Македонија
(Видео) Каевски: Сите услови се исполнети за Мицкоски и ДПМНЕ да дадат поддршка за уставните измени

Дарко Каевски, пратеник и портпарол на СДСМ, оценува дека со оставките на министрите од ДУИ, што ќе стапат во сила веднаш по усвојувањето на уставните измени, исполнети се сите услови на Христијан Мицкоски што самиот тој ги постави за неговата партија да поддржи уставни измени.
Мицкоски и ДПМНЕ, вели тој, може веднаш да станат дел од влада во која нема да учествува ДУИ, а потоа и да се организираат предвремени избори.
„Сѐ што треба ДПМНЕ и Мицкоски да направат е да се вклучат во процесот и да дадат поддршка за уставните измени. Во спротивно, ќе покажат дека се несериозни и неодговорни пред сопствениот народ и пред иднината на државата. Наспроти лагите на Мицкоски и ДПМНЕ, македонскиот јазик, идентитет, култура и посебност, денес се меѓународно заштитени и потврдени. Доказ за тоа е предлог-резолуцијата во Сенатот на САД, како и претходно усвоената резолуција од германскиот парламент“, додава Каевски.
Сето тоа, како што истакнува, е потврда за успешната меѓународна политика на Владата предводена од СДСМ.
„По 17 години во чекалницата, нашата држава ги почна преговорите со ЕУ, со заштитен македонски јазик, македонски идентитет и посебност. Сега е време за нов, сериозен исчекор и забрзување на процесот на преговори со крајна цел – полноправно членство во ЕУ до 2030 година. Затоа, секој пратеник, секој политички субјект, има одговорност да се вклучи во процесот и да им даде поддршка на измените на Уставот“, потенцира тој.
Сѐ друго, според него, е дејствување спротивно на врвните државни и национални интереси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Зоран Тодоров ја објави кандидатурата за градоначалник на Кочани

Економистот Зоран Тодоров ја објави кандидатурата за градоначалник на Кочани. По Венко Крстевски, кој е актуелен вршител на должност на функцијата, вчера своја независна кандидатура поднесе и Зоран Тодоров.
„Почитувани сограѓани,
Вчера, ја поднесов независната кандидатура за градоначалник на Кочани. Некој би рекол ракавицата е фрлена, но јас би рекол раката кон сите во Кочани е подадена.
Јас сум Зоран Тодоров – сопруг и татко на две деца, кои секојдневно ме учат што значат љубов, трпение и посветеност.
По професија сум економист, но по суштина сум човек, кој целиот свој живот го живее со одговорност, духовност и почит кон заедницата.
Роден и израснат сум овде во Кочани – градот што ми ги вгради љубовта кон луѓето, чесноста кон трудот и верата во вистинските вредности.
Со моето семејство секој ден го живееме Кочани – не како место на случаен престој, туку како свесен избор.
Избор да бидеш човек, сосед, поддршка.
Избор да не молчиш кога можеш да помогнеш.
Избор да веруваш во луѓето и во заедничката сила што создава, а не уништува.
Јас сум човек од дела – не од зборови. Еден од основачите сум на повеќе организации, преку кои со конкретни акции и хуманитарни иницијативи со години сме им помагале на оние на кои најмногу им требало. Верувам во солидарноста – не како празна реченица на плакат, туку како нормална, човечка и граѓанска реакција кога некој страда или кога нешто може да се подобри.
Сакам живот во Кочани – не како навика, туку како одлука.
Сакам живот во Кочани – со смисла, со срце и со иднина.
Го гледам Кочани не како спомен што избледува, туку како иднина што мораме заедно да ја изградиме – чекор по чекор, човек до човек.
Верувам дека овој град има душа, но таа душа бара нов глас. Глас на одговорност, искреност и храброст да се каже: ‘Доста е – време е за поинаку’.
Сакам живот во Кочани – достоинствен, праведен, инспиративен и топол“, напиша тој на „Фејсбук“.
Македонија
Мицевски: Обвинителството да спроведе темелна и сериозна истрага за прислушувањето

Обвинителството да реагира и да спроведе темелна и сериозна истрага, следењето и прислушувањето ги подриваaт демократијата и државата, вели пратеникот од ВМРО-ДПМНЕ, Никола Мицевски.
Според него, во едно демократско општество какво што сакаме да бидеме, следење и прислушување на опозициски лидер, на бизнисмени и на новинари е сериозен удар и закана врз слободата и довербата во институциите.
„Кога службите што треба да ја гарантираат нашата безбедност биле злоупотребувани за лични и политички цели преку неовластено следење и прислушување политички опоненти и неистомисленици, тогаш се губи довербата во целиот систем. Тоа не е само нарушување на приватноста и кршење на законите, туку и опасен преседан што ги подрива демократијата и државата. Јавноста мора да знае кој, како и зошто во ОЈО дозволил злоупотреба и неовластена употреба на ПИ-мерки? Зошто и за која цел биле прекршени законски пропишаните процедури? Дали токму затоа СДС и ДУИ во Собранието не гласаа за недоверба и смена на јавниот обвинител Љупчо Коцевски?“, напиша Мицевски на „Фејсбук“.
Токму затоа, додава тој, уште еднаш го повикуваме Обвинителството веднаш да реагира и да спроведе темелна и сериозна истрага за да добиеме гаранција дека секој граѓанин ќе биде заштитен од ваква брутална злоупотреба на механизмите и системот.
Македонија
Утре и задутре пороен дожд и грмежи

Под влијание на влажна и нестабилна воздушна маса, утре попладне, во текот на ноќта и в четврток времето ќе биде променливо облачно и нестабилно со локален пороен дожд и грмежи, информира УХМР.
Наместа процесите ќе бидат поинтензивни во форма на невреме со пообилен пороен дожд за кратко време (над 20 л/м2), засилен ветер (над 60 км/ч) и услови за изолирана појава на град.
Во Скопје, утре попладне, во текот на ноќта и в четврток ќе биде нестабилно со повремен пороен дожд, грмежи и засилен ветер.
Во делови од котлината процесите ќе бидат во форма на краткотрајно невреме.