Македонија
(Видео) Гаши: Нашата битка не е со СДСМ и Беса, туку ДУИ да замине во опозиција
За лидерот на Алтернативата, Африм Гаши, коалицијата СДСМ-Беса не е пречка на патот кон освојување на албанскиот електорат. Како што изјави во интервјуто за „Макфакс“, коалицијата Алијанса за Албанците и Алтернатива главната битка ќе ја води со ДУИ, односно ова партија да ја напушти власта и да замине во опозиција.
„СДСМ не ја води битката со нас, ќе ја води со ВМРО-ДПМНЕ. На оваа коалиција со Беса не гледам како на некаква закана, туку, напротив, расчистување на патот и дилемите кај албанскиот електорат. По коалирањето на Беса со СДСМ, има одреден револт кај голем број гласачи бидејќи ова соединување не било очекувано за нив. Но, не би сакал да навлегувам во тоа, за нас најважно е да ја победиме ДУИ, која треба да замине во опозиција, а ние да ја освоиме власта“, дециден беше Гаши.
Лидерот на Алтернативата рече дека доколку ВМРО-ДПМНЕ освои мнозинство мандати, ќе преговара за коалиција во власта затоа што така одлучило мнозинството гласачи. Но, Гаши не ја исклучи можноста и за коалирање со СДСМ, при што рече дека, сепак, дали ќе формираат влада, ќе зависи од усогласеноста на програмите на коалиционите партнери.
„Доколку ВМРО-ДПМНЕ победи на изборите и освои мнозинство мандати доволни за формирање влада, ние ќе мора да ја почитуваме волјата на граѓаните и да преговараме за коалиција со оваа партија. Истото важи и доколку победи СДСМ, нема разлика. За преговори не е проблем, но дали ќе ги усогласиме програмите и ќе се договориме е сосема друга работа. Но, засега ова е хипотетичко прашање и моето размислување го темелам на работите од денешна перспектива. Што и како ќе се случува, останува да почекаме како ќе поминат изборите“, додава Гаши.
Како што рече лидерот на Алтернативата, анкетите покажале дека 2/3 од гласачите што излегуваат на избори сакаат промена на албанската политичката сцена, што, според него, ова е шанса заедно со Села да го освои мнозинството кај албанскиот електорат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Денес дожд и грмежи, можно е краткотрајно невреме со силен ветер и град
Времето денеска ќе биде променливо облачно и нестабилно со пороен дожд и грмежи. Локално ќе има услови за појава на невреме со интензивен пороен дожд, силен ветер и изолирана појава на град.
Минималната температура ќе се движи од 9 до 15, а максималната ќе достигне од 21 до 27 степени.
Во Скопје ќе биде променливо облачно и нестабилно со пороен дожд и грмежи. Во делови од котлината ќе има услови за појава на краткотрајно невреме со интензивен пороен дожд, силен ветер и изолирана појава на град. Минималната температура ќе се спушти до 14, а максималната ќе достигне до 25 степени.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.