Македонија
Каевски: Пописот е многу значаен за планирање на соодветен развој на државата

Подготвени се сите здравствени протоколи и преземени се сите мерки за заштита на здравјето на граѓаните што се попишуваат, како и на попишувачите. Пописот е многу значаен за планирање на соодветен развој на државата, изјави Дарко Каевски, пратеник на СДСМ.
Тој кажа дека преку оваа статистичка операција, конечно, по речиси две децении, ќе добиеме точни информации и податоци каде и како правилно да се насочат финансиите и потребните ресурси.
„Врз основа на овие податоци ќе се креираат мерките за одржлив развој, во здравството, образованието, социјалната заштита, животната средина, бизнис секторот и секаде каде што е потребно. Со пописот добиваме точни информации, каде се потребни нови градинки и училишта, каде е потребен стручен кадар за помош за лица со попреченост, каде се потребни нови болници. Со овие информации ќе се креираат ефикасни инвестициски политики, ќе се добијат точни информации за располагање со работна сила и други податоци клучни за развојните политики“, рече Каевски.
Меѓутоа, додаде тој, пописот е и патриотски чин.
„Патриотски е да си ги кажеш корените. А, тоа го овозможува пописот. Во графите за попис стои Македонци, а добиваат можност да се попишат и сите граѓани, Албанци, Турци, Бошњаци, Срби, Роми, Власи…“, рече Каевски.
Според него, придобивките од пописот се огромни и затоа е потребно обединување, а не бојкотирање на овој важен процес.
„Секој што и мисли добро на државата и што сака таа да се развива и да оди напред, треба да даде максимален придонес и поддршка во овој процес. Затоа ве повикувам на масовен одѕив на пописот, да ја искористите приликата да дадете свој придонес за напредокот на татковината“, рече Каевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без струја денеска делови од Бутел и Аеродром

Од ЕВН Македонија АД известуваат дека денеска без електрична енергија ќе останат:
– во периодот од 08.20 до 12.30 часот, дел од корисниците од ул. 1 во населба Радишани. (општина Бутел)
– во периодот од 09.00 до 12.00 часот, корисниците од ул. Горно Лисиче лоцирани на потегот од Маг Комерц, А-М Стил, Феромонт Инжинеринг кон село Долно Лисиче. (општина Аеродром)
Македонија
Дел од Аеродром денеска без вода

Од ЈП Водовод и Канализација известуваат дека денеска поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд, општина Аеродром.
Водоснабдувањето ќе биде прекинато од 08:00 часот до завршување со санација на дефектот.
Македонија
Променливо облачно со повремен локален дожд

Времето денеска ќе биде променливо облачно со повремени локални врнежи од дожд. Ќе дува умерен до засилен ветер претежно од северен правец (локално над 60 km/h). Минималната температура ќе биде во интервал од 4 до 9, а максималната ќе достигне од 7 до 13 степени.
Во Скопје, променливо облачно со повремен локален дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 9, а максималната ќе достигне до 12 степени.
Времето во наредните денови
До среда ќе се задржи претежно облачно време со повремени локални врнежи од дожд и студени утра. Ќе дува умерен до засилен, а долж Повардарието повремено силен ветер од северозападен правец. Потоа следи период на стабилно и суво со постепен пораст на дневната температура.