Адвокатурата излезе најисплатлива професија во СДСМ. По адвокатското друштво „Калеска-Ванчева“, кое инкасирало 55.000 евра од адвокатски услуги, сега го имаме и вториот адвокат што со лесни пари од СДСМ ги заработи, без многу да се помачи, а пред еден месец стана и втор човек во партијата на власт, изјави портпаролот на ВМРО-ДПМНЕ, Димче Арсовски.

„Генералниот секретар на СДСМ, Миле Зечевиќ, од адвокатски услуги од 2019 до 2021 година има инкасирано над 30.000 евра, и тоа само од 3 општини со кои раководеле кадри на СДСМ.

Општина Неготино, Општина Пробиштип и Град Скопје, додека биле под водство на СДСМ, за 2 години му овозможиле и му дозволиле на генералниот секретар на СДСМ, Миле Зечевиќ, како адвокат да инкасира над 30.000 евра. Само од три општини заработил толку. Којзнае уште колку пари зело неговото адвокатско друштво од други институции и јавни претпријатија? Дали има еден просечен адвокат во Република Македонија без партиски повластувања кој заработува вакви лесни пари како што заработиле Миле Зечевиќ и Калеска-Ванчева?

И кога ќе размислите вака, зошто не прекинува и се шири грабањето на државните пари од сите ешалони на СДСМ, функционерски ешалони, одговорот е многу јасен – го гледаат врвот и продолжуваат надолу сите други“, рече Арсовски.

И за тоа, според него, секојдневно има афера до афера, која, како што вели, за жал, не завршува кон граѓаните оправдано затоа што оваа власт ги има правосудните органи под себе.

СДСМ и нивните функционери, како Зечевиќ, Калеска-Ванчева и другите, ги интересира власта единствено за личен бенефит, порача Арсовски.