Македонија
(Видео) Ковачки до Ковачевски: Дали знаете дека во Вашиот партиски штаб се договараат бегствата на затворениците од затворите
 
																								
												
												
											Имам две пратенички прашања, првото прашање е упатено до министерот за внатрешни работи, станува збор за една фирма што добила тендер за храна од Министерството за внатрешни работи и која исто така добила грант од државата за изградба на фабрика од оваа Влада. И, исто така, оваа фирма добива тендери во рекордни 13 милиони евра. Значи, почитувана јавност, во касарните, односно во објектите на Министерството за внатрешни работи, конкретно во Ѓорче Петров, во касарната, имаме потполно нов објект изграден пред десетина години, а токму кога во периодот е министер за внатрешни работи Оливер Спасовски, тој објект дополнително се осовременува и се набавува најсовремена кујна. Значи, по сите ХАСАП-стандарди. Истото е и со Центарот за обука во Идризово. Значи, имаме нови кујни со нова најсовремена опрема за приготвување и складирање храна. Кујни во кои досега вреден и искусен персонал подготвуваше храна за полициските службеници. Но, овој пат, внимавајте, првпат во независна Македонија полициските службеници сместени во овие објекти што ги спомнав ќе јадат храна што ќе биде набавена од приватна фирма. И тоа не која било фирма, туку од фирма основана токму со поддршка од Владата на ДУИ, во која партиципира и Социјалдемократскиот сојуз. Значи, МВР изградило нови објекти, како кујнско-трепезариски блокови, односно набавила скапа нова опрема, но услугите за исхрана ги дало на фирма што добила грант од 1,6 милион евра од Владата“, истакна Драган Ковачки, пратеник од редовите на ВМРО-ДПМНЕ, на денешната собраниска седница за пратенички прашања.
Ковачки додаде дека на поставувањето на камен-темелникот на погонот на оваа фабрика во Гази Баба бил присутен и министерот за внатрешни работи. Со двата тендера на МВР, од речиси 13 милиони евра, од кои за период од 36 месеци компанијата „Индустри сервис“ во просек може да наплати до 4,5 милиони евра. И тоа е речиси за една третина повеќе пари во однос на минатата година кога МВР дало, односно потрошило околу 3,3 милиони евра за храна. Ваквиот начин на набавка на храна во МВР институцијата ќе ја чини многу повеќе пари отколку да се готви храната во кујните на МВР.
„Од договорите на МВР со оваа компанија се гледа дека тие се полни со конзерви и со сува храна. Дури и гулашот и гравот во спецификацијата доставена од МВР до фирмата се во конзерви. Значи, тие се од други производители, а не се од фирмата што ги доставува. Да заклучам, ова значи дека фирмата „Индустри сервис“ само ставила своја маржа на конзервите и на сувата храна и како последица на тоа, МВР плаќа повеќе отколку кога самите би произведувале и би набавувале во одвоени постапки нешто, што законот го дозволува. Значи, моето прашање до министерот за внатрешни работи е следно: колку проценти од таа маржа на фирмата со која склучивте договор ви припаѓаат вам лично“, го запраша Ковачки министерот за внатрешни работи, Оливер Спасовски.
Пратеникот посочи дека неговото второ прашање се однесува до премиерот. Значи, во изминатиот период граѓаните имаа можност да видат како се случуваат бегства од затворите како на филм, значи со добро вооружени лица, со употреба на огнено оружје, со помош од внатре.
„Македонија во моментот е земја со најголем број бегства од затворите во Европа, на просек од 10.000 затвореници имаме околу 700. Само за споредба, Албанија има нула, Црна Гора има нула, Словенија има нула, Шпанија има 2, Бугарија има 8 итн. А ние имаме 690, односно околу 700. Значи, имаме тотална нефункционалност на системот поради корупција или неспособност или, пак, комбинација од двете. Нема безбедносен скандал во Македонија, нема криминал, нема криминалец што нема конекција со Социјалдемократскиот сојуз. Системот за казни и ресоцијализација е продолжена рака на корумпираното МВР и на Министерството за правда. Последното актуелно бегство на затвореник, ладнокрвен убиец, се случува со насилство, пукање, ранети полицајци и неминовно во дослух со службите“, рече пратеникот.
Тој укажа дека командир на смена на затворската полиција, лице што претходно е избркано од МВР поради корупција, е блиско до Социјалдемократскиот сојуз. Без никакви безбедносни проверки, повторно го правдаат и го унапредуваат во командир. Во јавност излегоа снимки на истиот тој командир, кој на само неколку дена од настанот објавува слика на социјалните мрежи со генералниот секретар на Социјалдемократскиот сојуз, Миле Зечевиќ. Но, пред два дена медиумите објавија уште едно бегство од затвор, овој пат од Шуто Оризари, а институциите десет дена молчеа и не известуваа за тој настан, па мораше новинарите да откријат што се случило. И повторно станува збор за лице што наменски било преместено во полуотворен оддел за да може да избега. А истото тоа лице може да се види на фотографии на социјалните мрежи со актуелни и поранешни политичари.
„Моето прашање до премиерот е следното: дали знаете дека во Вашиот партиски штаб се договараат бегствата на затворениците од затворите“, го праша Ковачки, Димитар Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
 
																	
																															Македонија
Во недела сите масовно да излеземе на гласање, зошто додека седите дома, други одлучуваат за вашата иднина, порача Мицкоски
 
														Во привот изборен круг коалицијата предводена од ВМРО-ДПМНЕ, благодарение на поддршката на граѓаните, постигна историски резултат. За прв пат во независна демократска Македонија коалицијата предводена од ВМРО-ДПМНЕ на советничките листи победи во 58 општини плус главниот град, тоа се вкупно 59 општини. Имаме веќе избрани 33 градоначалници, во вториот круг имаме дополнителни 26 кандидати за градоначалници, а противкандидати на нашите кандидати во две општини веќе се откажаа, со што трката во вториот круг веќе е извесна и таму. А од останатите 24 очекувам во сите 24 општини да победат кандидатите на ВМРО-ДПМНЕ и да бидат градоначалници во своите општини, рече претседателот на ВМРО-ДПМНЕ, Христијан Мицкоски на денешниот митинг во Македонска Каменица во рамки на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори во недела на 2 ноември.
Додаде дека очекува, со победата на Орце Ѓорѓиевски во Град Скопје, да се заокружи бројката од 60 градоначалници, што, како што оцени, е исто така историски резултат што никогаш не е направен во Македонија.
Мицкоски ги повика граѓаните на Македонска Каменица, но и на цела Македонија, да излезат да гласаат и на вториот круг во недела и тоа уште помасовно, затоа што со останувањето дома се дозволува некој друг да одлучува за иднината.
„Би сакал да се заблагодарам на сите граѓани коишто излегоа и гласаа во првиот круг и да ја искористам оваа прилика да ги повикам да излезат и да гласаат во вториот круг. Гледаме дека има наши граѓани коишто, можеби, со години не дошле во Македонија, но доаѓаат од земјите во западна Европа за да гласаат во општини како што се Брвеница и Кичево и така натаму. А, гледаме дека одредени наши сограѓани остануваат дома мислејќи дека на тој начин ќе покажат некаков револт, пркос или ќе испратат некаква порака, која во суштина нема да биде препознаена, бидејќи кога останувате дома дозволувате некој друг да одлучува за вашата иднина. Затоа мојата порака и мојата замолница до оние коишто сè уште се двоумат дали да излезат во овој втор изборен круг, е да излезат масовно и, нормално, да го заокружат бројот 9 за Димче, за идниот градоначалник на Македонска Каменица“, повика Мицкоски.
Мицкоски додаде дека ВМРО-ДПМНЕ се бори подеднакво за секоја општина и за секоја педа од македонската територија, што се покажа и во измината година и половина власт.
„Ние се бориме за секоја општина, се бориме за секој човек, се бориме за секој метар квадратен македонска територија, тоа го покажавме како Влада изминатите 16 месеци, така ќе биде и во овој втор круг. Затоа, кога велам дека очекувам сите 26 кандидати кои се во вториот круг сите да победат и да им се приклучат на оние 33, тоа и го мислам и ние како ВМРО-ДПМНЕ, како коалиција правиме се што можеме тоа да се случи и јас сум убеден дека во недела заеднички ќе испишеме уште една историја, којашто до сега не се случила во Македонија“, потенцираше Мицкоски.
Македонија
Утре наутро со магла по котлините, преку денот сончево, со температури до 23 степени
 
														Времето утре, претпладне по одделни котлини ќе има услови за појава на магла. Во текот на денот ќе биде сончево со мала до умерена облачност. Ќе дува слаб ветер од југоисточен правец. Минималната температура ќе биде во интервал од -1 до 6, а максималната ќе достигне од 18 до 23 степени.
Во Скопје, претпладне во делови од котлината ќе има слаба маглa. Преку денот ќе биде сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 4, а максималната ќе достигне до 20 степени.
Во недела времето ќе биде стабилно и суво со појава на утринска магла по одделни котлини. Во понеделник попладне, во текот на ноќта и во вторник ќе има повремени локални врнежи од дожд кои наместа ќе бидат пообилни. Ќе започне да дува умерен до засилен северен ветер, а дневните температури ќе опаднат за неколку степени.
Од среда повторно се очекува стабилно и суво време.
Македонија
Сиљановска-Давкова: Во мировните преговори со само 7% учество во минатата година жените имаат симболична улога
 
														Претседателката Гордана Сиљановска-Давкова денеска се обрати на конференцијата по повод 25-годишнината од донесувањето на Резолуцијата 1325 на Советот за безбедност на ООН ,,Жени, мир и безбедност”.
Воден од разумот и дијалогот, наспроти силата и војната, според Сиљановска – Давкова, Советот за безбедност со Резолуцијата втемели нова перцепција за жените: од неми сведоци и жртви на насилството, тие станаа активни миротворки
Според претседателката, проблемот не се реши ниту до оваа, ниту со десетината други резолуции зашто жените и девојчињата сè уште се најчестите и најголемите жртви на војните.
,,Војната ги лишува женските суштества од човечкиот субјективитет, ги дехуманизира и инструментализира за воени цели”, истакна таа.
Во мировните преговори со само 7% учество во минатата година жените имаат симболична улога.
Таа предупреди на неодржливоста на реалноста во којашто машката половина од човештвото поседува апсолутна моќ на одлучување за мирот и војната, а женската – никаква.
Сиљановска-Давкова смета дека е крајно време да сфатиме дека родовата еднаквост не е феминистичка привилегија и женски егоцентризам, туку хуманистички императив, бидејќи насилството и безбедноста не се женски, туку клучни општествени прашања.
Покрај претседателката, на настанот се обратија: Владо Мисајловски, министер за одбрана; Михалис Рокас, амбасадор на Европската Унија и Весна Ивановиќ-Кастаред, раководителка на канцеларијата на UN Women.
Издавањето поштенска марка во чест на 25-годишнината од Резолуцијата 1325 на ООН ,,Жени, мир и безбедност” манифестира висока демократска свест за важноста на активната улога на жените во мирот и безбедноста.


 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											