Македонија
(Видео) Заев: Бугарија го прекрши договорот за добрососедство, не е европски да му ја пишувате историјата на друг народ
Претседателот на Владата, Зоран Заев, ѝ се обрати на јавноста по повод бугарското вето на патот на Македонија кон ЕУ.
„На сите ни е јасно дека до овој момент Европската Унија не постигна согласност за прифаќање на преговарачката рамка за нашата земја. Оваа неодговорна грешка е горчлива вест за целата наша нација. На овој ден се слуша големото разочарување кај сите нас во една издишка. Бугарија стави вето, го прекрши договорот за добрососедство и пријателство и со тоа застана на патот на нашата европска интеграција за која во повеќе наврати институциите на ЕУ и земјите членки, вклучувајќи ја и Бугарија, потврдија дека целосно ги исполнуваме условите.
Тоа не е европски начин. За жал, Бугарија не собра сила да се однесува европски. Бугарија дозволи да испорача гест што не покажува ни пријателство ни братство. Ставот на Бугарија е целосно ирационален и навредлив за Македонците и за целиот наш народ. Во 21 век не е европски, ниту демократски, да му кажете на друг како да се чувствува, како да се самоопределува. Не е европски да му ја пишувате историјата на друг народ. Да му наметнувате идентитет на друг народ и да го убедувате дека треба да го прифати.
За Северна Македонија, за македонскиот народ и за сите граѓани на нашата земја – не се прифатливи овие услови. Затоа, ние застанавме цврсто во одбрана на македонските национални интереси. Не дозволивме да се чепка во достоинството на македонскиот идентитет и во столбовите на идентитетот, а тоа се македонскиот народ и македонскиот јазик.
Нема да дозволиме ниту антифашистичкиот идентитет на нашата земја да биде загрозен и да биде доведен во прашање! Темелите на нашата државност се во антифашизмот на АСНОМ, како што темелите на нашиот идентитет се во македонскиот народ и македонскиот јазик. Тоа се нашите столбови од минатото. Тоа се нашите столбови за иднината.
Ние сме свои на своето. Чисти пред себе и пред светот. Знаеме кои сме и точно знаеме каде одиме. И точно знаеме за што смее, а за што не смее ниту да се преговара ниту да се разговара. Ние одбивме да преговараме за работи за кои не смее ни да се разговара! Преговори со ЕУ – да, но не по цена на ревизија на македонскиот идентитет. Не под условите што сега ги наметнува Бугарија. Ние велиме – ДА за Европа и велиме – НЕ за уцени врз македонскиот народ! И – НЕ за уцени врз нашите сограѓани Албанци, Турци, Роми, Срби, Бошњаци, Власи и сите други.
Народе мој, македонската држава е земја на пријателства и соживот. Како израз на историското паметење, стремежот за правда и неприкосновеноста на човековите права, сме знаеле и да простиме и да се извиниме во име на иднината. Но, никогаш не сме посегнале по туѓото. Ние сме градители. И тоа е во нашата идентитетска карта како наш автентичен белег. Така денеска нè препознава светот: Ние градиме пријателства. Ние сме светол пример за добрососедство. Ние никогаш не сме предизвикувале проблеми и никогаш нема да бидеме проблемот. Ние сме носители на решенијата. Тоа е нашиот победнички став.
Затоа сите се на наша страна. Пријателите се со нас и заедно со пријателите ќе одиме напред. Им оддаваме признание и благодарност на сите други земји членки на Европската Унија. Особено признание и благодарност упатуваме до Сојузна Република Германија, која во исклучително тешки времиња, во врвот на нејзиното претседавање со Унијата, ги стави буџетот на ЕУ, борбата против Ковид-19 и проширувањето, со цел да се одржи првата меѓувладина конференција со Северна Македонија како почеток на преговорите за нашето членство во ЕУ.
За жал, процесот на проширување како стратешка цел на ЕУ го запре Република Бугарија од позиција на земја членка. Станува збор за неодговорна и тешка геостратешка грешка. И добро е што нашите меѓународни пријатели и сојузници не ја премолчуваат оваа грешка.
Не молчат нашите сојузници бидејќи добро знаат дека покажавме пријателство и добра волја со Бугарија. Со искрени намери разговаравме за начинот како некои делови од нашата заедничка и испреплетена историја можат да бидат толкувани од двете страни на границата. Таквата мулти-перспективност на историјата, која е неспорна, сепак не смее да задира во универзалното право на идентитетско, јазично, и културно самоопределување или самобитност.
Нашата совест е чиста. Целиот изминат период се водевме од принципите на максимална заштита на националните интереси и да не смее да се чепка во правото на самоопределување на македонскиот народ. Да вложиме максимални напори за отворање на пристапните преговори со ЕУ во 2020 година, а притоа да ги унапредуваме добрососедските односи врз основа на взаемно разбирање и почитување.
Затоа сметаме дека причините за неодобрување на преговарачката рамка прават штета на фундаменталните принципи и вредности на Европската Унија. И се надеваме дека штетата предизвикана од ова неоправдано вето за европската интеграција на регионот и за европските вредности ќе може да се надомести бргу. За жал, поразот на европските вредности опозицијата во нашата земја го воспева како своја победа.
Актуелното и претходните раководства на ВМРО-ДПМНЕ речиси 15 години покажуваат одбивност и блокади кон нашата евро-атлантска определба. Колку повеќе се ближеше остварувањето на нашето членство во НАТО, толку поинтензивно ширеа немири, лаги и говор на омраза. Мицкоски и ВМРО-ДПМНЕ беа единствените што навиваа Северна Македонија да не добие датум за почеток на преговорите, единствените што блокираа реформи и структурни закони важни за интеграцијата во ЕУ. Лидерот на ДПМНЕ го прогласи најпозитивниот извештај на Европската комисија за лажна вест и не смогна сили ниту да честита ниту да аплаудира во Собранието на денот кога станавме 30 земја членка на НАТО.
Еве денеска паднаа во вода сите лаги и клевети. Им се срушија лагите дека наводно се распродавал македонскиот идентитет. Тие што македонскиот народ го нарекоа хистеричен сега тонат во сопствената хистерија. Тоа се сонот и желбата на лидерството на ДПМНЕ. A реалноста е дека македонскиот народ го надминува овој момент со крената глава наспроти срамните лаги што се опасност за стратешките интереси на земјата. Дури и Европа ги препозна и ги прозва нивните лаги.
A македонскиот народ е далеку повисоко од хистеријата и од срамните лаги на Христијан Мицкоски. Еве сме. Тука сме. Македонци што зборуваат македонски јазик. Свои на своето. Отсекогаш, засекогаш. Станавме земја членка на НАТО како Македонци што зборуваат македонски јазик. Ќе станеме членка и на ЕУ како Македонци што зборуваат македонски јазик.
Ние нема да дозволиме да преовладеат сили што имаат намера да ја втурнат земјата во омраза кон Европа, во неизвесности, конфликти и во омраза кон нашите соседи. Наша обврска е да ги заштитиме државата и граѓаните од повторно застранување од стратешкиот колосек. Без оглед на атмосферата што се обидува да ја наметне опозицијата, оваа Влада никогаш нема да преземе чекор со кој ќе ги загрози македонските национални интереси.
Немаме намера да ја исправиме државата пред неизвесност. Еднаш поминавме низ тоа. Знаеме до каде нè донесе национализмот. Нема да дозволиме ни нов ни стар груевизам како оној по ветото од Букурешт во 2008 година. Ние немаме потреба од националистички занес или од удирање во гради, што служи само за домашна потреба. Тоа е атрактивно за домашна публика, но не е решение. Ние со нашите потези нема никому да му помагаме ниту во Бугарија да печали политички поени на македонското прашање. Национализмот и говорот на омраза не се патриотизам.
Патриотизам е да ги постигнеш сите потребни воено-безбедносни стандарди и политички критериуми и да ја направиш земјата членка на НАТО. Во Брисел, во седиштето на најмоќната воено-безбедносна алијанса на светот, гордо се вее македонското знаме и ја сведочи и нашата национална посебност. Признаена од сите земји членки на НАТО, вклучувајќи ја и Бугарија. Патриотизам е цврстата аргументација дека граѓаните на нашата земја нема зошто да се грижат. Македонскиот народ и Северна Македонија се веќе во НАТО. Тоа е нашата победа постигната за да бидеме еднаков дел од евро-атлантското семејство, рамо до рамо со најсилните. Нашата безбедност и сигурност никогаш нема да бидат загрозени. Нашиот пат е трасиран кон НАПРЕД!
И, затоа, бараме ЕУ да ја исполни својата фундаментална обврска и да ги препознава и чува како непроценливо богатство историските и идентитетски различности на нациите на европскиот континент. Македонскиот идентитет и јазик не смеат да бидат исклучок од овој принцип. Бараме на ист начин како што ние се грижиме, го развиваме и скапоцено го чуваме европскиот идентитет дома, така и ЕУ да го почитува, да се грижи и да го чува нашиот македонски идентитет како скапоценост на својата различност.
Ние остануваме посветени на барањето решение со соседна Бугарија. Тоа ќе биде решение што гарантира почеток на преговорите со ЕУ, а никако не задира во македонскиот идентитет. Ние продолжуваме. Евроинтеграциите не се трка на кратки патеки, туку маратон со крајна цел – европеизирање на нашата земја. Мандатот добиен од граѓаните ја вклучува и таа цел и додека не ја постигнеме – нема да запреме. Нема да дозволиме ветото на Бугарија да предизвика застој на внатрешните реформи. Напротив, ќе го засилиме темпото и ќе ја зголемиме предноста што ја имаме во регионот.
Владата на Република Северна Македонија останува на истиот стратешки колосек. Испорачавме полноправно членство во НАТО, ќе ја придвижиме земјата и кон ЕУ! Ќе продолжиме со реформите со силен интензитет. Наша обврска е да ги спроведеме европските стандарди дома! За нас нема друг пат, нема друга алтернатива. Нема откажување! Во годината пред нас најавувам крупни чекори во неколку клучни области.
Борбата со пандемијата на Ковид-19 ќе ја засилиме и ќе ја добиеме. Не чекор сме до ковид-вакцината. Ја гасифицираме земјата, инвестираме во фотонапонски централи и во ветерници. Почнува прочистувањето на судството, а конечно следува и најважната статистичка операција – пописот. Се грижиме за секој граѓанин, распределуваме огромни економски пакети како помош за граѓаните погодени од ковид-кризата. Уште посилно инвестираме во Коридорот 8 и во инфраструктурата во целата земја. Ние градиме за денес и за утре.
Затоа, јас денеска го повикувам секој македонски граѓанин да учествува во реформите. Сега е потребен ангажман од секого. Овие се тие моменти кога треба најочевидно да го покажеме нашето единство. Сега најмногу треба да работиме сплотени заедно, за да си ја направиме земјата подобро место за живеење. Сега со уште повеќе верба, посветеност и единство да се посветиме на градењето европски стандарди дома. Ќе работиме на поддршка од развиените европски демократии, билатерално, со секоја од нив во полето во кое е најсилна, ќе ги донесеме европските стандарди дома.
Со неоспорно утврден, заштитен и одбранет македонски идентитет, горди сме и знаеме дека ние сме Европа, а македонската иднина е европска. Да живее македонскиот народ, да живее македонскиот јазик, да живеат сите граѓани и сите јазици што се зборуваат во Северна Македонија. Да живеат европските вредности“, порача Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Меџити: Интензивна изградба на булевари и паркинзи во Чаир е врвен приоритет
Кандидатот на владината коалиција ВЛЕН за градоначалник на Општина Чаир, Изет Меџити, на денешната прес-конференција го претстави првиот основен столб на изборната програма, детален план за целосна модернизација на патната инфраструктура и конечното решавање на проблемот со паркирањето во општината Чаир.
Во своето обраќање, Меџити истакна дека Чаир ќе биде модерна, уредена и функционална општина, каде што секојдневниот живот на граѓаните ќе биде полесен и поквалитетен. Според него, најголемата инвестиција во историјата на Чаир ќе се реализира во областа на паркирањето, со
конкретни проекти што ќе го олеснат животот на жителите.
„Нашата визија е јасна, Чаир ќе стане модерна, уредена и функционална општина, место каде што секојдневниот живот на граѓаните е олеснет, а не отежнат. Затоа, во следните четири години, нашиот фокус ќе биде на капитални проекти што носат ред, безбедност и европски стандарди. Нема
да има импровизации, туку системски решенија. Имаме владина одлука и отворена набавка за изградба на подземна гаража на две нивоа под плоштадот „Скендербег“, со капацитет од 800 возила и површина од над 12.500 метри квадратни. Ова ќе го ослободи централното јадро, ќе овозможи нормално функционирање и ќе ја зголеми вредноста на Чаршијата,“ изјави Меџити.
Според него, ќе се изградат и катни гаражи на пет клучни локации.
Кандидатот на ВЛЕН за градоначалник на Општина Чаир, Изет Меџити, најави широка офанзива за изградба и реконструкција на патишта, со цел Чаир да добие модерна и безбедна инфраструктура за пешаци, велосипедисти и возила.
Меѓу најзначајните проекти, според него, се проширувањето на улицата „Цветан Димов“ во булевар со шест ленти и велосипедски патеки, проширување на булеварот „Мит’хат Фрашери“, поврзувањето на улицата „Џон Кенеди“ со булеварот „Никола Карев“, што ќе создаде нов коридор за сообраќај, изградба на булеварите „Хрватска“ и „Црна Гора“ кои ќе го олеснат движењето од Автокоманда кон Сарај, како и изградба на кружен тек во Гази Баба, во близина на парк шумата Гази Баба, кај Природно-математичкиот факултет.
Понатаму, Меџити го претстави и планот за целосна реконструкција на улиците во неколку важни маала на општината.
„Ќе воспоставиме ред и европски стандарди. Ќе има целосно ново јавно осветлување и подземни електрични инсталации во Стариот Чаир и Топанско Поле за поголема безбедност и модерен изглед. Ќе работиме на систематизација на еднонасочните улици,“ изјави кандидатот на ВЛЕН за градоначалник на Општина Чаир, Изет Меџити.
Македонија
(Видео) Лабудовиќ: Центар ќе биде современа и дигитална општина
Современа и ефикасна општина не се гради само со улици, паркови и згради – таа се гради со доверба. Доверба меѓу граѓаните и институциите, доверба во секоја одлука и во секој потрошен денар.
Кандидатот за градоначалник на Општина Центар од Движењето ЗНАМ – За наша Македонија, Мирослав Лабудовиќ, најави дека еден од неговите најважни приоритети ќе биде воведување на целосно нов систем на дигитална и транспарентна администрација.
„Нашата цел е Центар да стане најтранспарентна општина во државата. Граѓаните заслужуваат да знаат што, каде и како се работи со нивните пари. Затоа ќе ја воведеме апликацијата „Моја општина“ – дигитален сервис што ќе овозможи директна и отворена комуникација меѓу општината и жителите,“ изјави Лабудовиќ.
Преку апликацијата, како што појасни, секој граѓанин ќе може лесно да пријави проблем, да постави прашање, да добие конкретен одговор и да ги следи активностите во реално време. Во неа ќе бидат достапни сите информации за функционирањето на општината – од состојбата со паркинг-местата и јавните услуги, до тековни проекти, тендери и буџетски трошоци.
Особено внимание, според него, ќе биде посветено на воведување на системот „Отворен буџет“, преку кој јавноста ќе има постојан увид во распределбата на општинските средства. На едноставен и транспарентен начин, секој жител ќе може да провери каде завршува секој денар – од проектите за хигиена и инфраструктура, до урбанистички и еколошки програми.
„Транспарентноста не смее да биде формалност. Таа мора да стане темел на модерното управување. Со редовно објавување на сите трошоци, договори и реализирани активности, ќе изградиме нов систем на доверба. Центар ќе биде општина која комуницира со своите граѓани – јавно, отворено и одговорно,“ нагласи Лабудовиќ.
Покрај тоа, се планира и воведување на дигитален контакт-центар и систем за известување во реално време, преку кој граѓаните ќе можат брзо да добиваат важни информации – за сообраќајот, јавните настани, хигиената и сите тековни активности во нивното маало.
Со овие решенија, истакнува, Центар ќе стане пример за модерна, дигитална и отчетна општина – општина во која технологијата ќе биде во служба на луѓето, а секоја одлука ќе биде јавна, достапна и проверлива.
„Ние сакаме Центар да биде место каде граѓаните не чекаат одговори – туку ги добиваат веднаш. Општина која не се крие зад бирократија, туку ја користи дигитализацијата за да служи подобро, побрзо и почесно. Така се гради доверба, така се гради вистинска заедница,“ порача Лабудовиќ.
Според визијата на кандидатот, Центар ќе ја врати изгубената врска меѓу институциите и граѓаните, претворајќи ја во модел на управување за целата држава.
Македонија
(Видео) Модерен конгресен центар, нов саем во Скопје, Шукова најави и решение за сообраќајниот хаос во Автокоманда
Кандидатката за Градоначалничка на Град Скопје, Каја Шукова, на средба со граѓаните во Автокоманда, општина Гази Баба, најави неколку крупни инфраструктурни проекти што ќе го трансформираат главниот град во модерен, уреден и економски активен центар.
„Скопје е град со дух, со историја, но и со огромен неискористен потенцијал. Нашата визија е Скопје да се развива паметно, плански и храбро, со јасни цели и вистински проекти што носат промени,“ изјави Шукова пред граѓаните.
Во фокусот на таа визија, како што истакна, е изградбата на модерен Конгресен центар – инфраструктура што ќе го отвори Скопје кон светот и ќе го постави на мапата на европски конгресни дестинации. Проектот, според неа, претставува економски, туристички и културен ресурс со кој градот ќе може да биде домаќин на меѓународни конференции, научни и професионални собири и големи културни настани.
Паралелно со Конгресниот центар, Шукова најави и изградба на нов Скопски саем во Гази Баба, со што оваа општина ќе добие нова стратешка позиција како регионален центар за бизнис, иновации и туризам. Новиот саем, според најавите, ќе има модуларни хали, конференциски сали, културни и комерцијални содржини, како и простор за мали и средни претпријатија и креативни сектори.
„Овој проект отвора нови пазари, ги поврзува локалните производители со странски партнери и создава услови младите да останат и да работат токму тука, во Скопје,“ додаде Шукова.
Таа најави и решение за сообраќајниот хаос во Автокоманда, каде што ќе се изградат три катни гаражи. Две од нив ќе бидат наменети за жителите, со сигурни и достапни паркинг места, а третата за вработените во околните компании, со цел да се ослободи јавниот простор и да се намали метежот.
„Со овие мерки го враќаме просторот на граѓаните, ги ослободуваме тротоарите и го подобруваме квалитетот на живот,“ нагласи Шукова.
Според неа, ова е визија за Скопје што поврзува, што е добар домаќин и што создава вредност – за граѓаните, за економијата и за државата.
„Ова е визија за град што има иднина, и ние сме подготвени таа визија да ја реализираме,“ заклучи Шукова.
Татко ги допирал по телата неговите 16-годишни ќерки во Кавадарци
ОВР Кавадарци поднесе кривична пријава против Д.Г.(40) од Кавадарци. Тој, како што соопшти полицијата, се сомничи за сторено кривично дело...
Од наредната година целосно автоматизирано пријавување на новороденче
Владата и Министерството за дигитална трансформација реализираат уште едно предизвборно ветување. Министерството од почетокот на годината, формираше работна група помеѓу...
Македонија од денес и официјално дел од СЕПА: полесни и побрзи плаќања во евра
Министерството за европски прашања информира дека од денес, 7 октомври 2025 година, Република Северна Македонија официјално започнува со примена на...
Две Италијанки уапсени на Табановце, кај нив се пронајдени семки од канабис, ЛСД, кесичка со суви печурки
Вчера во 20:20 часот на Граничен премин Табановце, на влез во државата, полициски службеници ги лишија од слобода 33-годишните Џ.П....
Уапсен маж од скопско Мирковци, фатен како краде нафта од училиште
Вчера во 21:25 часот полициски службеници од СВР Скопје поради сомнение за сторено кривично дело согласно член 236 од Кривичниот...
Полициска потера на патот Скопје – Велес: испукан предупредувачки куршум, криминалците со возило излетале од коловозот
Вчера во близина на населбата Нова Колонија полициски службеници од Одделот за специјални полициски операции, постапувајќи по план од СВР...
Орбан: Зеленски ја користи својата вообичаена тактика, но унгарскиот народ одлучи
Унгарскиот премиер Виктор Орбан го обвини украинскиот претседател Володимир Зеленски за „користење на неговата вообичаена тактика на морална уцена“. „Се...
(Видео) Украински напад на 2000 километри од фронтот: рафинерија погодена во далечниот Сибир
Украински беспилотни летала наводно го нападнале сибирскиот град Тјумен доцна синоќа, на повеќе од 2.000 километри од линијата на фронтот,...
(Видео) Трамп: Грета е луда, треба да оди на лекар
Американскиот претседател Доналд Трамп беше прашан од новинарите во Овалната соба за депортацијата на Грета Тунберг и други пропалестински активисти...
Сиљановска-Давкова: Цинизам и хипокризија е да барате од некого да биде отпорен на трети влијанија, оставајќи го пред портите на Европската Унија
Претседателката Гордана Сиљановска-Давкова денеска се обрати на годинешната средба на земјите учеснички во „Процесот Брдо-Бриони“, којашто се одржа во Драч,...
За пет дена 2.267 сообраќајни прекршоци, уапсени се 22 лица
Од почетокот на месец октомври полицијата констатирала 2.267 сообраќајни прекршоци, а 22 лица се уапсени за безобзирно управување на возило,...
(Видео) Николоски: Јасно е дека Заев ги влече конците во СДСМ
Јасно е дека Заев ги влече конците и во време на претходниот претседател на СДСМ и премиер, Димитар Ковачевски и...
Жител на Кочани пронајден мртов во Љубљана, од МНР велат дека случајот го истражува полицијата
До македонската амбасада во Љубљана е доставено известување дека во текот на ноќта на 2 октомври, животот го загубил македонски...
Помошник на министерот за внатрешни работи незаконски зел надоместоци за прекувремена работа и бонус плата
Полицијата поднесе кривична пријава против помошник на министерот за внатрешни работи, раководител на Одделот за дисциплински и судски постапки, затоа...
Меркел: Дали Путин ќе ја нападнеше Украина ако не се случеше пандемијата на коронавирус?
Поранешната германска канцеларка, Ангела Меркел, даде интервју за унгарскиот медиум „Партизан“. Меѓу другото, таа зборуваше за конфликтот во Украина. „Во...
Заев: Најостро и категорично ги отфрлам лагите и клеветењата од Мицкоски за наводни „куферчиња со пари од поранешен премиер од Бугарија“
„Небулози, клевети и навреди се методите на Мицкоски со кои сака да се оправда за катастрофата која и ја нанесува...
„Водовод“: Поради прекини на струја дојде до два дефекти истовремено на главната водоводна линија
ЈП Водовод и канализација – Скопје известува дека поради повеќе краткотрајни прекини на снабдување со електричната енергија во регионот кај...
(Видео) Во Црна Гора убиен член на Шкаљарскиот клан: телото пронајдено во автомобил
33-годишниот Бобан Сјеклоќа беше убиен вчера околу 18 часот во продолжението на војната меѓу црногорските кланови. Телото на овој висок...
(Видео) Мерц: Русија стои зад дроновите над Германија
Германскиот канцелар Фридрих Мерц изјави дека се сомнева дека Русија стои зад серијата беспилотни летала видени над Германија во текот...
Трамп: Разговорите со Хамас за завршување на војната во Газа напредуваат брзо
Американскиот претседател Доналд Трамп вчера изјави дека преговорите со Хамас за прекин на израелската војна во Газа и ослободување на...
