Зоран Заев стана синоним за лаги, злоупотреби и криминал. Неколку дена откако јавноста слушна разговори од Зоран Заев, сè повеќе од неговите поранешни блиски луѓе и соработници се охрабрија да говорат за Зоран Заев и практично да го потврдат сè она што граѓаните го слушнаа во јавноста од страна на медиумите, обвини портпаролот на ВМРО-ДПМНЕ, Димче Арсовски.

„Вчерашното сведоштво на поранешната блиска соработничка на Заев и шарена револуционерка, односно активиска, Мери Николова-Буџаку, која беше дел од шарената револуција, даде јасна слика за тоа како дејствувал Зоран Заев изминативе години манипулирајќи ја целата јавност.

Таа потврди Зоран Заев пред доаѓањето на власт го заробил целиот невладин сектор во Република Македонија баш онака како што тоа го призна и Зоран Заев во аудиобомбите, кои ги слушна целата јавност. Тој поткупувал и корумпирал лица и невладини организации, кои потоа имале задача да оцрнуваат лица и слепо да им служат на неговите штетни политики што ги промовира во јавноста. Најскандалозно е признанието на поранешната соработничка на Заев, Николова-Буџаку, дека Зоран Заев ги упатувал ваквите субјекти парите да ги подигаат од самата партија СДСМ, без какво било покритие. Тоа покажува дека Зоран Заев и СДСМ имаат сериозен сомнеж дека користат црни пари со кои финансираат политички отстрел на неистомислениците. Можете да замислите од каде доаѓаат тие црни пари.

Николова-Буџаку тврди дека ѝ биле нудени пари директно од Зоран Заев за да ја поткупи нејзината наклонетост. Ова е добар сегмент каде што јавноста може да види што всушност и како корумпирал Зоран Заев во невладиниот сектор.

Затоа, бараме институциите да ги проверат овие наводи бидејќи тоа отвора сомнеж како се финансирал СДСМ и како ги троши парите без покритие. Очигледно дека овие трансакции не се евидентирани во извештаите на СДСМ. Дали Зоран Заев ваквите црни и тајни фондови ги полнел со парите од „Рекет“, со торбите „луј витон“ и потоа ги користел за корумпирање на невладиниот сектор, медиумите и правосудните органи, со цел да купи своја заштита и елиминирање на своите политички неистомисленици?

Поранешната сопартијка на Заев призна дека тој самиот, освен што потплатувал и дрско манипулирал со јавноста, граѓаните и со активистите во време на шарената револуција пуштајќи едитирани материјали, со што ги злоупотребувал чувствата на граѓаните, сè со цел да добие лични и партиски ситни поени.

Зоран Заев е давеник фатен за сламка. Зоран Заев е политички губитник. Тоа им е јасно на сите. Вистината веќе излегува на виделина, а набргу тој и кликата околу него ќе бидат казнети од граѓаните, а во една транспарентна постапка сето тоа ќе биде истражено и санкционирано соодветно и од институциите што ќе бидат ослободени од неговите канџи и неговите црни пари.

Времето на ваквите политики што Зоран Заев што ги водеше заврши“, рече Арсовски.