Македонија
(Видео) Дебата: Невладините се судрија со власта – „План има, пари нема, помина и оваа зима во чад и задушување“

Во дебатната емисија на „Макфакс“, на која се говореше за проблемот со аерозагадувањето, претставници на невладиниот сектор се судрија со власта, особено за планот на Владата за намалување на загадувањето. Татјана Чакулев од „О2 иницијативата“ рече дека овој план е без конкретни решенија, без рокови и нема никакви резултати.
„План има, пари нема, помина и оваа зима. Нема рокови, нема процена на средства, не се кажува која мерка е приоритена, има само нафрлани решенија, го пишува она што сите го знаеме. Значи, ние треба да ѝ веруваме на власта и да чекаме 2 години да се исчисти воздухот? Ова е неприфатливо за нас“, рече Чакулев.
Никола Наумоски од Град Скопје со спротивставен став. Презентира статистички податоци со кои тврдеше дека воздухот бил почист ова година во однос на 2016.
„Еве, имаме бројки кои покажуваат дека не стоиме во место. Не знам зошто сте настроени напаѓачки и тврдите дека ништо не се направило. Засадивме дрвја, кои не се грмушки како на претходната власт, туку 5 метри високи стебла. И на крајот, ова е план на Владата, не на Град Скопје, за планот реагирајте кај Макрадули“, вака реплицира Наумоски.
Сепак, во однос на бројките што ги изнесе се разви жестока дискусија, при што Чакулев рече дека информацијата оти воздухот е почист 17 отсто е паушална и не се земени сите параметри при изготвувањето на анализата.
Пратеничката на ДОМ, Маја Морачанин, смета дека 1,6 милион евра не се ни приближно доволни за реализирање на мерките и истакна дека нејзината партија ќе притисика кај власта за да се издејствуваат повеќе пари од буџетот за екологија.
„Да, точно е, ова се малку пари за спроведување на сите мерки. Ние поднесовме 3 амандмани, од кои еден е за аерозагадувањето, но не беа прифатени. Но, не запираме тука, ќе лобираме за повеќе средства, има уште време до гласањето на буџетот. Апелираме до власта да скрати на други ставки и да се обезбедат тие 24 милиони евра, со кои, според нас, ќе има видливи резултати од спроведувањето на програмата“, порача Морачанин.
Активистот на движењето „Го сакам Водно“, Андреј Јанковски, додаде дека, покрај притисокот што го врши невладиниот сектор врз власта, за решавање на проблемот потребни се силни институции кои ќе дејствуваат во согласносо со законот.
„Еве, ние реагиравме и во неколку наврати спречивме неконтролирана сеча на дрвјата на Водно. Пријавивме и случај на непланско градење и побаравме негово стопирање, но од надлежниот инспекторат ни рекоа ‘немаме човек да испратиме на терен’. Проблемот е што таму има само 4 градежни инженери, од кои двајца биле на одмор, еден на боледување, а тој што е на работа не може да стигне на време на сите локации“, рече Јанковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Катерина Мирчовска именувана за нова директорка на болницата во Кочани

Катерина Мирчовска е именувана за нова директорка на болницата во Кочани, објави директорот на ФЗОМ, Сашо Клековски.
„Силно лидерство за болницата во Кочани!
Вчера за директорка на Општата болница Кочани е именувана Катерина Мирчовска, хирург. Веста помина штуро, со појаснување дека тоа е на барање на повредените од трагедијата за Кочани.
Катерина ја запознав низ работата за повредените од трагедијата во Кочани. Импресионира на прв впечаток. Полна со енергија, посветена, професионална, со големо срце, ги знае во детали сите најразлични потреби на повредените. Катерина се откажа од својот трансфер во ГОБ 8 септември Скопје за да се посвети на повредените“, објави Клековски на „Фејсбук“.
Тој додава дека Катерина е најдобар можен избор за водење на болницата во периодот на опоравување на повредените и ветува силно лидерство за болницата во овој критичен период.
Македонија
Меџити во Украина: Силно ја осудуваме руската агресија и бараме итно запирање на војната

Првиот вицепремиер и министер за животна средина и просторно планирање на Република Северна Македонија, Изет Меџити, денес учествуваше на Самитот „Украина – Југоисточна Европа“ што се одржа во Одеса, Украина.
Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.
Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.
„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, – истакна тој.
Вицепремиерот Меџити ја нагласи и посветеноста на земјата за продлабочена регионална соработка и изградба на безбедна, мирољубива и демократска Европа.
Македонија
ВМРО-ДПМНЕ до Османи: Прво ставивте нож во македонскиот идентитет, а сега дрско сакате да држите лекции за наводен патриотизам

Бујар Османи, министерот кој го прифати францускиот предлог без да трепне, кој го претвори Министерството за надворешни работи во огранок на бугарското МНР и кој ги жртвуваше македонскиот идентитет, јазик и историја за фотосесија со европски бирократи, сега се јавува со патетични морални лекции, велат од ВМРО-ДПМНЕ.
„Ќе беше смешно, ако не беше трагично.
Османи зборува за „внатрешна кохезија“ откако со години активно работеше на нејзино разнебитување.
Тој кој не кажа ни збор кога Бугарија бараше да не постоиме како народ.
Тој кој ја потпиша капитулацијата наречена преговарачка рамка, со наведната глава и без консултација со народот.
Тој што направи параван од „европски вредности“ за да протне асимилација под европско знаме.
Ако некој ја злоупотреби политиката за криминали цели тоа беше ДУИ и Османи, кои држеа говори во кои повикуваа на „света борба за двојазичност”, но како безобразен параван за корупција, кражби и ограбување на сите граѓани: и Македонци, и Албанци, и Турци, Роми Срби, Власи, Бошњаци и останати.
Османи денес зборува за „популизам“ откако целата негова кариера е изградена на клиентелизам, поделби и трговија со националните интереси. И ни збор за тоа што токму тој беше прв што прифати Бугарите да бидат ставени во Уставот, без никаква гаранција за македонскиот народ.
Да му појасниме: Македонија не е ничиј туѓ дом, ама не е ни дом на политичари што ја распродаваат.
Граѓаните не ја заборавија шверцерската ноќ на 16 јули.
Не ја заборавија тишината со која дозволи да се гази врз сè македонско.
Не заборавија дека твојата „дипломатија“ заврши со тоа Македонија да не започне ниту еден кластер, ама затоа добивме бугарски клубови и закани за порекнување на нашето постоење.
Затоа, Османи, подобро молчи.
Историјата ќе те памети како министерот кој го прифати условот македонскиот народ да стане „производ на Коминтерната“. А народот ќе ти го врати со истиот јазик кој најдобро го разбираш“, пишува во соопштението.