Македонија
(Видео) Ковачки до Ковачевски: Дали знаете дека во Вашиот партиски штаб се договараат бегствата на затворениците од затворите

Имам две пратенички прашања, првото прашање е упатено до министерот за внатрешни работи, станува збор за една фирма што добила тендер за храна од Министерството за внатрешни работи и која исто така добила грант од државата за изградба на фабрика од оваа Влада. И, исто така, оваа фирма добива тендери во рекордни 13 милиони евра. Значи, почитувана јавност, во касарните, односно во објектите на Министерството за внатрешни работи, конкретно во Ѓорче Петров, во касарната, имаме потполно нов објект изграден пред десетина години, а токму кога во периодот е министер за внатрешни работи Оливер Спасовски, тој објект дополнително се осовременува и се набавува најсовремена кујна. Значи, по сите ХАСАП-стандарди. Истото е и со Центарот за обука во Идризово. Значи, имаме нови кујни со нова најсовремена опрема за приготвување и складирање храна. Кујни во кои досега вреден и искусен персонал подготвуваше храна за полициските службеници. Но, овој пат, внимавајте, првпат во независна Македонија полициските службеници сместени во овие објекти што ги спомнав ќе јадат храна што ќе биде набавена од приватна фирма. И тоа не која било фирма, туку од фирма основана токму со поддршка од Владата на ДУИ, во која партиципира и Социјалдемократскиот сојуз. Значи, МВР изградило нови објекти, како кујнско-трепезариски блокови, односно набавила скапа нова опрема, но услугите за исхрана ги дало на фирма што добила грант од 1,6 милион евра од Владата“, истакна Драган Ковачки, пратеник од редовите на ВМРО-ДПМНЕ, на денешната собраниска седница за пратенички прашања.
Ковачки додаде дека на поставувањето на камен-темелникот на погонот на оваа фабрика во Гази Баба бил присутен и министерот за внатрешни работи. Со двата тендера на МВР, од речиси 13 милиони евра, од кои за период од 36 месеци компанијата „Индустри сервис“ во просек може да наплати до 4,5 милиони евра. И тоа е речиси за една третина повеќе пари во однос на минатата година кога МВР дало, односно потрошило околу 3,3 милиони евра за храна. Ваквиот начин на набавка на храна во МВР институцијата ќе ја чини многу повеќе пари отколку да се готви храната во кујните на МВР.
„Од договорите на МВР со оваа компанија се гледа дека тие се полни со конзерви и со сува храна. Дури и гулашот и гравот во спецификацијата доставена од МВР до фирмата се во конзерви. Значи, тие се од други производители, а не се од фирмата што ги доставува. Да заклучам, ова значи дека фирмата „Индустри сервис“ само ставила своја маржа на конзервите и на сувата храна и како последица на тоа, МВР плаќа повеќе отколку кога самите би произведувале и би набавувале во одвоени постапки нешто, што законот го дозволува. Значи, моето прашање до министерот за внатрешни работи е следно: колку проценти од таа маржа на фирмата со која склучивте договор ви припаѓаат вам лично“, го запраша Ковачки министерот за внатрешни работи, Оливер Спасовски.
Пратеникот посочи дека неговото второ прашање се однесува до премиерот. Значи, во изминатиот период граѓаните имаа можност да видат како се случуваат бегства од затворите како на филм, значи со добро вооружени лица, со употреба на огнено оружје, со помош од внатре.
„Македонија во моментот е земја со најголем број бегства од затворите во Европа, на просек од 10.000 затвореници имаме околу 700. Само за споредба, Албанија има нула, Црна Гора има нула, Словенија има нула, Шпанија има 2, Бугарија има 8 итн. А ние имаме 690, односно околу 700. Значи, имаме тотална нефункционалност на системот поради корупција или неспособност или, пак, комбинација од двете. Нема безбедносен скандал во Македонија, нема криминал, нема криминалец што нема конекција со Социјалдемократскиот сојуз. Системот за казни и ресоцијализација е продолжена рака на корумпираното МВР и на Министерството за правда. Последното актуелно бегство на затвореник, ладнокрвен убиец, се случува со насилство, пукање, ранети полицајци и неминовно во дослух со службите“, рече пратеникот.
Тој укажа дека командир на смена на затворската полиција, лице што претходно е избркано од МВР поради корупција, е блиско до Социјалдемократскиот сојуз. Без никакви безбедносни проверки, повторно го правдаат и го унапредуваат во командир. Во јавност излегоа снимки на истиот тој командир, кој на само неколку дена од настанот објавува слика на социјалните мрежи со генералниот секретар на Социјалдемократскиот сојуз, Миле Зечевиќ. Но, пред два дена медиумите објавија уште едно бегство од затвор, овој пат од Шуто Оризари, а институциите десет дена молчеа и не известуваа за тој настан, па мораше новинарите да откријат што се случило. И повторно станува збор за лице што наменски било преместено во полуотворен оддел за да може да избега. А истото тоа лице може да се види на фотографии на социјалните мрежи со актуелни и поранешни политичари.
„Моето прашање до премиерот е следното: дали знаете дека во Вашиот партиски штаб се договараат бегствата на затворениците од затворите“, го праша Ковачки, Димитар Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„ЈО не смее да затвора очи при очигледните сомнежи за криминал и милионските суми кои завршиле во бугарските фирми на Заев и Филипче“, вели ВМРО-ДПМНЕ

„Помина веќе една недела како ги покренавме прашањата за бугарската фирма Пауер Ај 8, која е 100% сопственост на Венко Филипче, и е на иста адреса со фирмите на Заеви, за три пати поскапата препродажба на јаглен од Грција на ЕСМ од 2022 до 2024 година, за најскапиот договор за јаглен, кој го склучила ЕСМ, а е по цена од 82.5 евра за еден тон со вкалкулиран ДДВ, со компанијата Зобек мининг груп“, велат од ВМРО-ДПМНЕ.
„Филипче не дава одговор ниту за Аудито Q8 кое е поклон, а го возеше и во предизборната кампања и е од фирмата која продавала 3 пати поскап јаглен на ЕСМ.
Од Венко Филипче и СДС и понатаму молк. Дали Филипче и СДС немаат став или молкот е нивна стратегија со цел да се заборават скандалите тоа е нивна одлука.
Но молкот на Филипче и СДС е потврда на сите поставени прашања. Колку и тие да молчат силно одекнаа скандалите на фирмите и шемите кои ги креирале со кланот Заеви и испумпале милионски суми врз грбот на народот кој плаќал повисоки сметки за струја.
Венко Филипче и СДС со години ја експлоатира државата и јавните интереси на граѓаните за свои лични цели и тесно партиски интереси.
Додека Филипче се обидува да ги прокламира социјалдемократските вредности кај членството на СДС, граѓаните имаа можност да ги видат шемите за милионски профити на бугарски фирми и адреси кои ги креирале заедно со кланот Заеви. За бизнисите во Македонија, Бугарија, соседството, Персискиот залив и Дубаи.
Филипче и СДС може да молчат и да го потценуваат народот, но ЈО не смее да молчи и да затвора очи при очигледните сомнежи за милионски криминал, граѓаните ја знаат вистината.
ЈО да не молчи и да покрене постапка за сите изнесени сомнежи во јавноста“, се наведува во соопштението на ВМРО-ДПМНЕ.
Македонија
Од денес пуштен во употреба магистралниот пат Охрид-Св.Наум, најави Владата

Македонија се гради. Денес официјално ќе биде пуштен во употреба магистралниот пат Охрид-Св.Наум во должина од 24,3 километри, најавуваат од Владата.
Вредноста на проектот за реконструкција на овој патен правец, како што е појаснето во официјалното соопштение изнесуваше 11,7 милиони евра.
„Ова значи дека по речиси 4 децении, не само охриѓани, туку голем број на граѓани ширум државата, но и туристи ќе можат да патуваат од Охрид до манастирскиот комплекс Св. Наум, но и до соседна Република Албанија, по нов патен правец.
Овие капитални проекти го подобруваат не само туристичкиот, туку и економскиот напредок и развој во Македонија.
Владата работи и создава дела за просперитет на Македонија“.
Македонија
Без вода дел од Кисела Вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска поради изведување на водоводен приклучок на водоводна мрежа со пречник од Ф-150 мм на улицата Христо Татарчев бр. 47, прекинато водоснабдување ќе имаат корисниците од истата улица и кулите – Расдник, oпштина Кисела Вода.
Водоснабдувањето ќе биде прекинато од 09:00 часот до завршување на работните активности.