Македонија
(Видео) Каевски: СДСМ ќе стори сè за државата да стане членка на ЕУ, ДПМНЕ одработува за туѓи интереси
„Почетокот на процесот во македонското Собрание за уставни измени покажа дека на политичката сцена се два блока. Едниот предводен од СДСМ, кој е проевропски, и другиот антиевропски. ДПМНЕ е антиевропска партија, а Христијан Мицкоски антиевропски политичар, исто како што беа против членството во НАТО, работат против членството во ЕУ“, рече Дарко Каевски, портпарол и пратеник на СДСМ.
„Наивно е да се верува дека причина за тоа е нечиј партиски или личен рејтинг. Станува збор за јасно изразена антиевропска, антизападна политика и политичка агенда.
Овие антиевропски политики на ДПМНЕ се на линија со туѓи интереси, кои не ѝ мислат добро на земјата и тоа е впрочем и континуитет на политиките на Груевски од минатото, кои не ѝ донесоа добро на државата и ја заглавија цели 11 години во изолација.
Имаме единствена можност, отворена врата за европскиот пат и оваа шанса ние сметаме дека е исклучително важно сега да ја искористиме“, изјави Дарко Каевски, портпарол и пратеник на СДСМ.
„Во спротивно, ќе ги видиме Албанија и Црна Гора како напредуваат кон ЕУ, како и целиот регион, а ние ќе сме оставени со Босна и Косово, кои имаат нерешени прашања, што не е добро.
За потсетување, во 2006 година бевме во пакет заедно со Хрватска, денес таа држава не само што полноправна членка на ЕУ тук е и дел од еврозоната и од шенген.
Ние 11 години бевме надвор од европскиот пат и загубивме генерации млади граѓани, кои денес се жители на ЕУ, но во туѓи држави, па прашање е уште колку генерации ќе загубиме за 11 години ако сега не ја завршиме задачата?
Отворањето на уставните измени го поддржа и Европската комисија, чија претседателка, Урсула фон дер Лајен, упати јасна, силна порака дека Северна Македонија припаѓа во ЕУ!
СДСМ нема да се откаже од европската агенда. Заедно со граѓаните, со европскиот блок, ќе сториме сè за државата да стане членка на ЕУ.
Тоа со себе ќе донесе забрзан раст на економијата, дури за 11 пати поголема финансиска поддршка од ЕУ и нови можности за граѓаните, за домашното стопанство.
Како што обезбедивме членство во НАТО, како што обезбедивме почеток на преговори со ЕУ, така ќе обезбедиме и членство во ЕУ, со заштитен и потврден македонски идентитет и покрај блокадите од ДПМНЕ и Левицата“, додаде Дарко Каевски, портпарол и пратеник на СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: Бошњачката заедница е нераскинлив дел од нашето мултиетничко општество
Претседателот на Социјалдемократскиот сојуз на Македонија, Венко Филипче, вечерва присуствуваше на одбележување на Меѓународниот Ден на Бошњаците, во организација на Странката на демократска акција на Македонија (СДА).
Во обраќањето пред присутните, Филипче прача дека бошњачката заедница е нераскинлив дел од општеството и има значаен придонес во развојот и напредокот на Северна Македонија.
„Граѓаните Бошњаци по измените на Уставот од 2001 година, станаа дел од преамбулата и на нашиот Устав. Со нивната традиција, како составен и нераскинлив дел од нашето мултиетничко општество, имаат значаен придонес во развојот и напредокот на државата. Бошњачката заедница во Северна Македонија активно се вклучи во успешниот концепт „Едно општество за сите“, со кој Северна Македонија сега е пример во Ервопа и регионот за дијалог, меѓусебно разбирање и почитување“, рече Филипче.
Воедно, претседателот на СДСМ, Филипче ја потенцираше важноста на Странката на демократска акција на Македонија (СДА), која како коалициски партнер на СДСМ, изминативе години даде поддршка на развојните политиките во периодот на Владата на СДСМ.
„Во основното образование за учениците Бошњаци се врати редовната настава на босански јазик, Северна Македонија и Босна и Херцеговина потпишаа серија на билатерални договори во интерес на граѓаните,Скопје и Сараево станаа збратимени градови. Со својата прогресивна идеологија во изминатите години, СДА активно учествуваше во сите процеси кои ја придвижија државата напред, како што е членството во НАТО и започнувањето на преговорите со Европската Унија“, рече Филипче, додавајќи дека токму тоа и е разликата СДСМ и актуелната власт .
Филипче во своето обраќање нагласи дека СДСМ и СДА и во иднина ќе делуваат заеднички и ќе се залагаат за соживот,меѓусебна почит и интеграција на државата.
„ За жал деновиве сме сведоци на едни политики кои ја враќаат државата назад во изолација, нешто за што граѓаните не гласаа. И тоа не смееме да го дозволиме, не смееме да се откажеме од европскиот пат, од европска иднина за нашите граѓани. СДСМ и СДА и понатаму ќе продолжат да делуваат заеднички, ќе се залагаме за демократските вредности и инклузија на сите заедници, за интеграција, а не за изолација на државата“, порача претседателот на СДСМ, Венко Филипче.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.