Епидемијата на непотизам во државава се рашири во толкави размери што ги зарази сите функционери и нивните роднини од СДСМ. Упориштата на зараза се државните институции, каде што има огромни плати над просекот на платата во државата, обвини портпаролот на ВМРО-ДПМНЕ, Димче Арсовски.

„Вчера ние како ВМРО-ДПМНЕ поднесовме барање за постапување до Државната комисија за спречување корупција и во прилог доставивме список на 182 роднини во блиско крвно сродство, кои се вработени во државната администрација и државните институции. Очекуваме разврска на овој најголем случај на непотизам во историјата на Република Македонија и во најбрз можен рок антикорупционерите да ги санкционираат функционерите на СДСМ“, рече Арсовски.

Тој порача дека дополнително повикуваат уште еднаш СДСМ да си погледне во редовите и уште веднаш да ги повика функционерите да си поднесат оставки бидејќи тоа е чин на морал.

„Не е чин на морал еден член на семејството да си даде отказ на работа, а друг да не. На прсти може да се избројат роднините што си дадоа откази на работа, дали се 4 или 5. Замислете, само 4 или 5 луѓе од список со 182 си дале откази од работа од морални причини и само толку се одѕвале на повикот на Заев да си дадат откази, како што тие викаат, од морални причини“, истакна Арсовски.

Според него, отказите на овие 4-5 луѓе докажуваат дека навистина имало влијание врз вработувањата и со тоа си ја признаа вината.

„Штом има признание на вината за влијание врз вработување на роднините, функционерите на СДСМ треба уште веднаш да си дадат оставки и да сносат одговорност во согласност со законите. Толку од моралот и моралните принципи на СДСМ. Затоа, СДСМ треба и мора да ги изгуби овие избори. Овие избори се шанса за граѓаните да го симнат ова зло од власт и да се спречи епидемијата на непотизам што се шири, за жал, во епски размери“, порача портпаролот на ВМРО-ДПМНЕ.