јавноста сосема ги имаше вперено своите очи во два кандидати, да бидеме реални, цела Македонија гледаше кон трката за Скопје – кога бевме јас и Орце Ѓорѓиевски најрелевантни во јавниот дискурс, мене ми беше обелоденет ЕМБГ, што е длабоко класифициран податок за нашите граѓани и тоа е нешто што не се случило досега. Тоа е страшна злоупотреба и е кривично дело. И тоа не само што е кривично дело, туку е во отежнети околности, одговори на новинарско прашање кандидатот за градоначалник од Левица за Град Скопје, Амар Мециновиќ на денешната прес – конференција.
На новинарско прашање дали Мециновиќ смета дека институции работеле во корист на неговиот противкандидат, тој даде дополнително образложение:
,,Која институција се обиде да превенира таква ситуација? Која институција изреагира откако се случи таква ситуација? Ова е прашање на човекови права. Ова е прашање на правата кои ги имаме ние пред државата. Ова е прашање на тоа дека имаме неморална, неетичка, социопатска политика која живееме триесет години. Ние живееме во социопатска политичка култура, која се наметнува. И го нагласувам за сите нас, а не за мене индивидуално. Освен инцидентот со ЕМБГ, имаме уште низа измислици, шпекулации, напади по интегритет, напади по семејство, по луѓе кои не беа инволвирани во оваа кампања. Сето тоа ќе биде пропратено со тужби и со кривични пријави, така што тоа е нешто што ќе го правиме од понеделник. Сега засега е нешто што го искомунициравме и со ОПСЕ и со меѓународни инстанции, така што тоа се случи, но е само наш дополнителен поттик”.
Мециновиќ го спомена и стравот од табу, поради кој, обично, се игнорирани овие работи.
,,Во моментот кога ќе се освестиме дека за оние кои нè владеат, дека не постои табу, дека не постои морална граница, тогаш и ние ќе се ослободиме. И допрва ако го направиме тоа, ние можеме да очекуваме демократизација на атмосферата и на процесите. Никогаш веќе да не ни се повторуваат избори и процеси на одлучување кои ќе бидат длабоко, под влијание на оние кои имаат моќта. Моќта е во институциите и сите институции беа впрегнати во победа на Орце Георгиевски”, додаде Амар Мециновиќ.
Тој дообразложи и на каков начин смета дека институциите работеа во интерес на неговиот противкандидат.
,,Орце Георгиевски ги имаше сите пари на негова страна, сите привилегии за рекламирање. На крај, нè уценуваа како граѓани, ако не победи Орце, па ќе живеете во смет. Сè доби човеков. Неговиот тим вади лични документи. Тоа е нивната политика на служби, на бизниси, на репресија. Нашата политика е политика на комуникација со јавноста. Ние знаете како функционираме. Ние функционираме вака, во разговори со вас и на социјалните медиуми. Тоа е нашата комуникација. Нивната комуникација е структурирано насилство. Ова што се случи овие избори е структурно насилство, преку институциите и преку, механизмите за владеење”, рече Мециновиќ.
Македонија
Мециновиќ: Градот одби да биде уценет, Скопје се разбуди по првиот круг
 
														Народот веќе не може да биде уценуван. Тоа го видовме и во овој втор круг. ВМРО – ДПМНЕ ја наметна приказната дека ако нивниот кандидат не победи, градот нема да функционира. Тоа не помина. Градот одби да биде уценет и градот е разбуден после првиот круг и сметаме дека во недела само ќе кулминира она кое го правиме со месеци, истакна денес на прес – конференција кандидатот за градоначалник од Левица за Град Скопје, Амар Мециновиќ.
„Сакам да се заблагодарам на секој поединечно за сите триесет илјади гласови со кои дојдовме во овој втор круг да се натпреваруваме за кормилото на Град Скопје. Тоа сметам дека покажа дека во овој град има храброст, има желба да се бира поинаку и сега сме тука. Зa сите работи кои можеме по изборите да ги очекуваме, јас сакам да им порачам на граѓаните дека ако ние ја добиеме поддршката и ако победиме во вториот круг, нашиот фокус од првиот ден ќе биде на човекот. Ние како градска власт ќе правиме сè по желбите на нашите граѓани. Веќе никогаш нема да има ни една политичка пресметка, ни една бизнис пресметка, ни една калкулација, економска шпекулација или било што, што може да биде поттик и мотив за една градска власт како што сме виделе досега. Ништо од тоа нема да биде пред приоритетот на благосостојбата на нашите граѓани“, порача тој.
Во недела, додаде тој, Скопје треба да се соочи со системот.
„И сметам дека со оваа политичка мобилизација која имаше во изминатите недели, Скопје може да се соочи со системот и да ја однесе победата. Ова не е веќе само борба на еден фронт, т.е. борба за нашиот град. Ова е веќе борба малку и поширока. Тоа е борба за демократијата во Република Македонија, затоа што ние сме моментално под еден авторитарен режим на ВМРО – ДПМНЕ и нивните коалициски партнери. Како сето тоа кулминираше? Кулминираше со избори за кои сметам дека ќе останат запаметени во историјата не само по убавото нешто што се случи, а тоа е влегувањето во втор круг на кандидат кој не е поддржан од ВМРО ДПМНЕ и СДСМ, но ќе се памти и по тоа како владеачките партии изреагираа на ова оспорување на статус-квото“, рече Мециновиќ.
Според него, ова била највалканата кампања во историјата на Република Македонија.
„Кампања која се однесуваше за личност, а не за нешто сторено, затоа што никогаш досега ВМРО – ДПМНЕ немаше противник на кој не може да му каже: вие ова продадовте, вие направивте тоа. Не, едноставно сега го видовме авторитарниот нарав на ВМРО – ДПМНЕ и притоа имаше многу кривични дела во самата кампања, што е еден страшен удар по демократскиот процес. Мислам дека можеме да се согласиме, но сè ова можеме само да го искоментираме и да преминеме преку него. Јас не знам, можеби, затоа што сум чаирско дете, па сè е ок, ама ситуацијата е многу сериозна. Ситуацијата не е весела, не е за смеење, затоа што тоа што се случува денеска со нашата кампања, утре може да се случи со вас новинарите. Можеби, може да се случи со сите политички неистомисленици на ВМРО – ДПМНЕ, како што го гледавме тоа минатото, а може да се случи и на недолжни граѓани. Ние сега имаме силен аларм дека за ВМРО – ДПМНЕ и за владеачката елита во Македонија не постои граница, не постои табу, не постои морал. Сите можни механизми кои им се останати на располагање ќе ги искористат, само и само за да останат на власт. Сè ова тие не го прават за доброто на граѓаните, не го прават за наше добро. Сè ова се случува за да се исполнат желбите на малкумина луѓе. Но, токму тоа е и нашиот поттик. Токму тоа ќе го донесе и до резултатот кој го очекуваме во вториот круг”, рече тој.
„Јас на 2 ноември ќе ги повикам граѓаните да излезат и да ја изберат опцијата против режимот. Ги повикувам на оваа крајно одговорна задача, затоа што во првиот круг јас бев кандидат на Левица, во вториот круг сум кандидат на Левица и на сите скопјани. Ако се случи победата која треба да ја однесеме во недела, таа нема да биде само победа на Левица – за тоа сме сите свесни. Многу различни групи на луѓе ќе се обединат, победата на оваа кампања и баш затоа што ќе биде надпартиска победата во недела. Таква ќе биде и власта, такво ќе биде и функционирањето. А ќе добиеме и една надпартиска атмосфера. Многу различни групи со различни верувања и мислења се собраа во интерес на оние два фронта кои ви ги зборувам од почеток. Фронтот за подобар град и фронтот против авторитарната рака на сегашниот режим“, образложи и порача кандидатот за градоначалник од Левица за Град Скопје, Амар Мециновиќ на денешната прес – конференција.


 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											