Македонија
(Видео) Груевски, Канческа и Ставрески дел од осомничените во „Скопје 2014“ со Тодоровиќ за набавка на 10 споменици

Експремиерот Никола Груевски, ексминистерката Елизабета Канческа-Милевска и ексминистерот за финансии Зоран Ставревски се дел од осомничените во предметот „Скопје 2014“ заедно со поранешните градоначалници на Центар, Владимир Тодоровиќ, и Виолета Аларова. Вкупно 15 лица се под истрага за набавка на десетте споменици, дел од проектот за кој се води постапката.
„По опсежно проверена постапка со кодно име ‘Феникс’, до судија за претходна постапка поднесени се барања за претреси, одземање имот поради идна конфискација, замрзнување банкарски сметки, барање за притвор. Се спроведува постапка против 15 лица, каде што, освен македонски државјани, има и државјани од Италија, поради сомневање дека сториле кривични дела злоупотреба на службената положба и овластување и перење пари“, посочи обвинителот Љубомир Лапе.
Меѓу спомениците за кои се води постапката се „Воинот на коњ“ на плоштадот Македонија, лавовите, „Даме Груев“, „Гоце Делчев“, „Никола Карев“, „Цар Самуил“, „Првото заседание на АСНОМ“ – изработени од исто правно лице во Италија.
„Од втората половина на 2007 година, првоосомничениот (Никола Груевски), искористувајќи ја службената положба како претседател на владата, како и тогашниот советник и градоначалник на општина Центар, се приврзале за добивање значајна корист. Осомничените почнале со реализација на проектот ‘Скопје 2014’ за кој не постои програма, документ од надлежен орган. Иако станувало збор за значајни за државата, иницијативите се поднесувале пред Советот на Општина Центар, па се почнувале постапки за меморијални споменици за кое единствено надлежно е Собранието. Осомничените потпишувале незаконски владини одлуки и трансферирале средства во Општина Центар. Осомничените си обезбедиле финансиски средства, вкупен износ од 57 милиони евра“, рече обвинителот Лапе.
Наместо Собранието, кое ја имало надлежноста, одлучувал Советот на Општина Центар. За Лапе, ова е заобиколување на парламентарната контрола.
„На тој начин осомничените го нарушиле начелото за поделба на власта, а од стручната јавност и граѓаните го прикриле вистинскиот износ, кој е платен“, посочи обвинителот.
За градоначалниците Тодоровиќ и Аларова, посочи дека сториле кривично дело злоупотреба на службената положба и овластувањето.
„Петто- и шестоосомничените како градоначалници на Центар, четвртоосомничениот како претседател на Советот на Центар, при вршењето јавни набавки направиле продолжено кривично дело злоупотреба на службената положба и овластувањето. Тие спровеле незаконски јавни набавки. При изборот прифатиле понуди со нереални цени.. Италијанскиот државјанин потпишувал договори иако немале дејност леење и изработка на мебел. Со поддоговори тој лажно прикажувал дека ги изработувал, а работите ги префрлал на други правни лица“, додаде Лапе.
Парите од Италија исплаќани од Македонија биле враќани, тврди обвинителот.
„Лица од Италија, преку правните лица, преку банкарски средства со фиктивни фактури пренеле пари од Италија во Македонија. Од овие средства од правното лице во Македонија и предадени на еден од осомничените дел е префрлен на други правни лица, каде што повторно биле подигнати во готовина.
За четвртоосомничниот Владимир Здравев, постои сомневање дека создал група за перење пари. Членови биле други осомничени, меѓу кои, Италијанци.
Според Лапе, тендерски се плаќани двојно наспроти набавната вредност во Италија. Истрагата е во тек.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Во потрага по храна, мечка се качи на тераса од семејна куќа во Тетовско

Мечка се качила на тераса од семејна куќа во тетовското село Отуње.
Членовите на семејството биле во внатрешноста на куќата, па со мобилен телефон ја снимиле мечката качена на маса каде имало оставено храна, пишува „Тетово инфо“.
Според објавеното и во другите блиски села како Сетоле и Једоарце летово биле забележани слични примери на камери за видеонадзор.
„Мечките во потрага по храна, се движат низ селото, уништуваат сандаци со пчели и слично“.
Македонија
ОЈО со детали за големата акција: 13 лица под истрага за даночно затајување, перење пари и даночна измама, тргувале со горива

Денешната акција спроведена на повеќе локации низ државата е резултат на двегодишна предистражна постапка што ја водеше Основното јавно обвинителство за гонење на организиран криминал и корупција во тесна соработка со Управата за финансиска полиција, соопшти обвинителството.
Постапувајќи по кривичната пријава, надлежен обвинител од ОЈО ГОКК донел Наредба за спроведување на истражна постапка против 13 лица, меѓу кои се и четворица косовски државјани и една државјанка на Република Хрватска.
Осомничените се товарaт дека од 2014 до 2023 година организирале и учествувале во криминална група со цел стекнување противправна имотна корист преку даночно затајување, даночна измама и перење пари со што осомничените го оштетиле Буџетот на државата во големи размери. Групата креирала мрежа од правни субјекти преку кои се вршела продажба и фиктивна трговија со нафтени деривати, се изготвувале фактури со невистинита содржина, со цел да се избегне плаќањето на даночни обврски и да се оствари незаконски поврат на ДДВ. Преку правни лица што не поседуваат дозволи за трговија со нафтени деривати се вршела набавка, транспорт и продажба на Еуросупер, Еуродизел и Екстралесно гориво, со намера да избегнат целосно или делумно плаќање на законски предвидените даночни обврски. Продажбата во поголем број случаи се одвивала без издавање на фискални сметки и фактури, а средствата прибрани во готово не биле евидентирани во сметководствената документација. Осомничените странски државјани, кои формално биле назначени за одговорни лица во повеќе осомничени правни субјекти, немале регулиран престој во земјава, што организаторите на групата го користеле како начин за прикривање на нивната поврзаност со криминалното дејствување.
Воедно, организаторите на групата, од продадените нафтени деривати во готово пуштиле во оптек, примиле пари и извршиле пренос на паричните средства со намера да го прикријат нивното движење, со што се стекнале со противправна имотна корист во големи размери, а за која знаеле дека е прибавена со кривичното дело Даночно затајување, при што сториле и кривично дело Перење пари и други приноси од казниво дело.
Јавниот обвинител ценејќи дека се исполнети условите до судијата на претходна постапка при Основниот кривичен суд Скопје достави предлог за определување на мерка притвор за сите осомничени. До сега се обезбедени седум лица за кои е прифатен предлогот на обвинителството и судот со Решение им определи мерка притвор во траење од 30 дена, за останатите – петмината странски државјани и еден македонски државјанин мерката притвор ќе биде определена во отсуство.
Македонија
Муцунски-Јан Копман: разменети мислења за спроведувањето на реформската агенда, во фокусот и иницијативата „Роаминг како дома со ЕУ“

Министерот за надворешни работи и надворешна трговија, Тимчо Муцунски, денес и утре престојува во работна посета на Брисел, Кралството Белгија. Во рамки на посетата, денеска оствари средба со генералниот директор на Директоратот на Европската комисија за проширување и источно соседство, Герт Јан Копман.
На средбата беа разменети мислења за спроведувањето на реформската агенда, посветеноста на Владата да испорачува видливи резултати од реформските процеси, како и за Планот за раст како дел од пошироката европска поддршка за регионот. Муцунски нагласи дека Владата во изминатата година демонстрираше сериозна посветеност во исполнувањето на обврските од реформската агенда, постигнувајќи значителен напредок, особено во областите на дигитализацијата, владеењето на правото и борбата против корупцијата, при што истакна дека овие приоритети остануваат во фокусот на Владата и во наредниот период.
Се разговараше и за регионалната соработка, при што беше нагласена активната улога и придонесот на Република Северна Македонија во рамките на регионалните иницијативи, како и кон стабилноста и безбедноста на целиот регион.
Соговорниците се осврнаа и на актуелните геополитички и безбедносни предизвици во Европа. Во таа насока беше потенцирана важноста од продолжување на поддршката за Украина и потребата од заеднички, координиран пристап во справувањето со последиците од руската агресија.
Во фокусот на разговорот беше и иницијативата „Роаминг како дома со ЕУ“, насочена кон постепено укинување на трошоците за роаминг помеѓу земјите од Западен Балкан и Европската Унија. Одлуката за оваа иницијатива се очекува да биде донесена на почетокот на следната година.
Муцунски уште еднаш ја потврди цврстата посветеност на Република Северна Македонија кон процесот на европска интеграција како еден од стратешките приоритети во надворешната политика. Тој ја истакна и целосната усогласеност на државата со Заедничката надворешна и безбедносна политика на ЕУ, како и значењето на стратешкото партнерство со Европската Унија во областа на безбедноста и одбраната.