Документите што се доставени до нас откриваат голем скандал поврзан со кандидатката на ВМРО-ДПМНЕ за градоначалник на Скопје, Данела Арсовска, соопшти Дарко Каевски, пратеник на СДСМ.

„Нејзина фирма ‘Империјал – Данела’ ДООЕЛ Скопје, понатаму ‘Империјал’ ДООЕЛ увоз-извоз Скопје, во кои таа била управител и сопственик, со години под закуп ја има спортската сала ‘Расадник’ во Кисела Вода. Но, фирмата, замислете, не плаќала струја! Фирмата на Данела направила долг од 3,3 милиони денари!

Еве го вториот документ. Погледнете, долг од 3,3 милиони денари или 54 илјади евра. Данела ниту е чесна ниту е независна. Кандидатката на Груевски е иста како него. Ова, почитувани граѓани, е класичен пример за неодговорно, расипничко и недомаќинско работење. Неодговорен и нечесен однос кон имотот на граѓаните, кои се реални сопственици на салата“, рече Каевски.

Според него, ако Арсовска вака лошо управува со една сала, јасно е дека нема да може да управува со цел град.

„Ако не плаќала струја, не почитувала договор, направила милионски долгови, јасно е дека исто ќе се однесува и со парите на граѓаните, со градскиот буџет и со договорите на Градот. Тоа е впрочем одлика на кадрите на Никола Груевски. Тоа е одлика на ВМРО-ДПМНЕ, која 27 години го пустошеше Скопје. Не може граѓаните да си ги плаќаат своите сметки, а Данела на нивниот грб да се богати.

Поразот на Арсовска и ВМРО-ДПМНЕ во Скопје е јасен. Но, овде зборуваме за нешто сосема друго, зборуваме за неодговорно и недомаќинско управување на грбот на граѓаните. Има ли Данела Арсовска и други долгови и колкави се тие? Јавноста очекува одговори“, порача тој.