Македонија
(Видео) Ковачки: Во злосторничката група полицајци директно вмешани луѓе на Спасовски

ВМРО-ДПМНЕ обвинува дека полицајци на Заев и Спасовски договарале малтретирање граѓани за изборната кампања. Од партијата објавија докази дека група на Заев и Спасовски, составена од над 40 полицајци, правела црни списоци на автомобили што морало да бидат отстранети од сообраќај, организирала физичко следење на неистомисленици, правеле списоци за гласање за СДСМ и давале наредби за измислување прекршоци.
„Наместо во име на законот, тие дејствувале во име на партијата на власт. Ваквата параполициска партиска формација во служба на СДСМ вршела брутална злоупотреба, а освен раководството и командирите на прилепската полиција, во неа учествувале и лица од најблиското опкружување на Оливер Спасовски.
„Црн список на возила за отстранување“, „Измислете прекршок, тргнете го“„Барајте му лекарско“, „До вечер список од акцијата глас плус важи за сите“, се дел од пораките што ќе ги објавиме како дел од злострничката група на Заев и Спасовски.
Да одиме со ред:
Оваа група, која, според тоа што имаме на увид, била под команда на Кире Китаноски од МВР, човек на советникот на Оливер Спасовски, Оливер Лукароски и таа целосно се ставила во партиска функција на СДСМ.
Еве доказ. На 17.10.2021 година командирот на ОВР, Дарко Цуцулоски, во вибер-групата, каде што се одвивала координацијата на групата, дава команда:
ПП 8(725) АД – бел опел
ПП 7(323) АЦ – 206 караван
ПП 3(420) – фиат црвен
ПП 9(142)-АЕ – пасат зелен
ПП 8(77) – ровер црн
ПП 4(125) АД – корса сива
ПП 1(29) ЦХ – астра сива
Сите овие возила возат за нив. Гледајте да ги отстраните веднаш. Ова е директна насока и наредба од командирот на ОВР Прилеп со цел шиканирање активисти на ВМРО-ДПМНЕ. Од комуникацијата во вибер-групата гледаме дека буквално полициските службеници на смена само следеле луѓе што политички не се согласувале со власта.
Во една друга комуникација Андреј Лашкоски од БПС Прилеп дава информација: „Јапано вози низ Тризла сиво комбе со такси ознака на него“, на што Крајоски Александар од БПС Прилеп дава насока: „Ако има такси-табла, запрете го и барајте му лекарско“.
Во насоките како да се постапува со возилата предничи Дарко Цуцулоски, командир на ОВР Прилеп, кој дава наредба: „Ако треба, измислете прекршок и отстранувајте ги, ајде остана уште малце. До крајот не зна кај се најдува звона на сите страни“. Не само што службата била злоупотребена како параполиција на СДСМ, туку и тие биле претворени во агитатори на власта со собирање гласови за СДСМ.
Дарко Цуцулоски, командир на ОВР Прилеп, во групата на „Вибер“ издава насока: „Колеги, в четврток и в петок е терминот за доставување на списоците по договореното. Внесувањето ќе биде од 16 до 19 часот“.
Во друга порака станува јасно дека тие имале систем или список во кој ги внесувале гласачите, Цуцуловски појаснува: „Да ве потсетам за вечер по 18 часот за внесување глас плус важи за сите нас“.
Од ова се гледа дека станува збор за злосторничко здружение, кое работело за потребите на СДСМ во целост, од следење, малтретирање, шиканирање и тепање. ЈО да постапи веднаш и да го истражи случајот. Очекуваме истрага, која ќе резултира со конкретни обвиненија. Институциите не смее да се користат за партиски притисоци.
Доколку институциите што се надлежни да го расчистат овој случај и да превенираат вакви злоупотреби не работат по закон и не ги спречат и санкционираат овие дејства, треба да знаат дека по ослободувањето на системот, ќе има одговорност за сите што учествувале во вакво организирање, шиканирање и малтретирање, како и тие што оневозможувале истрага“, порача Ковачки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЛДП: Банкарските такси паѓаат под наш притисок, но нема да запреме со борбата против неправедните провизии

Граѓаните преку Либерално-демократската партија (ЛДП) го извојуваа првиот чекор – намалување на тарифниците за банкарски услуги, што произлегува како директен резултат од спроведената кампања „Твоја сметка – твои пари“ и јавниот притисок во интерес на граѓаните, велат од партијата.
Оттука сметаат дека ова е важен и исправен чекор напред, кој покажува дека кога институциите имаат слух, а политиката се води во служба на граѓанинот, резултатите не изостануваат.
„Го охрабруваме гувернерот на Народната банка да продолжи со реформскиот курс и уште похрабро да застане зад иницијативите за укинување на низа неосновани банкарски надоместоци и провизии што постојат само во нашата земја, а се непознати во модерните европски банкарски системи. Македонските граѓани и понатаму плаќаат провизии за затворање на сметки, за проверка на состојба, за повлекување пари од друг банкомат, за онлајн плаќања и електронски пристап – трошоци кои во најголем дел од земјите членки на Европската Унија се укинати или се сведени на минимум. Време е оваа неправда да престане“, велат либералите.
Во таа насока, ЛДП три пати поднесе измени на Законот за платежни услуги и платни системи до Собранието. Предложените измени предвидуваат укинување на банкарски надоместоци за кои нема никаква реална основа и кои само дополнително го оптоваруваат животниот стандард на граѓаните. Очекуваат сите пратеници, без оглед на политичката припадност, конечно да застанат зад граѓанскиот интерес и да дадат поддршка на измените.
Македонија
Гори во Радовиш, Берово, Прилеп – активни седум пожари, три под контрола

Во текот на измнинатото деноноќие на територијата на државата евидентирани се вкупно 27 пожари на отворен простор. Од нив, седум се активни, три се под контрола, а седумнаесет се изгаснати.
Активни пожари има на неколку локации. Во општините Василево, Радовиш и Берово, во селото Нивичино, на планините Голем Готен и на Малешевските Планини гори нискостеблеста шума, смрека, грмушки и ниска вегетација. Во општина Прилеп, кај селото Бешиште, во местото наречено Бешишки Рид, пожарот се шири кон селото Градешница (општина Новаци) и кон границата со Република Грција, каде што не се интервенира поради детонации. Активен пожар има и меѓу селата Царевиќ, Смолани, Радобил и Дрен во општина Прилеп, како и селата Галиште и Трстеник во општина Кавадарци, каде што гори мешана шума и ниска вегетација. Во општина Македонски Брод гори деградирана дабова шума меѓу селата Црешево, Локвица и Крапа. Во селото Ќосевица, општина Македонска Каменица, активен е пожар во борова шума. Пожар е активен и во селото Ореше во општина Чашка, каде што гори букова шума и ниска вегетација, како и во селото Горно Црско во општина Кичево, каде што е зафатена ниска вегетација и ниска шума.
Под контрола се три пожари: во селото Грешница во општина Македонски Брод, каде што гори мешана шума и сува трева, потоа меѓу селата Драгоево и Селце во општина Штип, каде што е зафатена нискостеблеста шума, прнар и сува трева, како и во селото Јунузлија во општина Карбинци, каде што гори шума.
Изгаснати се вкупно 17 пожари на разни локации. Во општина Битола, на улицата Игњат Атанасовски, горела ниска вегетација. Во општина Василево, кај селото Босилово, бил зафатен пожар на депонија. Во селото Умин Дол во општина Куманово горела ниска вегетација, исто како и во населбата Бедиње. Во село Горно Лакочереј, општина Охрид, горело стрниште, а покрај автопатот Тетово – Скопје, во општина Тетово, исто така била зафатена ниска вегетација. Пожар имало и во селото Дебреше, општина Гостивар, во селото Годивје, општина Кривогаштани, каде што горела ниска вегетација и плевна, и во селото Долна Бела Црква, општина Ресен, на ѓубриште. Во општина Босилово, во селата Моносипитово и Банско, гореле депонии. Пожарот што почнал во селата Облавце, Бељаковце, Довезенце и Руѓинце во општините Старо Нагоричане и во Куманово се проширил и кон селата Димонце и Коњух во општина Кратово, каде што биле загрозени куќи и помошни објекти. Во село Нерав, општина Крива Паланка, горела висока борова шума. Во општина Илинден, меѓу селата Мршевци и Бучинци, горело стрниште, а во Катланово и село Чифлик, општина Петровец, била зафатена ниска вегетација, грмушки и дабова шума. Во општина Шуто Оризари, на улицата Брсјачка Буна, горело ѓубриште. Во општина Желино, меѓу селата Церово и Групчин, горела нискостеблеста и деградирана шума, а во селото Долно Перово, општина Ресен, биле зафатени елови дрва, врби, трска и сува трева.
Македонија
Кривична против директорка во Виница, си ја вработила ќерката во истото училиште иако немала соодветно образование

Полицијата поднесе кривична пријава против Г. С. (45) од Виница, директорка во основно училиште во овој град, поради несовесно работење во службата.
„На 27 јануари пријавената склучила договор за вработување со својата ќерка С. С., иако немала соодветно образование, на работно место предметен наставник по математика во основно училиште“, соопшти МВР.
Од тука велат дека со тоа му била нанесена штета на буџетот на училиштето на име исплата на плати во износ од 245.666 денари.