Македонија
(Видео) Бочварски: ВМРО ДПМНЕ потроши 700 милиони евра за криминални споменици, a СДСМ гради патишта

СДСМ како одговорна партија преку домаќинско однесување покажува што значи парите да се враќаат кај граѓаните, покажува како се остваруваат ветувањата, покажува што значи државата да биде на прав пат, порача претседателот на Комисијата за транспорт и врски на СДСМ, Благој Бочварски.
„Огромна е разликата помеѓу СДСМ и ВМРО-ДПМНЕ во концепцискиот пристап на капиталните инвестиции и развојот на инфраструктурата. Само за споредба ВМРО-ДПМНЕ потроши 700 милиони евра за Скопје 2014, додека СДСМ за две години изгради и реконструираше патишта – 800 милиони евра.
Еден милион евра во патна инфраструктура враќа 3,5 милиони евра во економија и бизнис, а со тоа и нови работни места и тоа е шанса за граѓаните на нашата држава.
Доколку ВМРО-ДПМНЕ парите од Скопје 2014 ги инвестираше во патишта, досега требаше да се вратат 2,5 милијарди евра во економијата на државата. Додека ВМРО-ДПМНЕ градеше фасада на МЕПСО за 10,5 милиони евра, СДСМ со 11 милиони евра ги реконструира постоечки патни правци (регионални патишта):
– Битола – Демир Хисар 10 км
– Кочани – Пониква 12 км
– Тетово – Попова Шапка 18 км
– Струмица – Ново Село 13 км
– Штип – Радовиш 21 км
– Куманово – Свети Николе 32 км
Додека ВМРО-ДПМНЕ трошеше 22 милиони евра за зграда на ЈП Водовод, СДСМ изгради 400 километри водоводи и канализации во државата. ВМРО-ДПМНЕ за тампонирање на патишта плаќале 2202 денари/м3, а СДСМ 573 денари/м3. Порано се плаќало 92 денари за килограм арматура, денеска се плаќа по 44 денари, асфалтот за патиштата чинел 18500 денари метар должен, денеска чини 7000 денари.
Во градежништвото никогаш не смее да има било какви импровизации, затоа што на крајот исправањето на грешките ќе чини многу време и многу пари. Овде зборуваме со факти и аргументи и ниту еден спин на ВМРО-ДПМНЕ нема да го покрие фактот дека автопатот Кичево Охрид се работи со стар проект кој воопшто не соодведствува со реалната состојба на теренот.
Се работи за нецелосен и промашен проект, проект со промашени и нецелосни геомеханички испитувања, проект со лошо проектирани косини, усеци и тунели за кои беше потребно да се репроектирааат. Досега се репроектираат околу 25% од трасата на овој автопат со цел да може да се изгради.
Првичниот проект е со грешни податоци за тунелите, проект без клучки, проект кој поминува над резервоарот за вода на Кичево, па затоа треба ново решение и за овој дел од трасата.
Вмро Дпмне се одговорни за импровизациите од проект кој го оставија, па затоа цената на чинење од 400 милиони евра, ќе се зголеми за дополнителни 185 милиони евра. Ги исправаме грешките коишто ги затекнавме по патиштата и продолжуваме со градење“ порача Бочварски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Филипче: Каја и Горан имаат конкретни програми со решенија за Скопје и Кисела Вода

Претседателот на СДСМ Венко Филипче заедно со кандидатите за градоначалници за Скопје и Кисела Вода беа во посета на паркот во Кисела Vода од каде испратија пораки дека со конкретна програма и работа на терен резултатите ќе дојдат и во Кисела Вода.
„Мислам дека ова е еден добар пример како треба да се однесува градот кога се планираат содржини за сите категории на граѓани конкретно овој парк којшто направен во времето на претходниот градоначалник Петре Шилегов за жал е не одржуван, е запуштен ,нечист со едноставно никакви до содржини и развој после неговиот мандат. Имаме конкретни програми, имаме конкретни планови, направени врз основа на вистинските потреби на граѓаните. И Горан и Каја се луѓе коишто работат инклузивно кои имаат отворен пристап за потребите на граѓаните“, рече Филипче.
Тој исто така потенцираше дека Горан и Каја, нема да бидат затворени во своите канцеларии туку низ населбите каде ќе ги лоцитаат проблемите и ќе работата на нивно решавање.
„Едноставно гласајќи за нив граѓаните треба да знаат дека гласаат за подобри места за живеење“, рече Филпче.
Македонија
(Видео) Саракинов: Јакимовски ветуваше зеленило, а го бетонизираше Тафталиџе со десетканици

„Кандидатот на СДС, Филипче и Заев – Стевчо Јакимовски ветуваше зеленило, а го бетонизираше Тафталиџе со десетканици“, кажа денеска Христо Саракинов, носител на советничка листа на Општина Карпош од ВМРО-ДПМНЕ.
„Токму ваквите згради зад мене се причината и заради која СДС, Филипче и Заев го поддржуваат Стевчо Јакимовски и се во тајна коалиција со него, пуштајќи го нивниот партиски кандидат низ вода. Кандидатот на СДС, Филипче и Заев – Стевчо Јакимовски во својата изборна програма од 2021 година вети ни помалку ни повеќе туку 250.000.000 м2 нови зелени површини во општината. 4 години потоа во Карпош не само што нема нови зелени површини, туку и постоечките се уништени, не се одржуваат, а наместо зеленило имаме десеткатници каде вообичаено би требало да има куќи за индивидуално домување или помали згради. Ова овде зад мене е дел од Тафталиџе, кое некогаш беше најмирната населба во Карпош, сега е пренатрупана со згради вез никаков план за хумано живеење. Вака изгледа кога профитот ќе се стави пред хуманото урбано живеење. СДС, Филипче и Заев го поддржуваат Стевчо Јакимовски за да да продолжи. Глас за Стевчо Јакимовски е глас за забрзана бетонизација на секој чекор, уништено зеленило и повеќе профит во џебот на урбаната мафија на СДС, Филипче и Заев“, истакна Саракинов.
Македонија
Мицкоски: СДСМ настапува со слоганот „се бориме за нашиот дом“, а заборавија дека до пред година дена управуваа со домот кому му ги уништија темелите

Претседателот на ВМРО-ДПМНЕ, Христијан Мицкоски на митингот во Битола во рамки на кампањата за локалните избори на 19 октомври која е под слоганот Вистинскиот избор! Твојот човек! Твоето место! Твојата иднина! се осврна на слоганот на опозициската СДСМ.
Мицкоски посочи дека е фино што на СДСМ им текна да излезат со таков слоган „се бориме за нашиот дом“, но заборавиле дека до пред година и некој месец тие управуваа со домот, односно Македонија и државата ја оставија не со нарушени, туку со уништени темели, вработени без исплатени плати, земјоделци без исплатени субвенции, пола милион граѓани со по 150 денари на ден, двоцифрена инфлација.
Претседателот истакна дека, од моментот на преземањето на одговорноста да ја води Владата, секој ден во владата доаѓаше по некој кој сведочеше за аванси, провизии кои му ги барале во време на власт на СДСМ, за да му завршат работа.
„СДСМ на овие избори настапуваат со слоганот „се бориме за нашиот дом“. И сè е тоа фино, ама забораваат дека пред година и три месеци тие управуваа со домот. И она што го затекнавме не беа нарушени туку уништени темели. Кога ќе се сетам дека првите одлуки кои ги донесов како премиер беа да враќаме плати кои тие не ги исплатиле и дека делевме субвенции кои тие со години не ги исплаќаа. Секој ден во владата ми доаѓаше по некој кој сведочеше за аванси, провизии кои му ги барале за да му завршат работа. Немаше темел кој не беше руиниран од домот кој тие ни го водеа. Се сеќавате дека 500 илјади наши сограѓани, поточно секој трет човек во државата живееше со 150 денари на ден. Дека имаше двоцифрена инфлација, дека го руинираа животниот стандард на чие кревање напорно и постепено работиме“, рече Мицкоски.
Од друга страна, додаде Мицкоски, ДУИ беа господарите кои одлучуваа за целата економија, за тендерите, купуваа трговски центри, бензински пумпи и што уште не.
„Се сеќавате ли на Артановци кога во државните канцеларии, онака, лаконски и мирно си играа фудбалче и даваа кошеви, додека народот страдаше за корка леб? Ете, така тие се грижеа за домот. Сега нивната борба е за враќање на ова време кое народот веќе еднаш го порази. Тоа време на народот не му носи ништо добро“, заклучи Мицкоски.